អន្តរជាតិ
ការបោះឆ្នោតនៅថៃ អាចលើកពេលជាថ្មីទៀត ឧបនាយករដ្ឋមន្រ្តីថៃ Wissanu Krea-ngam
× មន្ត្រីជាន់ខ្ពស់រដ្ឋាភិបាលថៃ នៅថ្ងៃទី៣ ខែមករា និយាយថា ការបោះឆ្នោតទូទៅដែលគ្រោងធ្វើនៅថ្ងៃទី២៤ ខែកុម្ភៈ អាចនឹងត្រូវលើកពេល ដើម្បីធានាថា ដំណើរការបោះឆ្នោតនឹងមិនជាន់គ្នានឹងការរៀបចំពិធីឡើងគ្រងរាជ្យសម្បត្តិរបស់មហាក្សត្រ មហា វជិរាលង្ករណ៍ ឡើយ។ យ៉ាងណាមិញ ឧបនាយករដ្ឋមន្ត្រី Wissanu Krea-ngam អះអាងថា កាលបរិច្ឆេទបោះឆ្នោត នឹងមិនហួសពីថ្ងៃទី៩ ខែឧសភា ហើយពេលវេលាជាក់ស្ដែង គឺគណៈកម្មការរៀបចំការបោះឆ្នោតជាអ្នកសម្រេច។
ការកំណត់ថ្ងៃរៀបចំពិធីរាជាភិសេកមហាក្សត្រ មហា វជិរាលង្ករណ៍ នៅខែឧសភា កំពុងធ្វើឲ្យរដ្ឋាភិបាលយោធា និងគណៈកម្មការរៀបចំការបោះឆ្នោតរបស់ថៃ ជួបបញ្ហាធំពិបាកសម្រេចចិត្ត។ នោះក៏ព្រោះតែដំណើរការក្រោយការបោះឆ្នោតដែលគ្រោងរៀបចំនៅថ្ងៃទី២៤ ខែកុម្ភៈ បែរជាជាន់គ្នានឹងដំណើរការពិធីឡើងគ្រងរាជ្យរបស់ស្ដេចរាមាទី១០ ទៅវិញ។ ទាំងរដ្ឋាភិបាល ទាំងគណៈកម្មការរៀបចំការបោះឆ្នោតរបស់ថៃ កំពុងជជែកគ្នាថា ត្រូវធ្វើយ៉ាងណា។
ក្នុងជំនួបជាមួយគណៈកម្មការរៀបចំការបោះឆ្នោត ឧបនាយករដ្ឋមន្ត្រីថៃ Wissanu Krea-ngam បានរាយការណ៍ពីកម្មវិធីសម្រាប់ពិធីអភិសេកមហាក្សត្រ ដែលត្រូវធ្វើបីថ្ងៃ គឺទី៤ដល់ទី៦ ខែឧសភាខាងមុខ។ ប៉ុន្តែកម្មវិធីមុន និងក្រោយពិធីដ៏គគ្រឹកគគ្រេងនេះ ត្រូវចំណាយពេលច្រើនថ្ងៃដែរ ដែលនេះអាចជាន់គ្នានឹងកម្មវិធីក្រោយការបោះឆ្នោត។ ទោះជាយ៉ាងណា លោក Krea-ngam សង្កត់ធ្ងន់ថា ការបោះឆ្នោតនឹងធ្វើមុនពិធីគ្រងរាជ្យ។
តាមច្បាប់រដ្ឋធម្មនុញ្ញថៃ ការបោះឆ្នោតត្រូវធ្វើអំឡុងពេល១៥០ថ្ងៃក្រោយច្បាប់បម្រើការបោះឆ្នោតចូលធរមាន ខណៈច្បាប់ទាំងនេះចាប់ផ្ដើមអនុវត្តនៅថ្ងៃទី១១ធ្នូ ឆ្នាំ២០១៨មកនោះ ការបោះឆ្នោតមិនត្រូវធ្វើហួសពីថ្ងៃទី៩ ខែឧសភា ឆ្នាំ២០១៩ ឡើយ។ ប៉ុន្តែច្បាប់ថៃក៏តម្រូវឲ្យការបោះឆ្នោតធ្វើនៅថ្ងៃអាទិត្យទៅទៀត ដូចនេះការបោះឆ្នោតត្រូវរៀបចំឲ្យបានមុនថ្ងៃទី៥ ខែឧសភាវិញ។ រដ្ឋធម្មនុញ្ញថៃ ក៏កំណត់ពេល៦០ថ្ងៃឲ្យមានការប្រកាសលទ្ធផលផ្លូវការដែរ។
