កីឡាអន្តរជាតិ
អន្តរជាតិ
De Gea សង្គ្រោះបាល់១១លើកក្នុងជ័យជម្នះ ១-០ របស់ Man Utd លើ Spurs
× អ្នកចាំទីអេស្ប៉ាញ David De Gea ក្លាយកីឡាករឆ្នើមប្រចាំការប្រកួតនាជ័យជម្នះ ១-០ លើទឹកដីរបស់ Tottenham Hotspur ក្នុងក្របខណ្ឌ English Premier League កាលពីយប់ថ្ងៃអាទិត្យ។ Marcus Rashford ជាសម្រេចបានបញ្ចូលទីនៅចុងតង់ទីមួយ ក្រោយការបញ្ជូនរបស់ Paul Pogba ខណៈ De Gea បានរារាំងបាល់ចំគោលដៅរហូតដល់ទៅ១១លើក ដើម្បីរក្សាលទ្ធផល ១-០ រហូតដល់បញ្ចប់ការប្រកួត។
ការសង្គ្រោះបាល់ដល់ទៅ១១លើករបស់ De Gea ជាកំណត់ត្រាលើកដំបូងបំផុតនៅក្របខណ្ឌកំពូលរបស់អ្នកចាំទីរូបនេះ ក្នុងជ័យជម្នះ ដោយគ្មានការធ្លាយគ្រាប់បាល់មកវិញ។ តែទោះយ៉ាងណា កាលពីជ័យជម្នះ ៣-១ នៅទឹកដី Arsenal កាលពីថ្ងៃទី២ ខែធ្នូ ឆ្នាំ២០១៧ De Gea បានសង្គ្រោះបាល់ចំនួន១៤លើកផងដែរ។
លទ្ធផល ១-០ លើមាន់ខ្នាយមាស បាននាំឲ្យបិសាចក្រហមទទួលបាន៤១ពិន្ទុស្មើ Arsenal គិតត្រឹមសប្តាហ៍២២។ មុនពេលដែលលោក Ole Gunnaer Solskjaer ចូលដឹកនាំជាគ្រូបង្វឹកបណ្តោះអាសន្ន បិសាចក្រហមតាមពីក្រោយកាំំភ្លើងធំរហូតដល់៨ពិន្ទុ។
នេះជាជ័យជម្នះ៦លើកជាប់គ្នាផងដែររបស់ Man Utd ក្រោមការដឹកនាំរបស់លោក Solskjaer ដោយ៥លើកក្នុង Premier League និង១លើកក្នុង FA Cup។ ជាមួយគ្នានេះ Paul Pogba បន្តលេចធ្លោ ដោយរួមចំណែករកគ្រាប់បាល់បញ្ចូលទីរហូតដល់៨គ្រាប់ (ស៊ុតចូល៤ និង Assists ៤)៕
© រក្សាសិទ្ធិដោយ thmeythmey.com