សេដាក ជំរុញកសិករអាស៊ានឲ្យដាំកាហ្វេសរីរាង្គ ដោយចាប់ផ្តើមពីកម្ពុជា និងឡាវ

ជាតិ

សេដាក ជំរុញកសិករអាស៊ានឲ្យដាំកាហ្វេសរីរាង្គ ដោយចាប់ផ្តើមពីកម្ពុជា និងឡាវ

13, Jan 2019 , 1:59 pm

រូបភាព

ដោយ: ញឹក ស្រីល័ក្ខ (Nhek Sreyleak)

ខេត្តចម្ប៉ាសាក់ (ឡាវ)៖ អង្គការសេដាក មានបំណងលើកកម្ពស់ និងសហការជាមួយកសិករនៅតំបន់មេគង្គ, តំបន់អាស៊ាន dដោយផ្ដោតលើផលិតផលកាហ្វេសរីរាង្គ។ ក្នុងបទសម្ភាសជាមួយសារព័ត៌មានថ្មីៗនៅខេត្តចម្ប៉ាសាក់ លោកបណ្ឌិត យ៉ង សាំងកុមារ បញ្ជាក់ថា សេដាក ចង់លើកកម្ពស់កសិករអាស៊ានឲ្យដាំកាហ្វេសរីរាង្គ ដោយចាប់ផ្ដើមពីកសិករនៅមណ្ឌលគិរី និងកសិករនៅចម្ប៉ាសាក់។ បន្ថែមលើនេះ ជាបណ្ដើរៗសេដាក នឹងពង្រីកកសិករ រួមទាំងកសិផលផងដែរ។

ក្នុងដំណើរទស្សនកិច្ចទៅកាន់ប្រទេសឡាវ កាលពីថ្ងៃទី២៦-២៩ធ្នូកន្លងទៅ ក្រុមការងារសេដាក, ក្រុមតំណាងកាហ្វេសរីរាង្គ, អ្នកផលិតកសិផលសរីរាង្គ និងអ្នកសារព័ត៌មាន បានទៅទស្សនាចម្ការកាហ្វេ Arabica របស់ជនជាតិឡាវនៅខេត្តចម្ប៉ាសាក់។ ក្នុងចម្ការកាហ្វេប្រមាណ ៣ហិកតានេះ បានដាំដុះកាហ្វេតាមបែបកសិ-រុក្ខកម្ម ដែលមានដំណាំចម្រុះក្នុងចម្ការតែមួយ។ លោកបណ្ឌិត យ៉ង សាំងកុមារ លើកឡើងយ៉ាងដូច្នេះ៖ «ខ្ញុំមានអារម្មណ៍ប្លែក ដោយសារកសិករនៅទីនេះដាំកាហ្វេជាមួយដំណាំចម្រុះ ដែលអនុលោមតាមស្ដង់ដារសរីរាង្គ។ ហើយវាជាកន្លែងល្អមួយ ដែលកសិករអាចមករៀនសូត្របាន»។

ស្ថាបនិកអង្គការសេដាករូបនេះ បញ្ជាក់ថា៖ «អង្គការសេដាក ចង់លើកកម្ពស់ និងសហការជាមួយកសិករនៅតំបន់មេគង្គ និងតំបន់អាស៊ាន ផ្ដោតលើផលិតផលកាហ្វេសរីរាង្គ ហើយចាប់ផ្ដើមពីកសិករនៅមណ្ឌលគិរី និងកសិករនៅចម្ប៉ាសាក់»។ មួយវិញទៀត ដោយសារការនិយមបរិភោគកាហ្វេមានការកើនឡើង ទើបសេដាក ជួយសម្របសម្រួលនិងសហការជាមួយកសិករឡាវ ក្នុងការនាំចូលកាហ្វេដែលមានប្រភពច្បាស់លាស់ ជាពិសេសគោលការណ៍សរីរាង្គ។ ទន្ទឹមនឹងនេះ សេដាក ក៏មានបំណងផ្សារភ្ជាប់ការសហការគ្នារវាងកសិករខ្មែរ និងកសិករឡាវ ដើម្បីរៀនសូត្រពីគ្នាទៅវិញទៅមក ដែលឈានទៅបង្កើតសមាគមឆ្លងប្រទេសផងដែរ។ នេះបើតាមលោកបណ្ឌិត យ៉ង សាំងកុមារ។

