អន្តរជាតិ
លោក គីម ជុងអ៊ុន និងលោក ដូណាល់ ត្រាំ នាជំនួបលើកទី១ នៅសិង្ហបុរី។ (រូបភាព AFP)
×![]()
ដោយ: តន ចាន់រិទ្ធារ៉ា
ចាប់ផ្ដើមទំព័រថ្មីឆ្នាំ២០១៩ មេដឹកនាំអាមេរិក និងកូរ៉េខាងជើង សុទ្ធតែបង្ហាញជំហរចង់ជួបគ្នាឆាប់ៗ ដើម្បីដោះស្រាយបញ្ហានុយក្លេអ៊ែរ។ សញ្ញាវិជ្ជមាននេះ ធ្វើឲ្យគេឯងសង្ឃឹមថា ជំនួបកំពូលរវាងប្រធានាធិបតី ដូណាល់ ត្រាំ និងមេដឹកនាំកំពូលកូរ៉េខាងជើង គីម ជុងអ៊ុន អាចកើតឡើងក្នុងពេលឆាប់ៗខាងមុខនេះ ស្របពេលដែលដំណើរការរំសាយនុយក្លេអ៊ែរនៅជាប់គាំងនៅឡើយ។ យ៉ាងណាមិញ មកទល់ពេលនេះ គេមិនទាន់ឃើញមានការជួបគ្នា រវាងមន្ត្រីភាគីទាំងពីរជួបគ្នា ជជែកពីការរៀបចំជំនួបនេះនៅឡើយទេ លើកលែងតែមានការលួចជួបគ្នាជាសម្ងាត់។
ក្នុងឱកាសថ្លែងសារឆ្នាំថ្មី ប្រមុខដឹកនាំកូរ៉េខាងជើង គីម ជុងអ៊ុន បានបោះបាល់ទៅអាមេរិកមុន ដោយប្រកាសត្រៀមជួបប្រធានាធិបតី ដូណាល់ ត្រាំ នៅពេលណាក៏បាន ប៉ុន្តែឆ្លៀតព្រមានថា បើអាមេរិកបន្តទណ្ឌកម្ម កូរ៉េខាងជើងនឹងដើរផ្លូវផ្សេង។ ឆ្លើយតបវិញ លោក ត្រាំ ក៏និយាយដែរថា លោកក៏ត្រៀមជួបមេដឹកនាំកូរ៉េខាងជើងដូចគ្នាដែរ ហើយក៏ថែមសម្ដីថា លោក គីម ដឹងច្បាស់ពីសក្ដានុពលសេដ្ឋកិច្ចកូរ៉េខាងជើង បើសុខចិត្តបោះបង់នុយក្លេអ៊ែរ។
តាមពិតទៅ ព័ត៌មាននៃជំនួបត្រាំ-គីមលើកទីពីរ បានលេចឡើងតាំងពីចុងឆ្នាំ២០១៨ មក ហើយដែលក្រុងវ៉ាស៊ីនតោន ជាអ្នកបញ្ចេញតែម្ដង។ ការជួបមុខលើកទីពីរនេះ ត្រូវបានរំពឹងថា នឹងធ្វើឡើងនៅខែមករា ឬកុម្ភៈ ឆ្នាំ២០១៩នេះ ហើយមានទីតាំងចំនួនបី កំពុងស្ថិតក្នុងការពិចារណាធ្វើជាម្ចាស់ផ្ទះ។ លោក ត្រាំ ប្រកាសហើយថា សិង្ហបុរីម្ចាស់ផ្ទះជំនួបលើកមួយ មិនស្ថិតក្នុងការគិតគូរឡើយ។
ជំនួបត្រាំ-គីម កើតក្រោយជំនួបមូន-គីម
ជំនួបត្រាំ-គីម លើកក្រោយអាចកើតឡើងឬអត់ ក៏ត្រូវពឹងលើកត្តាសំខាន់មួយទៀត គឺកូរ៉េខាងត្បូង។ ការជួបចរចាលើកទីមួយ ក្នុងខែមិថុនា នៅសិង្ហបុរី កើតមានបន្ទាប់ពីជំនួបរវាងប្រធានាធិបតីកូរ៉េខាងត្បូង មូន ចេអ៊ីន និងលោក គីម នៅខែឧសភា។ កាលនោះ លោក មូន បានធ្វើដំណើរទៅជួបលោក គីម នៅឯប៉ែកខាងជើងខ្សែព្រំដែន បន្ទាប់ពីលោក ត្រាំ ប្រកាសលុបចោលគម្រោងជំនួបនៅសិង្ហបុរី។ ក្រោមការសម្របសម្រួលនេះ ជំនួបត្រាំ-គីម ក៏មានដង្ហើមឡើងវិញ។
យ៉ាងណាក្ដី ជំនួបមូន-គីម នៅតែគ្មានសញ្ញាថា នឹងកើតមានក្នុងពេលឆាប់នេះឡើយ។ តាមការឯកភាពជាមួយលោក មូន នាជំនួបក្នុងខែកញ្ញា លោក គីម ចង់ទៅរដ្ឋធានីសេអ៊ូលនៅត្រឹមចុងឆ្នាំ២០១៨ ប៉ុន្តែគម្រោងនេះ មិនអាចកើតជារូបរាងបានទេ ខណៈលោក គីម ក៏សុំទោសលោក មូន ដែរជុំវិញបញ្ហានេះ។ ទំនងពឹងផ្អែកលើគម្រោងនេះ ទើបលោក ត្រាំ ប្រកាសថា ជំនួបលើកទីពីរ ជាមួយលោក គីម អាចរៀបចំទាន់នៅដើមឆ្នាំ២០១៩ ។
ជំនួបលើកទីពីរ អាចរកច្រកចេញឃើញ?
