អន្តរជាតិ
លោក ស៊ី ជិនភីង៖ ចិន និងតៃវ៉ាន់ត្រូវរួមគ្នាឲ្យខាងតែបាន ទោះខុសគ្នាច្រើន
× ប្រធានាធិបតីចិន ស៊ី ជិនភីង នៅថ្ងៃទី២ ខែមករា បានផ្ញើសារម៉ឺងម៉ាត់មួយទៅកាន់កោះតៃវ៉ាន់ ដែលជាចិនចាត់ទុកជាអាណាខេត្តរបស់ខ្លួន។ លោក ស៊ី អះអាងថា ការបង្រួបបង្រួមរវាងចិន និងតៃវ៉ាន់ គឺជារឿងមិនអាចប្រកែកបាន ហើយជាកិច្ចការប្រវត្តិសាស្ត្រសម្រាប់ជនជាតិចិនទាំងអស់។ មេដឹកនាំចិនក៏សន្យាផ្ដល់អត្ថប្រយោជន៍ជាច្រើនដល់តៃវ៉ាន់ បើសុខចិត្តរស់នៅក្រោមការគ្រប់គ្រងរបស់ក្រុងប៉េកាំង ប៉ុន្តែការប្រកាសផ្ដាច់ខ្លួន នឹងត្រូវឆ្លើយតបវិញដោយកម្លាំងយោធា។
ចិន និងតៃវ៉ាន់ នឹងត្រូវបង្រួបបង្រួមតាមផ្លូវសន្តិភាព តែការប្រើកម្លាំងយោធានៅតែជម្រើសដដែល។ នេះជាការលើកឡើងរបស់ប្រធានាធិបតីចិន ស៊ី ជិនភីង នាឱកាសខួបទី៤០ នៃការផ្ញើសារទៅកាន់ជនរួមជាតិនៅតៃវ៉ាន់ នៅថ្ងៃទី២ ខែមករា។ ព្រឹត្តិការណ៍នេះ ជាការរំឭកដល់ការចេញសេចក្តីសម្រេចមួយកាលពីថ្ងៃទី២ មករា ឆ្នាំ១៩៧៩ របស់សភាប្រជាជនចិន ដែលស្នើបញ្ចប់ការប្រឈមមុខយោធា និងបង្កើតការផ្លាស់ប្ដូរគ្រប់វិស័យរវាងចិន និងកោះតៃវ៉ាន់។
ចិន និងតៃវ៉ាន់ ដែលខណ្ឌចែកដាច់ពីគ្នាដោយច្រកសមុទ្រតៃវ៉ាន់ សុទ្ធតែអះអាងថា ខ្លួនជាតំណាងឲ្យចិនដូចគ្នា ប៉ុន្តែតៃវ៉ាន់ដែលជាកោះមួយនោះ បានបាត់បង់ឥទ្ធិពលច្រើនលើឆាកអន្តរជាតិ ខុសពីចិនដែលជាមហាអំណាចពិភពលោក។ ការបង្រួបង្រួមចិនតែមួយ គឺជាបេសកកម្មដ៏ធំមួយរបស់ក្រុងប៉េកាំងដើម្បីសម្រេចឲ្យបានគោលដៅសំខាន់បំផុតរបស់ខ្លួនមួយទៀត គឺការធ្វើឲ្យចិនស្រស់បំព្រង និងខ្លាំងក្លាឡើងវិញ។
ក្នុងសុន្ទរកថាដែលផ្សាយតាមទូរទស្សន៍រដ្ឋទាំងអស់ លោក ស៊ី អះអាងថា ចិន និងតៃវ៉ាន់ ត្រូវតែរួបរួមគ្នាដាច់ខាត ហើយចិននឹងប្រឹងប្រែងឲ្យអស់ពីសមត្ថភាព និងដោយស្មោះត្រង់ដើម្បីការបង្រួបបង្រួមជាតិតាមរយៈមធ្យោបាយសន្តិភាព។ ដោយកត់សម្គាល់ថា ចិនមិនវាយចិនដូចគ្នានោះ មេដឹកនាំចិនរូបនេះបន្តថា ដំណោះស្រាយសន្តិភាព នឹងផ្ដល់ប្រយោជន៍ឲ្យជនរួមឈាមចិនទាំងអស់ មិនថានៅតៃវ៉ាន់ ឬនៅដីគោកឡើយ។
យ៉ាងណាមិញ លោក ស៊ី ក៏ព្រមានថា ក្រុងប៉េកាំង មិនបោះបង់ជម្រើសយោធាក្នុងការបង្រួបបង្រួមជាមួយតៃវ៉ាន់ឡើយ។ បើតាមទីភ្នាក់ងារព័ត៌មានរដ្ឋចិន Xinhua លោក ស៊ី ដែលជាអគ្គលេខាធិការគណៈកម្មាធិការមជ្ឈិមបក្សកុម្មុយនីស្តចិនដែរនោះ សង្កត់ធ្ងន់ថា ការប្រកាសឯករាជ្យរបស់តៃវ៉ាន់ ជាការដើរផ្ទុយចរន្តប្រវត្តិសាស្ត្រ ហើយការប្រើកម្លាំងទ័ព នឹងសំដៅតែប្រទេសខាងក្រៅដែលលូកលាន់កិច្ចការតៃវ៉ាន់ និងក្រុមមនុស្សមាននិន្នាការទៅរកឯករាជ្យប៉ុណ្ណោះ។
ក្រៅពីការរួមគ្នាជាចិនតែមួយក្រោមការគ្រប់គ្រងរបស់ប៉េកាំង មេដឹកនាំចិនក៏ស្នើអនុវត្ត «ប្រទេសមួយ ប្រព័ន្ធពីរ» ជារូបមន្តសម្រាប់ការបង្រួបបង្រួមគ្នាដែរ។ សព្វថ្ងៃ រូបមន្តនេះកំពុងអនុវត្តនៅហុងកុង និងម៉ាកាវ ដោយតំបន់ទាំងពីរនេះមានរដ្ឋបាលគ្រប់គ្រងខ្លួនឯង ច្បាប់អនុវត្តដោយឡែក តែកិច្ចការយោធា និងការបរទេសស្ថិតក្រោមការដឹកនាំរបស់ប៉េកាំង។ សម្រាប់លោក ស៊ី ភាពខុសគ្នារវាងចិន និងតៃវ៉ាន់ មិនមែនជាឧបសគ្គក្នុងការរួបរួមគ្នាទេ។
ជាសារផ្ញើទៅតៃវ៉ាន់ លោក ស៊ី ក៏សន្យារក្សាប្រព័ន្ធសង្គម និងការរស់នៅរបស់ប្រជាជននៅតៃវ៉ាន់ ឯកម្មសិទ្ធិឯកជន ជំនឿសាសនា ក៏ដូចជាផលប្រយោជន៍ស្របច្បាប់របស់ពួកគេក៏នឹងត្រូវបានការពារដែរ នៅពេលការបង្រួបបង្រួមលេចជារូបរាងឡើង។ លើសពីនោះ សន្តិភាពយូរអង្វែងនៅតៃវ៉ាន់ ក៏ត្រូវបានធានាដូចគ្នាដែរ៕
Tag:
ចិន
តៃវ៉ាន់
ស៊ី ជិនភីង
© រក្សាសិទ្ធិដោយ thmeythmey.com