លោក គីម ជុងអ៊ុន៖ បើអាមេរិកបន្តដាក់ទណ្ឌកម្ម កូរ៉េខាងជើងនឹងដើរផ្លូវផ្សេង

អន្តរជាតិ

លោក គីម ជុងអ៊ុន៖ បើអាមេរិកបន្តដាក់ទណ្ឌកម្ម កូរ៉េខាងជើងនឹងដើរផ្លូវផ្សេង

01, Jan 2019 , 11:54 am

រូបភាព

មេដឹកនាំកូរ៉េខាងជើង គីម ជុងអ៊ុន ថ្លែងសារឆ្នាំថ្មី (រូបភាព Screenshot ពី Youtube)

ដោយ: តន ចាន់រិទ្ធារ៉ា

មេដឹកនាំកំពូលកូរ៉េខាងជើង គីម ជុងអ៊ុន នៅថ្ងៃទី១ ខែមករា ឆ្នាំ២០១៩ បានប្រកាសការប្ដេជ្ញាចិត្តរបស់ខ្លួនក្នុងការរំសាយនុយក្លេអ៊ែរពីឧបទ្វីបកូរ៉េ។ នាសុន្ទរកថាឆ្នាំថ្មី លោក គីម ក៏ប្រាប់ឲ្យអាមេរិកចាត់វិធានការឆ្លើយតបនឹងអ្វីដែលកូរ៉េខាងជើងបានធ្វើកន្លងមកក្នុងដំណើរការលុបបំបាត់នុយក្លេអ៊ែរតាមកិច្ចព្រមព្រៀងនៅសិង្ហបុរី និងព្រមានថា បើអាមេរិកនៅតែដាក់ទណ្ឌកម្ម កូរ៉េខាងជើងនឹងដើរលើផ្លូវថ្មីមិនខាន។

៣៦៥ថ្ងៃក្នុងឆ្នាំ២០១៨ ទំនាក់ទំនងកូរ៉េខាងជើង និងអាមេរិក ប្រែប្រួលគួរឲ្យភ្ញាក់ផ្អើលខ្លាំងមែនទែន។ មេដឹកនាំគូសត្រូវទាំងពីរ ដែលធ្លាប់គំរាមកម្ទេចប្រទេសគ្នាទៅមកក្នុងឆ្នាំ២០១៧ បែរជាចាប់ដៃគ្នាទៅវិញ ហើយក៏ព្រមព្រៀងគ្នាដោះស្រាយបញ្ហានុយក្លេអ៊ែរនៅឧបទ្វីបកូរ៉េឲ្យបានចប់ផង។ យ៉ាងណាមិញ ពេញមួយឆ្នាំ២០១៨ បញ្ហារ៉ាំរ៉ៃនេះនៅតែរកច្រកចេញមិនឃើញ ខណៈភាគីទាំងពីរនៅតែខ្វែងគំនិតថា ត្រូវរំសាយនុយក្លេអ៊ែរតាមផ្លូវណា អ្នកណាធ្វើអ្វីមុន ហើយចប់នៅពេលណា។

នាឱកាសថ្លែងសារអបអរឆ្នាំ២០១៩ ប្រមុខដឹកនាំកូរ៉េខាងជើង គីម ជុងអ៊ុន បានប្រកាសជាចំហថា ការតាំងចិត្តរបស់លោកក្នុងការរំសាយនុយក្លេអ៊ែរ គឺមិនផ្លាស់ប្ដូរឡើយ ហើយត្រៀមខ្លួនជួបលោក ដូណាល់ ត្រាំ គ្រប់ពេល។ លោក គីម ប្រាប់អាមេរិកឲ្យធ្វើសកម្មភាពតបនឹងអ្វីដែលកូរ៉េខាងជើងបានធ្វើ បើសិនអាមេរិកចង់ឲ្យដំណើរការលុបបំបាត់នុយក្លេអ៊ែរទៅមុខបានលឿន។ ប៉ុន្តែលោកមិននិយាយថា អាមេរិកត្រូវធ្វើអ្វីឡើយ។

ការប្រកាសត្រៀមខ្លួនជួបលោក ត្រាំ និងការបន្តការតាំងចិត្តក្នុងការដោះស្រាយបញ្ហា ជាសញ្ញាវិជ្ជមានមួយក្នុងដំណើរការរំសាយនុយក្លេអ៊ែរពីឧបទ្វីបកូរ៉េ។ កន្លងមក លោក ត្រាំ បានប្រកាសហើយថា ជំនួបមេដឹកនាំអាមេរិក-កូរ៉េខាងជើងលើកទី២ នឹងរៀបចំឡើងនៅដើមឆ្នាំ២០១៩ នេះ ដែលអាចនៅមករានេះ ឬខែកុម្ភៈ។ ថ្មីៗនេះទៀតសោត ប្រធានាធិបតីអាមេរិកក៏បង្ហើបដែរថា ការចរចាជាមួយកូរ៉េខាងជើង មានដំណើរការទៅមុខ។

ទន្ទឹមនឹងសារវិជ្ជមាន លោក គីម ក៏ឆ្លៀតព្រមានអាមេរិកជុំវិញការដាក់ទណ្ឌកម្មលើកូរ៉េខាងជើង។ ក្នុងវីដេអូផ្សាយដោយទូរទស្សន៍រដ្ឋកូរ៉េខាងជើង មេដឹកនាំវ័យក្មេងរូបនេះអះអាងថា កូរ៉េខាងជើងនឹងពិចារណាដើរលើផ្លូវថ្មី បើអាមេរិកមិនគោរពសន្យាចំពោះពិភពលោកនាជំនួបនៅសិង្ហបុរី និងបន្តដាក់សម្ពាធទណ្ឌកម្មមិនចេះចប់នោះ។ សម្រាប់លោក គីម សកម្មភាពអាមេរិកបែបនេះ ជាការបង្ខំឲ្យកូរ៉េខាងជើងជ្រើសរើសផ្លូវផ្សេងទៀតដើម្បីការពារទឹកដី។

ងាកទៅរឿងសមយុទ្ធវិញ លោក គីម បានស្នើឲ្យកូរ៉េខាងត្បូងបញ្ឈប់លំហាត់យោធារួមគ្នាជាមួយអាមេរិកទាំងស្រុង និងមិនត្រូវទទួលអាវុធយុទ្ធសាស្ត្រអាមេរិកឡើយ។ សព្វថ្ងៃ កូរ៉េខាងជើង និងខាងត្បូងសម្រេចចិត្តដើរលើផ្លូវសន្តិភាព និងវិបុលភាព ដូចនេះសមយុទ្ធយោធាជាមួយកម្លាំងខាងក្រៅ មិនគួរមានឡើយ ហើយការពង្រាយអាវុធធ្វើសង្គ្រាម ក៏គួរតែបញ្ឈប់ដែរ។ នេះជាការលើកឡើងរបស់ប្រមុខដឹកនាំកូរ៉េខាងជើង៕