អន្តរជាតិ
រដ្ឋមន្ត្រីការបរទេសអង់គ្លេស៖ អង់គ្លេសនឹងនៅតែខ្លាំង ទោះចេញពីអឺរ៉ុបក្ដី
× រដ្ឋមន្ត្រីការបរទេសអង់គ្លេស ជេរ៉េមី ហាន់ (Jeremy Hunt) នៅថ្ងៃទី២ ខែមករា បង្ហាញជំហរសុទិដ្ឋិនិយមចំពោះអនាគតរបស់អង់គ្លេសក្រោយការចាកចេញពីសហភាពអឺរ៉ុប។ ថ្លែងក្នុងកម្មវិធីមួយនៅឯទីក្រុងឡុងដ៏ លោក ហាន់ និយាយថា អង់គ្លេសនៅតែមានចំណុចខ្លាំងដែលមិនអាចមើលរំលង និងតួនាទីលើឆាកអន្តរជាតិដដែល ទោះជាមិនត្រូវបានគេចាត់ទុកជាមហាអំណាចក្ដី។ ខណៈអង់គ្លេសជិតចាកចេញពីអឺរ៉ុបនោះ មន្ត្រីរូបនេះអះអាងថា អង់គ្លេសមានរឿងច្រើនដែលអាចរៀនសូត្រពីសិង្ហបុរី។
អង់គ្លេសគ្មានងារជាមហាអំណាច ឬមានទឹកដីធំទូលាយឡើយ តែអង់គ្លេសក៏មិនអន់ដែរ។ នេះជាលើកឡើងរបស់លោក ជេរ៉េមី ហាន់ ក្នុងវេទិកាការទូតដែលរៀបចំឡើងវិទ្យាស្ថានអន្តរជាតិសម្រាប់ការសិក្សាយុទ្ធសាស្ត្រនៅថ្ងៃទី២ ខែមករា ។ លោកចង់បានន័យថា អង់គ្លេសនៅតែអាចដើរតួនាទីលើពិភពលោក ទោះជាត្រូវចាប់ផ្ដើមកសាងអនាគតថ្មីក្រោយការចាកចេញពីសហភាពអឺរ៉ុបក៏ដោយចុះ។
ប្រមុខការទូតអង់គ្លេសនៅតែជឿជាក់ថា អង់គ្លេសអាចធ្វើការដោយឯករាជ្យពីសហភាពអឺរ៉ុបបាន ដ្បិតអង់គ្លេសនៅមានអានុភាពយោធា សាច់ដុំសេដ្ឋកិច្ច និងបណ្ដាញការទូតនៅជុំវិញពិភពលោកដែលបំពេញតួនាទីសំខាន់លើឆាកអន្តរជាតិ។ បើតាមទីភ្នាក់ងារព័ត៌មាន AFP ចំពោះមុខអ្នកចូលរួមជាច្រើន លោក ហាន់ ក៏ឆ្លៀតលើកឡើងដែរថា អង់គ្លេសមិនអួតអាងពីខ្លួនឡើយ តែក៏មិនស្រាលសមត្ថភាពរបស់ខ្លួនដែរ។
«អង់គ្លេសមានសេដ្ឋកិច្ចធំជាងគេទី៥ លើពិភពលោក, ជាប្រទេសចំណាយយោធាច្រើនជាងគេក្នុងចំណោមសមាជិកបក្សសម្ព័ន្ធយោធាណាតូ, ជាប្រទេសផ្ដល់ជំនួយបរទេសធំជាងគេទីបីលើលោក, ជាមជ្ឈមណ្ឌលធំមួយក្នុងចំណោមពីរនៃមជ្ឈមណ្ឌលហិរញ្ញវត្ថុអន្តរជាតិ, មានប្រព័ន្ធចារកម្មដ៏មានប្រសិទ្ធភាព និងមានបណ្ដាញការទូតលំដាប់ពិភពលោក ហើយជាសមាជិកអចិន្ត្រៃយ៍ក្រុមប្រឹក្សាសន្តិសុខផងដែរ។» នេះជាការលើកឡើងរបស់លោក ហាន់ ។
តាមគម្រោង អង់គ្លេសនឹងចាកចេញពីសហភាពអឺរ៉ុបនៅថ្ងៃទី២៩ ខែមីនាខាងមុខ ប៉ុន្តែមកទល់ពេលនេះ នៅមិនទាន់កិច្ចព្រមព្រៀងលែងលះនៅទេ ដ្បិតសភាអង់គ្លេសប្រឆាំងកិច្ចព្រមព្រៀងជាមួយសហភាពអឺរ៉ុបរបស់រដ្ឋាភិបាលលោកស្រី ថេរ៉េសា ម៉េយ៍ ។ ការបោះឆ្នោតលើកិច្ចព្រមព្រៀងដដែលនេះ នឹងធ្វើនៅពាក់កណ្ដាលខែមករានេះ។
ខណៈកាលបរិច្ឆេទលែងលះជិតដល់នោះ ប្រមុខការទូតអង់គ្លេសខាងលើក៏ត្រៀមរៀនសូត្រតាមសិង្ហបុរីជុំវិញសមត្ថភាពក្នុងការបើកចំហសម្រាប់ពិភពលោកខាងក្រៅក្រោយពេលបានឯករាជ្យក្នុងឆ្នាំ១៩៦៥។ សម្រាប់លោក ហាន់ មិនមែនជោគជ័យរបស់សិង្ហបុរី សុទ្ធតែជាមេរៀនឡើយ តែអង់គ្លេសអាចដកស្រង់បទពិសោធដូចជាការគុណភាពអប់រំ ការវិនិយោគរយៈពេលវែងលើហេដ្ឋារចនាសម្ព័ន្ធ និងយុទ្ធសាស្ត្ររក្សាការប្រកួតប្រជែងជាដើម៕
Tag:
Brexit
អង់គ្លេស
សិង្ហបុរី
Jeremy Hunt
© រក្សាសិទ្ធិដោយ thmeythmey.com