សូមអញ្ជើញទស្សនាបទសម្ភាសរវាងកញ្ញា ញឹក ស្រីល័ក្ខ អ្នកសារព័ត៌មាន ThmeyThmey ជាមួយលោកបណ្ឌិត យ៉ង សាំងកុមារ ស្ថាបនិកអង្គការសេដាកនៅក្នុងចម្ការកាហ្វេនាខេត្តចម្ប៉ាសាក់ ប្រទេសឡាវ ដូចតទៅ៖

សូមអញ្ជើញទស្សនាបទសម្ភាសរវាងកញ្ញា ញឹក ស្រីល័ក្ខ អ្នកសារព័ត៌មាន ThmeyThmey ជាមួយលោកបណ្ឌិត យ៉ង សាំងកុមារ ស្ថាបនិកអង្គការសេដាកនៅក្នុងចម្ការកាហ្វេនាខេត្តចម្ប៉ា

អង្គការសេដាក បានលើកកម្ពស់កាហ្វេសរីរាង្គ Robusta នៅខេត្តមណ្ឌលគិរី និងកាហ្វេ Arabica នៅខេត្តចម្ប៉ាសាក់ ដែលអំណោយផលលើដំណាំកាហ្វេ។ លោកបណ្ឌិត យ៉ង សាំងកុមារ បញ្ជាក់ថា កសិករជនជាតិឡាវបានឯកភាពជាមួយអង្គសេដាក ដោយសេដាក នឹងបញ្ជូនអ្នកជំនាញមកត្រួតពិនិត្យ ក្នុងការកំណត់ស្ដង់ដារសរីរាង្គសេដាក ដែលឈានដល់ស្ដង់ដារអន្តរជាតិ។

អត្ថបទទាក់ទង

សេដាក គ្រោងផ្សារភ្ជាប់កាហ្វេ Arabica របស់កសិករឡាវ មកបំពេញទីផ្សារកម្ពុជា

កសិករឡាវដាំកាហ្វេបែបកសិ-រុក្ខកម្ម បង្កើនជីវជាតិដី និងទិន្នផលកាន់តែច្រើន

នាយិកាអង្គការសេដាក ចង់ឲ្យកសិករខ្មែររៀនសូត្រពីបច្ចេកទេសដាំកាហ្វេពីកសិករឡាវ

«Paksong High Land» ជាចម្ការកាហ្វេទាក់ទាញភ្ញៀវទេសចរឲ្យចូលហូបកាហ្វេ និងថតរូបកម្សាន្ត

ខេត្តចម្ប៉ាសាក់ នៅឡាវ និងមណ្ឌលគិរី នៅកម្ពុជា ជាទីតាំងអំណោយផលល្អបំផុតសម្រាប់ដំណាំកាហ្វេ

សេដាក នាំកសិករ, អ្នកជំនួញ និងអ្នកកាសែតសិក្សាពីដំណាំកាហ្វេសរីរាង្គនៅប្រទេសឡាវ

សូមបញ្ជាក់ថា ខេត្តមណ្ឌលគិរី បានអំណោយផលលើកាហ្វេប្រភេទ Robusta ចំណែកខេត្តចម្ប៉ាសាក់ប្រទេសឡាវវិញ បានអំណោយផលកាហ្វេប្រភេទ Arabica ដែលត្រូវការអាកាសធាតុត្រជាក់ក្នុងរយៈកម្ពស់ជាង១២០០ម៉ែត្រ។ ក្នុងខេត្តចម្ប៉ាសាក់នេះ ប្រជាពលរដ្ឋនិយមដាំកាហ្វេ Arabica ៥ប្រភេទដូចជា Arabica ទីវីកា, Arabica ចាកា, Arabica កាទួយ, Arabica កាទីម័រ និង Arabica កាតូរ៉ា៕