ជាតិ
នយោបាយជាតិ
សម្ដេច ហេង សំរិន៖ ការលើកកម្ពស់សមភាពយេនឌ័រ រួមចំណែកឱ្យមានសន្ដិភាព និងការអភិវឌ្ឍ សម្តេច ហេង សំរិន ប្រធានរដ្ឋសភា
× សៀមរាប៖ កិច្ចប្រជុំសមាជិកសភាស្ដ្រី នៃវេទិកាសភាអាស៊ី-ប៉ាស៊ីហ្វិក ជាកិច្ចប្រជុំមួយដែលត្រូវបានរៀបចំធ្វើក្នុងកិច្ចប្រជុំសភាអាស៊ី-ប៉ាស៊ីហ្វិក លើកតី២៧ ដែលធ្វើឡើងរយៈពេល៣ គឺចាប់ពីថ្ងៃទី១៤ ដល់ទី១៦ មករា ឆ្នាំ២០១៩។ កិច្ចប្រជុំសមាជិកសភាស្ដ្រីធ្វើឡើងក្រោមប្រធានបទ «លើកកម្ពស់សមភាពយេនឌ័រ ដើម្បីការអភិវឌ្ឍ»។ ប្រធានរដ្ឋសភាកម្ពុជា បានថ្លែងសុន្ទរកថាបើកកិច្ចប្រជុំនេះ ដែលចាប់ផ្តើមនៅរសៀលថ្ងៃទី១៤។ សម្រាប់សម្ដេច ហេង សំរិន ការលើកកម្ពស់សមភាពយេនឌ័រ បានរួមចំណែកឱ្យសម្រេចបាននូវសន្ដិភាព និងការអភិវឌ្ឍ។
ថ្លែងចំពោះសមាជិកសភាស្ដ្រីមុនបើកកិច្ចប្រជុំ សម្ដេច ហេង សំរិន បានលើកឡើងថា គេមិនអាចសម្រេចបាននូវសន្ដិភាព និងការអភិវឌ្ឍប្រកបដោយចីរភាពបានទេ ប្រសិនបើគេមិនមានអភិក្រម បរិយាប័ន្ន និងប្រសិទ្ធិភាព ដើម្បីលើកតម្កើងសមភាពយេនឌ័រ និងការផ្តល់ភាពអង់អាចដល់ស្ដ្រី និងក្មេងស្រី។ សម្ដេចបន្ថែមដោយយោងតាមរបាយការណ៍របស់អង្គការសហប្រជាជាតិស្ដីពីគោលដៅអភិវឌ្ឍន៍ប្រកបដោយចីរភាពគោលដៅទី៥ ដោយបង្ហាញថា វិសមភាពយេនឌ័របានបន្ដរារាំងស្ដ្រី និងក្មេងស្រី ក្នុងការទទួលសិទ្ធិជាមូលដ្ឋានរបស់ខ្លួន ជាមួយនឹងកាលានុវត្តន៍ភាពនានាដែលឆ្លើយតបនឹងសេចក្តីត្រូវការ និងដំណោះស្រាយសម្រាប់គុណប្រយោជន៍ដល់ស្ដ្រី។
ជាមួយគ្នានេះដែរ ប្រធានរដ្ឋសភាបានបញ្ជាក់ថា ការផ្តល់ភាពអង់អាចផ្នែកសេដ្ឋកិច្ចដល់ គឺជាកត្ដាសំខាន់ក្នុងការជំរុញការអភិវឌ្ឍប្រកបដោយចីរភាព និងបរិយាប័ន្ន។ សម្ដេចបន្ថែមថា ការវិនិយោគលើបញ្ហាសុខភាព ការអប់រំ ការបណ្ដុះបណ្តាលវិជ្ជាជីវៈ ការចូលរួមក្នុងវិស័យសេដ្ឋកិច្ច ការគ្រប់គ្រងចំណូល ការក្លាយជាម្ចាស់ធុរកិច្ចដោយខ្លួនឯង គឺជាការទទួលប្រយោជន៍សម្រាប់សង្គមជាតិទាំងមូល មិនមែនតែស្ដ្រី និងក្មេងស្រីនោះទេ។
គួររម្លឹកថា កិច្ចប្រជុំសមាជិកសភាស្ដ្រី ដែលបានផ្តួចផ្តើមនិងប្រជុំជាលើកដំបូងនៅប្រទេស កាណាដា នាឆ្នាំ២០១៦ លើកទី២នៅប្រទេស ហ្វីជី ក្នុងឆ្នាំ២០១៧ និងលើកទី៣ នៅប្រទេសវៀតណាម ក្នុងឆ្នាំ២០១៨ ហើយបានធ្វើវិសោធនកម្ម អនុម័តឱ្យកិច្ចប្រជុំសមាជិកស្ដ្រីជាផ្លូវការរបស់ APPF ដូចគណៈកម្មការផ្សេងៗទៀត។ កិច្ចប្រជុំនេះ ជាព្រឹត្តិការណ៍ដ៏មានសារសំខាន់ ដែលផ្តោតការយកចិត្តទុកដាក់ខ្ពស់របស់ APPF លើការលើកកម្ពស់សមភាពយេនឌ័រ និងការផ្តល់ភាពអង់អាចដល់ស្ដ្រី និងក្មេងស្រី ដែលជាគោលការណ៍មួយឈានទៅសម្រេចការអភិវឌ្ឍប្រកបដោយចីរភាព៕
Tag:
កិច្ចប្រជុំសភាអាស៊ី-ប៉ាស៊ីហ្វិក
© រក្សាសិទ្ធិដោយ thmeythmey.com