អន្តរជាតិ
ភារធារីទូតកូរ៉េខាងជើងនៅអុីតាលី ស្វែងរកសិទ្ធិជ្រកកោននៅបរទេស
× មន្ត្រីការទូតជាន់ខ្ពស់កូរ៉េខាងជើងប្រចាំអុីតាលី បានដាក់ពាក្យស្វែងរកសិទ្ធិជ្រកកោននៅប្រទេសទីបី។ នេះបើតាមការផ្សាយរបស់ទីភ្នាក់ងារព័ត៌មានកូរ៉េខាងត្បូង Yonhap នៅថ្ងៃទី៣ ខែមករានេះ។ យ៉ាងណាមិញ គេមិនទាន់ដឹងពីមូលហេតុនៃការភៀសខ្លួននេះទេ ឬក៏ប្រទេសទីបីណាមួយដែរ។
លោក Jo Song-gil ភារធារីស្ថានទូតកូរ៉េខាងជើងប្រចាំរដ្ឋធានីរ៉ូម បានដាក់ស្នើសុំការការពារសន្តិសុខផ្ទាល់ខ្លួនពីសំណាក់រដ្ឋាភិបាលអុីតាលីកាលពីដើមខែធ្នូ ឆ្នាំ២០១៨ ខណៈលោកកំពុងស្នើសុំសិទ្ធិជ្រកកោនពីប្រទេសមួយទៀត។ នេះជាករណីរត់ភៀសខ្លួនមួយទៀតរបស់មន្ត្រីការទូតជាន់ខ្ពស់កូរ៉េខាងជើងនៅឯបរទេស បន្ទាប់ពីករណីចុងក្រោយកើតឡើងក្នុងឆ្នាំ២០១៦ ។
ការស្នើសុំការពារខ្លួនរបស់លោក Jo ដែលជាបច្ចុប្បន្នជាអគ្គរដ្ឋទូតរងរបស់ស្ថានទូតកូរ៉េខាងជើងនោះ ធ្វើឲ្យអាជ្ញាធរអុីតាលីឈឺក្បាលយ៉ាងខ្លាំង និងមិនទាន់មានចំណាត់ការអ្វីទេ តែបានយល់ព្រមតាមសំណើនេះ និងរក្សាសុវត្ថិភាពលោក Jo និងគ្រួសារ។ តាមពិតទៅ ការស្នើសុំការការពារខ្លួន ក៏ជាការចៀសវាងការធ្វើបត្យាប័នទៅកាន់កូរ៉េខាងជើងវិញដែរ ក្នុងករណីដែលក្រុងព្យុងយ៉ាងស្នើទៅរដ្ឋាភិបាលក្រុងរ៉ូមនោះ។
លោក Jo ដែលទៅដល់អុីតាលីក្នុងឆ្នាំ២០១៥ បានក្លាយជាប្រេសិតកូរ៉េខាងជើងក្នុងឆ្នាំ២០១៧ បន្ទាប់ពីរដ្ឋាភិបាលក្រុងរ៉ូមបណ្ដេញអគ្គរដ្ឋទូតកូរ៉េខាងជើង Mun Jong-nam ទៅស្រុកវិញ ជាការឆ្លើយតបនឹងការសាកល្បងនុយក្លេអ៊ែរ។ លោក Jo ទំនងជាមានគ្រួសារជាមន្ត្រីជាន់ខ្ពស់ក្នុងរបបដឹកនាំក្រុងព្យុងយ៉ាង ព្រោះលោកអាចនាំគ្រួសារទៅបរទេសបាន។ បើតាមប្រពភពព័ត៌មានដដែល មន្ត្រីទូតរូបនេះអាចសម្រេចចិត្តភៀសខ្លួន បន្ទាប់កោះហៅឲ្យត្រឡប់ទៅកូរ៉េខាងជើងវិញ។
ការរត់ភៀសខ្លួនរបស់មន្ត្រីការទូតកូរ៉េខាងជើង ជារឿងកើតមានញឹកញយ។ ករណីដូចគ្នានេះកើតឡើងចុងក្រោយនៅឆ្នាំ២០១៦ ដោយលោក Thae Yong-ho អគ្គរដ្ឋទូតរងប្រចាំអង់គ្លេសសុំសិទ្ធិជ្រកកោននៅកូរ៉េខាងត្បូង។ ដើម្បីបង្ការការរត់ចោលជួរនេះ របបដឹកនាំកូរ៉េខាងជើងតែងតែរក្សាទុកសមាជិកគ្រួសាររបស់មន្ត្រីទូតធ្វើការនៅបរទេសដូចជាប្រពន្ធ ឬកូន ដើម្បីធ្វើធានាថា ពួកគេនឹងត្រឡប់ចូលស្រុកវិញ។
យ៉ាងណាមិញ មកទល់ពេលនេះ គេមិនទាន់ច្បាស់ថា លោក Jo សុំសិទ្ធិជ្រកកោណនៅប្រទេសណាដែរ ឬក៏ទៅកូរ៉េខាងត្បូងដូចលោក Thae ដែរ ឯមន្ត្រីកូរ៉េខាងត្បូងអះអាងថា ខ្លួនមិនដឹងពីការស្នើសុំនេះឡើយ៕
Tag:
កូរ៉េខាងជើង
អុីតាលី
© រក្សាសិទ្ធិដោយ thmeythmey.com