លោក គីម ជុងអ៊ុន ចង់ជួបលោក មូន ចេអ៊ីន ឲ្យបានញឹកញាប់បន្តិចនៅឆ្នាំ២០១៩

អន្តរជាតិ

លោក គីម ជុងអ៊ុន ចង់ជួបលោក មូន ចេអ៊ីន ឲ្យបានញឹកញាប់បន្តិចនៅឆ្នាំ២០១៩

31, Dec 2018 , 5:16 pm

រូបភាព

ដោយ: តន ចាន់រិទ្ធារ៉ា

មេដឹកនាំកូរ៉េខាងជើង គីម ជុងអ៊ុន បានបង្ហាញបំណងចង់ឲ្យជំនួបកំពូលមេដឹកនាំកូរ៉េឲ្យបានញឹកញាប់នៅឆ្នាំ២០១៩ ដើម្បីដោះស្រាយបញ្ហានុយក្លេអ៊ែរ និងបង្កើតសន្តិភាពនៅឧបទ្វីបកូរ៉េ។ លោក គីម បញ្ជាក់ដូចនេះ ក្នុងសំបុត្រកម្រមួយផ្ញើទៅកាន់ប្រធានាធិបតីកូរ៉េខាងត្បូង មូន ចេអ៊ីន នៅថ្ងៃទី៣០ ខែធ្នូ ។ លោក មូន វិញ បានស្វាគមន៍ជំហរឥតងាករេរបស់មេដឹកនាំកូរ៉េខាងជើងដែលបន្តចង់ឃើញការរំសាយនុយក្លេអ៊ែរ។

ឆ្នាំ២០១៨ តែមួយគត់ មេដឹកនាំកូរ៉េទាំងពីរបានជួបគ្នាដល់ទៅបីដង ដោយពីរដងនៅតំបន់ព្រំដែន និងម្ដងទៀតនៅរដ្ឋធានីព្យុងយ៉ាង។ នេះជារឿងមិនធ្លាប់មានឡើយក្នុងប្រវត្តិសាស្ត្រកូរ៉េទាំងពីរក្រោយបែកជាពីរនៅក្រោយសង្គ្រាមឆ្នាំ១៩៥០-១៩៥៣ ។ តាមគម្រោងដែលឯកភាពគ្នា មេដឹកនាំកូរ៉េខាងជើង គីម ជុងអ៊ុន ត្រូវធ្វើទស្សនកិច្ចនៅរដ្ឋធានីសេអ៊ូលវិញម្ដងក្នុងឆ្នាំ២០១៨ នេះ ប៉ុន្តែទស្សនកិច្ចនេះមិនអាចកើតឡើងទៅវិញ។

ពីរថ្ងៃមុនដាច់ឆ្នាំ២០១៨ ប្រមុខដឹកនាំកូរ៉េខាងជើង គីម ជុងអ៊ុន ក៏ផ្ញើសារមួយទៅកាន់ប្រធានាធិបតីកូរ៉េខាងត្បូង មូន ចេអ៊ីន និងប្រកាសចង់ឃើញជំនួបមេដឹកនាំកូរ៉េកើតមានឲ្យញឹកញាប់នៅឆ្នាំ២០១៩ ។ លោក Kim Eui-kyeom អ្នកនាំពាក្យប្រធានាធិបតីកូរ៉េខាងត្បូងនិយាយថា លោក គីម មានអារម្មណ៍សោកស្ដាយដែលមិនអាចទៅកាន់ទីក្រុងសេអ៊ូលតាមការព្រមព្រៀងអំឡុងជំនួបជាមួយលោក មូន ក្នុងខែកញ្ញាកន្លងទៅ។

បើតាមអ្នកនាំពាក្យដដែល មេដឹកនាំវ័យក្មេងកូរ៉េខាងជើង ក៏បង្ហាញការតាំងចិត្តរបស់ខ្លួនថា នឹងទៅធ្វើទស្សនកិច្ចនៅកូរ៉េខាងត្បូងតាមស្ថានការណ៍នៅថ្ងៃអនាគត។ មិនមែនតែចង់ទៅសេអ៊ូលឡើយ ប្រមុខដឹកនាំរបបក្រុងព្យុងយ៉ាងដែលទើបកាន់អំណាចបាន៦ឆ្នាំរូបនេះ ក៏ចង់ជួបលោក មូន ឲ្យបានច្រើនលើកថែមទៀតនៅឆ្នាំថ្មីខាងមុខ សំដៅស្វែងរកសន្តិភាព និងដោះស្រាយបញ្ហានុយក្លេអ៊ែរនៅឧបទ្វីបកូរ៉េទាំងអស់គ្នា។

លោកប្រធានាធិបតីកូរ៉េខាងត្បូង បានស្វាគមន៍សំបុត្រកម្ររបស់មេដឹកនាំកូរ៉េខាងជើង បានបញ្ចេញព័ត៌មានខ្លះទៀតថា លោក គីម ក៏មានបំណងអនុវត្តកិច្ចព្រមព្រៀងទាំងឡាយកូរ៉េខាងត្បូងផង និងជាមួយប្រធានាធិបតី ដូណាល់ ត្រាំ ដែលសម្រេចបានក្រោយជំនួបនៅសិង្ហបុរីផងដែរ។ លោក មូន ក៏ត្រៀមជួបលោក គីម នៅឆ្នាំ២០១៩ ផងដែរ ដើម្បីដោះស្រាយបញ្ហាដែលលោក គីម លើកឡើង។

សំបុត្ររបស់លោក គីម ជាសញ្ញាវិជ្ជមានសម្រាប់ការចរចាឈានទៅរំសាយនុយក្លេអ៊ែររវាងអាមេរិក និងកូរ៉េខាងជើងដែលកំពុងជាប់គាំង។ វាក៏ជាសញ្ញាបង្ហាញថា កូរ៉េខាងជើងនៅតែមានឆន្ទៈជជែក និងបោះបង់នុយក្លេអ៊ែររបស់ខ្លួនដដែល។ យ៉ាងណាមិញ ជំហានបន្ទាប់នោះ កូរ៉េខាងជើង ទំនងជាមិនធ្វើសម្បទានធំដុំណាមួយឡើយ បើអាមេរិកនៅតែបន្តសង្កត់កតាមរយៈការដាក់ទណ្ឌកម្មមិនដកដៃបន្តិចសោះនោះ៕