ជាតិ
ឱកាសល្អ!សេដាក បើកវគ្គបណ្ដុះបណ្ដាលស្ដីពី«អធិការកិច្ច និងការបញ្ជាក់វិញ្ញាបនបត្រកសិកម្មសរីរាង្គ»
×![]()
ភ្នំពេញ៖ មជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា (អង្គការសេដាក) នឹងរៀបចំវគ្គបណ្ដុះបណ្ដាល និងហាត់ការងារ ស្ដីពី «អធិការកិច្ច និងការបញ្ជាក់វិញ្ញាបនបត្រកសិកម្មសរីរាង្គ» ដល់អ្នកដែលស្រឡាញ់នឹងការងារកសិកម្មសរីរាង្គ។ វគ្គបណ្ដុះបណ្ដាលនេះ មាន២ជំហាន ដែលចាប់ផ្ដើមពីថ្ងៃទី ២១ មករា ដល់ថ្ងៃទី ០២ មេសាខាងមុខនេះ។
ដើម្បីរួមចំណែកអភិវឌ្ឍន៍សុវត្ថិភាពចំណីអាហារ និងកសិករទទួលបានការបញ្ជាក់វិញ្ញាបនបត្រកសិកម្មសរីរាង្គកាន់តែច្រើន អង្គការសេដាក នឹងរៀបចំវគ្គបណ្ដុះបណ្ដាលនិងហាត់ការងារ ស្ដីពី «អធិការកិច្ច និងការបញ្ជាក់វិញ្ញាបនបត្រកសិកម្មសរីរាង្គ»។ បើតាមលោកស្រី តុង ចាន់ធាង នាយិកាអង្គការ វគ្គបណ្ដុះបណ្ដាលនេះ សេដាក ចង់បណ្ដុះបណ្ដាលធនធានមនុស្សឲ្យមានជំនាញក្នុងការបញ្ជាក់គុណភាពកសិកម្មសរីរាង្គ។ នាយិការូបនេះ បន្តថា កន្លងមក មានមនុស្សតិចណាស់ ដែលធ្វើការទាក់ទងនឹងរឿងនេះ ដោយសេដាកចង់ពង្រីកការងារនេះឲ្យបានច្រើនដល់កសិករ។
លោកស្រី តុង ចាន់ធាង បញ្ជាក់ថា វគ្គបណ្ដុះបណ្ដាលនេះ នឹងទទួលយុវជន និងពលរដ្ឋប្រមាណ ១៥នាក់។ នាយិកាអង្គការសេដាករូបនេះ រំពឹងថា អ្នកចូលរួមនឹងមានសមត្ថភាព និងជំនាញពិតប្រាកដ ក្នុងការធ្វើកិច្ចការត្រួតពិនិត្យកសិកម្មសរីរាង្គរបស់កសិករ។
វគ្គបណ្ដុះបណ្ដាលនេះ មាន២ជំហាន ដោយជំហានទី១ ពីថ្ងៃទី ២១ មករា ដល់ថ្ងៃទី ០២ កុម្ភៈ នៅភោជនីយដ្ឋានអូក្រា សិក្សាពីគោលការណ៍ និងស្ដង់ដារកសិកម្មសរីរាង្គ រួមទាំងការរៀបចំឯកសារពាក់ព័ន្ធក្នុងកសិកម្មសរីរាង្គ។ ជំហានទី២ ពីថ្ងៃទី ០៧ កុម្ភៈ ដល់ថ្ងៃទី ០២ មេសា សិក្ខាកាម នឹងចុះអនុវត្តការងារអធិការកិច្ចនៅតាមកសិដ្ឋានគោលដៅ។
តាមរយៈវគ្គបណ្ដុះបណ្ដាលនេះ អ្នកចូលរួមនឹងទទួលបានអត្ថប្រយោជន៍ជាច្រើន រួមមាន ទទួលបានប្រាក់ឧបត្ថម្ភថវិកាសម្រាប់ អាហារ ការស្នាក់នៅ និងការធ្វើដំណើរ, វិញ្ញាបនបត្រ និងឱកាសការងារជាមួយអង្គការសេដាកផងដែរ។ លក្ខខណ្ឌក្នុងការចូលរួម បេក្ខជនទាំងពីរភេទ ត្រូវមានបរិញ្ញាបត្រជំនាញកសិកម្ម សេដ្ឋកិច្ចអភិវឌ្ឍន៍ ឬជំនាញដែលពាក់ព័ន្ធ, មានឆន្ទៈចាប់យកអាជីពក្នុងវិស័យកសិកម្មសរីរាង្គ និងអាចចូលរួមវគ្គបណ្ដុះបណ្ដាលពីដើមដល់ចប់។
បេក្ខជនដែលមានចំណាប់អារម្មណ៍ចូលរួមវគ្គបណ្ដុះបណ្ដាលនេះ អាចដាក់ពាក្យពីថ្ងៃជូនដំណឹងរហូតដល់ថ្ងៃទី ១៧ មករា តាមអាសយដ្ឋាន ផ្ទះលេខ ១៥១ ផ្លូវ ៥៩២ សង្កាត់បឹងកក់២ ខណ្ឌទួលគោក រាជធានីភ្នំពេញ ឬតាមលេខទូរសព្ទ ០៨៦ ៥១១ ៤៧៨/ ០៧៧ ៦៧១ ៥៧១ និង ០១២ ៨៦៩ ៤៤៣៕
Tag:
កសិកម្ម
កសិករ
សរីរាង្គ
សេដាក
© រក្សាសិទ្ធិដោយ thmeythmey.com
