នៅឆ្នាំ២០១៩ ប្រទេសអាស៊ីចំនួន៣ នឹងរៀបចំការបោះឆ្នោតរៀងៗខ្លួន។ នៅថៃ នឹងមានការបោះឆ្នោតទូទៅនៅខែកុម្ភៈ, នៅឥណ្ឌូណេស៊ីនឹងមានការបោះឆ្នោតប្រធានាធិបតីនៅខែមេសា និងឥណ្ឌាក៏មានការរៀបចំការបោះឆ្នោតជ្រើសរើសមេដឹកនាំថ្មី។ ក្រៅប្រទេសទាំង៣ នេះ ប្រទេសតំបន់អាស៊ីមួយចំនួនទៀតក៏រៀបចំការបោះឆ្នោតពាក់កណ្ដាលអាណត្តិ និងការបោះឆ្នោតអសាកលដែរ។
នៅទីផុត រាជាណាចក្រថៃ នឹងរៀបចំការបោះឆ្នោតទូទៅនៅថ្ងៃទី២៤ ខែកុម្ភៈ ដើម្បីជ្រើសរើសមេដឹកនាំតាមបែបប្រជាធិបតេយ្យ បន្ទាប់ពីរស់នៅក្រោមការដឹកនាំរបស់យោធាតាំងពីឆ្នាំ២០១៤ មក។ ឯឥណ្ឌូណេស៊ី នឹងបោះឆ្នោតនៅថ្ងៃទី១៧ ខែមេសា ដោយប្រធានាធិបតីបច្ចុប្បន្ន ចូកូ វីដូដូ ត្រូវប្រជែងជាមួយគូប្រកួតចាស់ ប្រាបូវ៉ូ សូប្យ៉ាន់តូ (Prabowo Subianto) ខណៈលោកនាយករដ្ឋមន្ត្រីឥណ្ឌា នារិន្ទ្រា ម៉ូឌី ក៏ត្រូវការពារតំណែរបស់នៅខែមេសា ឬឧសភាខាងមុខ។
ថៃ៖ ដំណើររដាក់រដុបលើផ្លូវប្រជាធិបតេយ្យក្រោមការគូសវាសរបស់មេដឹកនាំរដ្ឋប្រហារ
ថ្ងៃទី២៤ ខែកុម្ភៈ ឆ្នាំ២០១៩ គឺជាកាលបរិច្ឆេទបោះឆ្នោតជ្រើសតាំងសមាជិកសភាថៃ ដែលមានភារកិច្ចជ្រើសរើសនាយករដ្ឋមន្ត្រីថ្មី។ មុនមានកាលបរិច្ឆេទនេះ របបយោធាដឹកនាំដោយលោក ប្រាយុទ្ធ ចន្ទអូចា បានលើកពេលជាច្រើនលើកតាំងពីរដ្ឋប្រហារខែឧសភា ឆ្នាំ២០១៤ មក។ ការអូសបន្លាយនេះ ធ្វើឲ្យរដ្ឋាភិបាលសឹករងការរិះគន់យ៉ាងខ្លាំងទាំងពីអ្នកនយោបាយក្នុងស្រុក និងសហគមន៍អន្តរជាតិផងដែរ។
សម្រាប់ការបោះឆ្នោតឆ្នាំ២០១៩ លោក ប្រាយុទ្ធ មិនទាន់ច្បាស់ថា នឹងចូលរួមឬអត់ឡើយ តែមានបក្សនយោបាយមួយដែលបានគាំទ្របេក្ខភាពជានាយករដ្ឋមន្ត្រីរួចហើយ។ តាមច្បាប់បោះឆ្នោតថ្មី បក្សនយោបាយនីមួយៗមានសិទ្ធតែងតាំងបេក្ខជននាយករដ្ឋមន្ត្រីបីរូប។ ខណៈបក្សធំៗដូចជាបក្សភឿថៃ និងបក្សប្រជាធិបតេយ្យ សុទ្ធតែសង្ឃឹមទទួលជោគជ័យ គេមិនរំពឹងថា ពួកគេអាចទទួលបានសំឡេងគ្រប់គ្រាន់ដើម្បីបង្កើតរដ្ឋាភិបាលតែឯងឡើយ។