ជំនួបប្រវត្តិសាស្ត្រថ្ងៃទី១២ ខែមិថុនា នៅសិង្ហបុរី ជារឿងដែលគេមិននឹកស្មានថា អាចកើតឡើងបានឡើយ។ មេដឹកនាំប្រទេសពីរដែលជាគូសត្រូវនឹងគ្នា និងគំរាមកម្ទេចគ្នាឲ្យក្លាយជាផេះផង់ បែរជាឈរចាប់ដៃចំពោះមុខកាមេរ៉ាទៅវិញ។ ប៉ុន្តែអ្វីដែលបានព្រមព្រៀងគ្នាក្រោយជំនួបនេះ មានលក្ខណៈទូលាយខ្លាំងពេក និងមិនបានឲ្យនិយមន័យឲ្យច្បាស់ពីការរំសាយនុយក្លេអ៊ែរឡើយ ឬយន្តការជាក់លាក់ ឈានទៅលុបបំបាត់អាវុធប្រល័យលោកនេះទេ។
ការណ៍នេះ ធ្វើឲ្យភាគីទាំងពីរមិនអាចសម្រេចបានលទ្ធផលជាដុំកំភួនអ្វីទេ ក្នុងដំណើរការជជែកគ្នាកន្លងមក។ តាមពិតទៅ កូរ៉េខាងជើងក៏មិនមែនមិនធ្វើអ្វីសោះដែរ ដោយបានកម្ទេចទីតាំងសាកល្បងនុយក្លេអ៊ែរដ៏ធំ ផ្អាកការសាកល្បងមីស៊ីល និងនុយក្លេអ៊ែរ ហើយត្រៀមបិទមជ្ឈមណ្ឌលបាញ់មីស៊ីលមួយកន្លែងទៀតផង។ អាមេរិកទៅវិញទេ ដែលមិនទាន់ធ្វើអ្វី ក្រៅពីការដាក់ទណ្ឌកម្មថែមទៀតលើកូរ៉េខាងជើង។
ទោះជាយ៉ាងណា គេសង្ឃឹមថា ជំនួបលើកពីរ នឹងមិនក្លាយជាជំនួបសិង្ហបុរីលើកទីពីរឡើយ។ នេះមានន័យថា អាមេរិក និងកូរ៉េខាងជើង ត្រូវតែកំណត់ឲ្យច្បាស់លាស់ ពីដំណើរការរំសាយនុយក្លេអ៊ែរ ក៏ដូចជានិយមន័យផង កុំឲ្យមានការផ្ដល់និយមន័យពីរផ្សេងគ្នា ដូចសព្វថ្ងៃ។ សម្រាប់កូរ៉េខាងជើង ការរំសាយនុយក្លេអ៊ែរ គឺមិនមែនសំដៅនុយក្លេអ៊ែររបស់ខ្លួនមួយមុខឡើយ តែអាមេរិកក៏ត្រូវដកទ័ព និងដកកូរ៉េខាងត្បូង ចេញពីប្រព័ន្ធនុយក្លេអ៊ែររបស់ខ្លួនផង។ ចំពោះអាមេរិកវិញ ការកម្ទេចនុយក្លេអ៊ែរកូរ៉េខាងទាំងស្រុង ធ្វើឡើងតែម្ដង និងមានការត្រួតពិនិត្យត្រឹមត្រូវ ទើបជាការគោលដៅធំរបស់ខ្លួន៕
Tag:
អាមេរិក
កូរ៉េខាងត្បូង
ដូណាល់ ត្រាំ
គីម ជុងអ៊ុន
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
