ប្រមុខការពារជាតិអង់គ្លេស៖ ក្រោយចេញពីអឺរ៉ុប អង់គ្លេសនឹងតាំងទ័ពនៅអាស៊ីអាគ្នេយ៍ និងការ៉ាអ៊ីប

អន្តរជាតិ

ប្រមុខការពារជាតិអង់គ្លេស៖ ក្រោយចេញពីអឺរ៉ុប អង់គ្លេសនឹងតាំងទ័ពនៅអាស៊ីអាគ្នេយ៍ និងការ៉ាអ៊ីប

31, Dec 2018 , 11:19 pm

រូបភាព

រដ្ឋមន្រ្តីការពារជាតិអង់គ្លេស Gavin Williamson (រូបភាព AFP)

ដោយ: តន ចាន់រិទ្ធារ៉ា

ប្រមុខការពារជាតិអង់គ្លេស Gavin Williamson នៅថ្ងៃទី៣០ ខែធ្នូ បានប្រកាសពីផែនការក្នុងការបង្កើតមូលដ្ឋានទ័ពចំនួនពីរនៅបរទេស ក្រោយលែងលះដាច់ស្រេចជាមួយសហភាពអឺរ៉ុប។ អង់គ្លេសដែលតាមគម្រោងត្រូវចាកចេញពីសហភាពអឺរ៉ុបនៅថ្ងៃទី២៩ ខែមីនា ឆ្នាំ២០១៩ ចង់ដាក់ទ័ពនៅអាស៊ីអាគ្នេយ៍ និងនៅតំបន់ការ៉ាអ៊ីប។ បើតាមលោក Williamson សម័យក្រោយការចាកចេញពីអឺរ៉ុប ជាឱកាសដ៏ល្អសម្រាប់អង់គ្លេសងើបមុខឡើងវិញលើឆាកអន្តរជាតិ។

ការចាកចេញពីសហភាពអឺរ៉ុប នឹងធ្វើឲ្យអង់គ្លេសមានឯករាជ្យលើការសម្រេចចិត្តលើជោគវាសនារបស់ខ្លួនទាំងវិស័យសេដកិច្ច នយោបាយ សន្តិសុខ និងវិស័យការពារជាតិជាដើម។ ការចាកចេញនេះ ជាព្រឹត្តការណ៍ដ៏អស្ចារ្យសម្រាប់អង់គ្លេសក្នុងនាមជាប្រជាជាតិមួយក្រោយចប់សង្គ្រាមលោកលើកទីពីរមក។ នេះបើតាមការលើកឡើងរបស់រដ្ឋមន្ត្រីការពារជាតិ Gavin Williamson ក្នុងកិច្ចសម្ភាសជាមួយសារព័ត៌មាន Telegraph ។

អង់គ្លេសដែលនឹងត្រូវចាកចេញពីសហភាពអឺរ៉ុបនៅថ្ងៃទី២៩ ខែមីនា នៅមិនទាន់សម្រេចបានកិច្ចព្រមព្រៀងលែងលះនៅឡើយទេ ដ្បិតសមាជិកសភាមិនពេញចិត្តកិច្ចព្រមព្រៀងរបស់រដ្ឋាភិបាល។ យ៉ាងណាក្ដី លោក Williamson ហាក់មានសុទិដ្ឋិនិយមខ្ពស់ចំពោះអនាគតរបស់អង់គ្លេសក្រោយចាកចេញ។ ក្នុងកិច្ចសម្ភាសនៅឯក្រសួងការពារជាតិនៅថ្ងៃទី៣០ ខែធ្នូ លោកអះអាងថា បើអង់គ្លេសបង្អួតខ្លួនតាមវិធីសាស្ត្រផ្សេង អង់គ្លេសអាចដើរតួនាទីដែលពិភពលោកចង់ឃើញ។

ជាមួយគ្នានោះ ប្រមុខការពារជាតិអង់គ្លេសដដែលនេះ ក៏បង្ហាញផែនការរបស់អង់គ្លេសក្នុងការពង្រឹងវត្តមានយោធានៅបរទេស សំដៅបញ្ចេញសាច់ដុំយោធារបស់ខ្លួន។ ក្នុងន័យនេះ លោក Williamson បញ្ជាក់ថា អង់គ្លេសកំពុងសម្លឹងមើលលទ្ធភាពដាក់ទ័ពនៅតំបន់អាស៊ីមួយកន្លែង និងមួយកន្លែងទៀតនៅតំបន់ការ៉ាអ៊ីប។

ខណៈរដ្ឋមន្ត្រីខាងលើមិនបញ្ចេញពីទីតាំងជាក់លាក់នោះ ប្រភពជាច្រើនលើកឡើងថា អង់គ្លេសអាចដាក់បង្កើតយោធារបស់ខ្លួនដែលនឹងមានមូលដ្ឋាននាវាផ្គត់ផ្គង់ គ្រឿងបរិក្ខារផ្សេងៗ អាគារសម្រាប់ស្នាក់នៅ និងមន្ត្រីយោធានៅអតីតអាណានិគមរបស់ខ្លួននៅអាស៊ីអាគ្នេយ៍ ដែលអាចជាព្រុយណេ ឬសិង្ហបុរី។ សម្រាប់មូលដ្ឋានស្រដៀងគ្នានេះនៅការ៉ាអ៊ីបវិញ អាចជាប្រទេសហ្គីយ៉ាន ឬម៉ុងស៊ែរ៉ា។ នេះបើតាមការផ្សាយរបស់សារព័ត៌មាន RT ។

ការអធិប្បាយរបស់លោក Williamson ធ្វើឲ្យគេនឹកដល់សម័យកាលអង់គ្លេសត្រួតត្រាប្រទេសជាច្រើននៅតំបន់អាស៊ីដូចជាឥណ្ឌា សិង្ហបុរី និងម៉ាឡេស៊ីជាដើម។ ប៉ុន្តែអង់គ្លេសបែរជាបោះបង់មហិច្ឆតារក្សាវត្តមាននៅតំបន់អាស៊ីក្រោយឆ្នាំ១៩៦៨ ទៅវិញ។ បើតាមរដ្ឋមន្ត្រីរូបនេះ ប្រទេសជាច្រើនដូចជាកាណាដា នូវែលសេឡង់ ក៏ដូចជាប្រទេសតំបន់អាហ្វ្រិកផងនោះចង់ឃើញអង់គ្លេសកាន់តួនាទីមហាអំណាចយោធា និងជាមេដឹកនាំពិភពលោកផង៕