បើអនុវត្តតាមកាលបរិច្ឆេទនេះ ហើយគណៈកម្មការរៀបចំការបោះឆ្នោតយកថ្ងៃទី២៤ ខែកុម្ភៈ ជាថ្ងៃបោះឆ្នោតនោះ ដំណើរការក្រោយការបោះឆ្នោត ពិតជាជាន់គ្នានឹងកម្មវិធីគ្រងរាជ្យមិនខាន ដ្បិតការប្រកាសលទ្ធផលត្រូវធ្វើនៅថ្ងៃទី២៤ ខែមេសា។ នេះជាការពន្យល់របស់លោក Krea-ngam ដែលបន្តថា តាមកាលកំណត់នេះ មហាក្សត្រថៃត្រូវធ្វើជាអធិបតីក្នុងពិធីបើកកិច្ចប្រជុំសភានៅថ្ងៃទី៩ ខែឧសភា គឺបីថ្ងៃក្រោយការគ្រងរាជ្យផ្លូវការ ខណៈព្រះអង្គក៏នឹងមានកម្មវិធីច្រើនទៀតដូចគ្នាដែរ។
ខណៈព្រឹត្តិការណ៍សំខាន់ពីរកើតឡើងព្រមគ្នាបែបនេះ ឧបនាយករដ្ឋមន្ត្រីថៃរូបនេះបញ្ជាក់ថា រដ្ឋាភិបាល និងគណៈកម្មការរៀបចំការបោះឆ្នោតកំពុងសម្រេចថា កម្មវិធីណាខ្លះដែលជាន់គ្នា។ លោកបន្ថែមថា ពេលរបបយោធាកំណត់ថ្ងៃបោះឆ្នោតថ្ងៃទី២៤ ខែកុម្ភៈ ឆ្នាំ២០១៩ នោះ រដ្ឋាភិបាលមិនដឹងពីកាលបរិច្ឆេទគ្រងរាជ្យឡើយ។ កម្មវិធីគ្រងរាជ្យមិនអាចលើកពេលបានទេ ឯសកម្មភាពតម្រូវដោយច្បាប់ក៏មិនអាចអូសបន្លាយបានដែរ ដូចនេះអាចពន្យារពេលការបោះឆ្នោតដើម្បីកុំឲ្យជាន់គ្នានឹងពិធីរបស់មហាក្សត្រ។
ទំនងចង់យករួចខ្លួនពីការរិះគន់ទាំងឡាយ លោក Krea-ngam ដែលទទួលបន្ទុកកិច្ចការច្បាប់នោះ បានទុកឲ្យគណៈកម្មការរៀបចំការបោះឆ្នោត ជាអ្នកសម្រេចចិត្តទៅចុះថា ត្រូវបោះឆ្នោតថ្ងៃណា។ ដោយសារដំណើរការបោះឆ្នោតមានច្រើនដំណាក់កាលបែបនេះ កាលបរិច្ឆេទបោះឆ្នោតថ្មី អាចលើកដល់ថ្ងៃទី២៤ ខែមីនាវិញ ព្រោះដើម្បីទុកពេលឲ្យគណៈកម្មការនេះមានពេលគ្រប់គ្រាន់រៀបចំផង និងបញ្ចៀសការជាន់កម្មវិធីគ្នាផង៕
Tag:
ថៃ
Maha Vajiralongkorn
ការបោះឆ្នោត
© រក្សាសិទ្ធិដោយ thmeythmey.com