កីឡាអន្តរជាតិ
អន្តរជាតិ
Chhetri ស្ថិតនៅចន្លោះ Ronaldo និង Messi ក្នុងបញ្ជីអ្នករកគ្រាប់បាល់ច្រើនជាងគេឲ្យជម្រើសជាតិ
×![]()
ដោយ: ទេព ពិទូរ្យ
ខ្សែប្រយុទ្ធឆ្មើមរបស់ក្រុមកីឡាបាល់ទាត់ជម្រើសជាតិឥណ្ឌា Sunil Chhetri បានក្លាយជាអ្នកស៊ុតបាល់បញ្ចូលទីឲ្យជម្រើសជាតិច្រើនជាងគេលំដាប់ទី ២ បន្ទាប់ពី Cristiano Ronaldo របស់ព័រទុយហ្គាល់ តែនាំមុខកីឡាករអាហ្សង់ទីន Lionel Messi។
Chhetri ជាអ្នកស៊ុតបញ្ចូលទី ២ គ្រាប់ម្នាក់ឯងក្នុងជំនួបបើកឆាកពូល A ដោយយកឈ្នះថៃ ៤-១ នៃការប្រកួតពានរង្វាន់ AFC Asian Cup 2019 ក្នុងក្រុងអាប៊ុយដាប៊ី ប្រទេសអេមីរ៉ាតអារ៉ាប់រួម។ បើទោះបីមិនអាចនាំឥណ្ឌាឆ្លងផុតវគ្គចែកពូលនៃព្រឹត្តិការណ៍ប្រចាំតំបន់អាស៊ីក្តី ប៉ុន្តែ ២គ្រាប់នោះបានជួយឲ្យសមាជិកក្លិប Bengaluru FC កើនគ្រាប់ស៊ុតដល់ទៅ ៦៧គ្រាប់នាំមុខ Messi សមាជិកក្រុម Barcelona ដែលរកបាន៦៥គ្រាប់សម្រាប់ក្រុមជម្រើសជាតិ។
Cool as you like from @chetrisunil11 pic.twitter.com/FaPfb6eMlB
— #AsianCup2019 (@afcasiancup) January 7, 2019
កីឡាករតែម្នាក់គត់ដែលរកគ្រាប់ស៊ុតបញ្ចូលទីបានច្រើនជាង Chhetri គឺ Ronaldo ។ ខ្សែប្រយុទ្ធឆ្នើមរបស់ Juventus វ័យ៣៤ឆ្នាំ រូបនេះ សម្រេចទីឲ្យជម្រើសជាតិព័រទុយហ្គាល់សរុប៨៥គ្រាប់ឯណោះ។
បើទោះក្លាយជាអ្នករកគ្រាប់បាល់ច្រើនលំដាប់ទី២ក៏ដោយ ប៉ុន្តែខ្សែប្រយុទ្ធវ័យ៣៤ឆ្នាំ ដែលជាប់ជម្រើសជាតិឥណ្ឌាតាំងពីឆ្នាំ២០០៥រូបនេះ មិនហ៊ានយកខ្លួនទៅប្រៀបជាមួយកំពូល Super Star លំដាប់ពិភពលោកទាំងពីរនោះឡើយ។
«មិនមានការប្រៀបធៀបអ្វីទាំងអស់រវាងខ្ញុំនិង Messi ឫ Ronaldo នោះឡើយ ប៉ុន្តែខ្ញុំពិតជាមានកិត្តិយសខ្លាំងណាស់ដែលស្ថិតក្នុងចំណោមអ្នកទាំងពីរ។ ខ្ញុំមិនគិតថាវាជាគ្រាប់បាល់ដែលខ្ញុំរកបានសម្រាប់ប្រទេសរបស់ខ្ញុំនោះទេ។ រាល់ពេលដែលខ្ញុំមានឱកាស គឺខ្ញុំតែងតែព្យាយាមអស់ពីសមត្ថភាពដើម្បីសម្រេចទី»។ Chhetri លើកឡើងដូច្នេះ។
ឥណ្ឌាបានធ្លាក់ចេញពីព្រឹត្តិការណ៍ Asian Cup លើកទី១៧ ត្រឹមវគ្គជម្រុះតាមពូល ដ្បិតរកបាន៣ពិន្ទុ ស្ថិតនៅបាតតារាងពូល A ក្រោយឆ្លងកាត់ការប្រកួតសរុបទាំង៣លើក៕
65 Goals
Tag:
បាល់ទាត់
Sunil Chhetri
Cristiano Ronaldo
Lionel Messi
© រក្សាសិទ្ធិដោយ thmeythmey.com