បោះឆ្នោតឥណ្ឌូណេស៊ី៖ គូបដិបក្ខឆ្នាំ២០១៤ ត្រូវប្រកួតម្ដងទៀតនៅឆ្នាំ២០១៩
លោក ចូកូ វីដូដូ ដែលត្រូវស្គាល់ជាទូទៅថា ចូកូវី នឹងត្រូវការពារតំណែងប្រធានាធិបតីរបស់ខ្លួនទល់នឹងអតីតឧត្តមសេនីយ៍ សូប្យ៉ាន់តូ ដែលលោកបានផ្ដួលម្ដងហើយកាលពីឆ្នាំ២០១៤ ។ សម្រាប់ការបោះឆ្នោតឆ្នាំ២០១៩ នេះ លោក ចូកូវី បានចាប់ដៃជាមួយបព្វជិតសាសនាឥស្លាម Ma’ruf Amin ។ នេះជាការសម្រេចចិត្តយុទ្ធសាស្ត្ររបស់លោក ចូកូវី ព្រោះអាចប្រមូលការគាំទ្រពីប្រជាជនមូស្លីម ប៉ុន្តែក៏ប្រឈមមុខនឹងបញ្ហាដែរ ដ្បិតលោក Amin មានគំនិតអភិរក្សខ្លាំង។
ប្រជាជនឥណ្ឌូណេស៊ីប្រមាណ១៩០លាននាក់ នឹងត្រូវសម្រេចចិត្តថា បន្តឲ្យលោក វីដូដូ ដឹកនាំទៀត ឬផ្ដល់ឱកាសឲ្យលោក សូប្យ៉ាន់តូ វិញម្ដង។ បើឈ្នះឆ្នោត បេក្ខជនប្រធានាធិបតី និងដៃគូជាបេក្ខជនអនុប្រធានាធិបតី ត្រូវការសំឡេងគាំទ្រ៥០ភាគរយ។ បើគ្មានបេក្ខភាពអាចទទួលសំឡេងគ្រប់គ្រាន់ បេក្ខភាពដែលទទួលការគាំទ្រច្រើនជាងគេចំនួនពីរ ត្រូវបន្តទៅការបោះឆ្នោតជុំទី២ទៀត។
បោះឆ្នោតឥណ្ឌា៖ បក្សកាន់អំណាចបាត់សំឡេងនៅថ្នាក់ក្រោមជាតិ អាចប៉ះពាល់តំណែងលោក ម៉ូឌី
បរាជ័យក្នុងការបោះឆ្នោតនៅតាមរដ្ឋមួយចំនួនក្នុងឆ្នាំ២០១៨ របស់បក្សកាន់អំណាច Bharatiya Janata Party ពិតជាធ្វើឲ្យនាយករដ្ឋមន្ត្រី នារិន្ទ្រា ម៉ូឌី ខ្វាយខ្វល់យ៉ាងខ្លាំង ខណៈការបោះឆ្នោតនាយករដ្ឋមន្ត្រីថ្មី នឹងធ្វើខែមេសា ឬឧសភាខាងមុខ។ ដ្បិតជាការបោះឆ្នោតថ្នាក់ក្រោមជាតិមែន បរាជ័យនេះបង្ហាញឲ្យឃើញពីការធ្លាក់ចុះប្រជាប្រិយភាពរបស់លោក ម៉ូឌី និងគោលនយោបាយរបស់លោកផងដែរ។
គូប្រជែងធំរបស់បក្សកាន់អំណាច គឺបក្សសមាជជាតិដែលស្ថិតក្រោមការដឹកនាំរបស់អ្នកនយោបាយត្រកូលគន្ធី។ យ៉ាងណាមិញ ក្រោមការដឹកនាំរបស់លោក ម៉ូឌី ឥណ្ឌាដែលមានប្រជាជនលំដាប់ទី២ បន្ទាប់ពីចិន បានស្គាល់កំណើនសេដ្ឋកិច្ចឆាប់រហ័សបំផុត និងការកែទម្រង់ជាច្រើនផង ដែលការណ៍ននេះអាចជាឈ្នាន់ឲ្យលោក ម៉ូឌី បន្តឈ្នះឆ្នោតដឹកនាំទៀត៕