អាមេរិក ជជែកជាមួយតួកគីពីវាសនាក្រុមឃើដនៅស៊ីរី

អន្តរជាតិ

អាមេរិក ជជែកជាមួយតួកគីពីវាសនាក្រុមឃើដនៅស៊ីរី

04, Jan 2019 , 8:59 pm

រូបភាព

ដោយ: តន ចាន់រិទ្ធារ៉ា

សហរដ្ឋអាមេរិក កំពុងពិភាក្សាជាមួយរដ្ឋាភិបាលតួកគីជុំវិញវាសនារបស់ក្រុមឃើដនៅស៊ីរី ដែលប្រឈមមុខនឹងប្រតិបត្តិការយោធារបស់ក្រុងអង់ការ៉ា។ ខណៈអាមេរិកត្រៀមដកខ្លួនចេញពីស៊ីរីនោះ កសកម្មជនឃើដស៊ីរីក៏អស់បង្អែកការពារខ្លួន ដែលនោះជាឱកាសរបស់តួកគីក្នុងការបោសសម្អាតក្រុមនេះ ក្រោមហេតុផលថា មានទំនាក់ទំនងជាមួយក្រុមឃើដតួកគីដែលជាក្រុមឧទ្ទាមខុសច្បាប់។

រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ នៅថ្ងៃទី៣ ខែមករា កំពុងស្វែងរកការធានាពីតួកគី ដែលប្រុងបើកយុទ្ធនាការយោធាក្នុងទឹកដីស៊ីរីដែលកាន់កាប់ដោយក្រុមឃើដស៊ីរី។ ក្រោយប្រធានាធិបតី ដូណាល់ ត្រាំ ប្រកាសដកទ័ពពីស៊ីរីដ៏គួរឲ្យភ្ញាក់ផ្អើលនោះ តួកគី ក៏ប្រមូលកម្លាំងយោធាជាច្រើននៅក្បែរព្រំដែនជាមួយស៊ីរី ដោយមានក្រុមឃើដជាគោលដៅដែលត្រូវកម្ចាត់ចោល។ ការណ៍នេះធ្វើឲ្យក្រុមឃើដដែលជាសម្ព័ន្ធមិត្តរបស់អាមេរិក បារម្ភពីអនាគតយ៉ាងខ្លាំង។

ដ្បិតបារម្ភពីគ្រោះថ្នាក់ដោយកម្លាំងតួកគី ក្រុមឃើដក៏ស្នើសុំជំនួយពីទាហានរដ្ឋាភិបាលក្រុងដាម៉ាស់ ហើយទាហានស៊ីរីចូលក្នុងទីក្រុង Manbij នៅថ្ងៃទី២៨ ខែធ្នូ តាមសំណើ។ Manbij ជាមូលដ្ឋានរបស់ក្រុមឃើដ YPG ដែលជាកម្លាំងស្នូលរបស់សម្ព័ន្ធចម្រុះក្នុងការបោសសម្អាតក្រុមជ្រុលនិយមរដ្ឋឥស្លាម។ វត្តមានយោធាស៊ីរី ក៏បង្កើតទៅជាតំបន់ទ្រនាប់រវាងកម្លាំងឃើដ និងក្រុមសកម្មជនដែលគាំទ្រដោយតួកគីក្នុងទីក្រុងភាគខាងជើងមួយនេះ។

ក្នុងកិច្ចសម្ភាសជាមួយវេបសាយព័ត៌មាន Newsmax លោក ប៉ុមប៉េអូ និយាយថា អាមេរិកនឹងឲ្យតួកគីធានាថា ខ្លួននឹងមិនសម្លាប់រង្គាលជនជាតិឃើដឡើយ ហើយការពារសិទ្ធិជនជាតិភាគតិចនៅទឹកដីស៊ីរីផងដែរ។ លោកបន្តថា វានៅតែជាផ្នែកមួយក្នុងគោលដៅនៃបេសកកម្មរបស់យោធាអាមេរិកនៅស៊ីរីដែល ទោះជាអាមេរិកដកទ័ពក្ដី។

ប្រធានាធិបតីតួកគី តៃយីប អ៊ែរដូហ្កាន់ បានប្រកាសហើយថា តួកគីនឹងកម្ចាត់ឲ្យអស់ក្រុមសកម្មជនឃើដ YPG ដែលលោកអះអាងថា ជាខ្សែបណ្ដាញរបស់បក្សពលករឃើដ (KKK) ដែលអុកឡុកតួកគីតាំងពិឆ្នាំ១៩៨៤ មក។ មេដឹកនាំតួកគីក៏បានព្រមានប្រទេសមួយចំនួនដែលចង់ការពារក្រុមឃើដក្នុងកាលៈទេសៈនេះផងដែរ ដ្បិតវាជាឱកាសល្អសម្រាប់ទីក្រុងអង់ការ៉ាក្នុងការលុបបំបាតការគំរាមកំហែងលើសន្តិសុខរបស់ខ្លួន។

យ៉ាងណាមិញ បើតាមទីភ្នាក់ងារព័ត៌មាន AFP រដ្ឋាភិបាលស៊ីរីនិយាយថា ក្រុមអ្នកប្រយុទ្ធឃើដបានចាកចេញពីទីក្រុងនៅជាប់ព្រំដែនតួកគីនេះទៅហើយ ក្រោយទទួលដំណឹងនៃគម្រោងដកទ័ពរបស់អាមេរិក។ បច្ចុប្បន្ន ក្រុមឃើដ YPG កំពុងប្រយុទ្ធនឹងក្រុមរដ្ឋឥស្លាមនៅមូលដ្ឋានសេសសល់ក្បែរព្រំដែនអ៊ីរ៉ាក់ បន្ទាប់ពីបានជួយក្រុមអន្តរជាតិក្នុងការកម្ទេចមូលដ្ឋានធំៗរបស់ក្រុមជ្រុលនិយមមួយនេះនៅស៊ីរីរួចមកនោះ៕