ជាតិ
សង្គមជាតិ
សម្តេច ស ខេង៖ សង្គមស៊ីវិល ចូលចិត្តលាបពណ៌លើរដ្ឋាភិបាល រូបពីទំព័រហ្វេសប៊ុកសម្តេច ស ខេង
× អង្គការសង្គមស៊ីវិលខ្លះ បានចោទថា រដ្ឋភិបាល ពុំមានឆន្ទៈ និងភាពស្មោះត្រង់លើភាពជាដៃគូជាមួយខ្លួន។ សង្គមស៊ីវិលខ្លះ បានលើកឡើងថា ខ្លួនស្ថិតក្នុងបញ្ជីខ្មៅរបស់រដ្ឋាភិបាល និងខ្លះទៀត ចោទរដ្ឋាភិបាល ថាមានស្តង់ដារពីរ ក្នុងការអនុវត្តច្បាប់។ នេះជាការលើកឡើងរបស់សម្តេច ស ខេង រដ្ឋមន្ត្រីក្រសួងមហាផ្ទៃ ក្នុងវេទិកាស្តីពីភាពជាដៃគូរវាងរដ្ឋាភិបាល និងអង្គការសង្គមស៊ីវិលលើកទី២ នាព្រឹកថ្ងៃទី១៧ ខែមករា ឆ្នាំ២០១៩។
សម្តេច ស ខេង បានអះអាងថា ការៀបចំឲ្យមានវេទិកាស្តីពីភាពជាដៃគូរវាងរដ្ឋាភិបាល និងអង្គការសង្គមស៊ីវិលនេះ ដើម្បីពង្រឹងសហប្រតិបត្តិការរវាងអង្គការសង្គមស៊ីវិល និងរដ្ឋាភិបាល ក្នុងការកែលម្អ ពិភាក្សាគ្នាឲ្យបានទូលំទូលាយ កុំឲ្យមានការយល់ច្រឡំគ្នាតទៅទៀត។ រដ្ឋមន្ត្រីរូបនេះ បន្តថា កន្លងមក មានអង្គការសង្គមស៊ីវិលមួយចំនួនបានលាបពណ៌លើរដ្ឋាភិបាលថាបានរំលោភសិទ្ធិសេរីភាព មិនមានភាពស្មោះត្រង់ និងប្រើប្រាស់ច្បាប់អង្គការសង្គមស៊ីវិល រារាំងសកម្មភាពខ្លួន និងដាក់ខ្លួនក្នុងបញ្ជីខ្មៅ ជាដើម។
រូបពីទំព័រហ្វេសប៊ុកសម្តេច ស ខេង
សម្តេច ស ខេង បានឆ្លើយតបថា ការចោទប្រកាន់លើរដ្ឋាភិបាលនេះ មិនមានមូលដ្ឋានគ្រឹះត្រឹមត្រូវទេ។ លោក ទទួលស្គាល់ថា កាអនុវត្តកន្លងមក មានចំណុចខ្វះខាត និងចន្លេះប្រហោងពិតមែន ប៉ុន្តែជារួមមិនពិតតាមភាពជាក់ស្ដែងឡើយ។
រដ្ឋមន្ត្រីមហាផ្ទៃ និយាយដូច្នេះថា៖«ខ្ញុំគិតថា ការប្រើពាក្យបែបនេះ ប្រហែលជាធ្ងន់បន្តិច ព្រោះអត់មានឆន្ទៈហើយ បូកនិងមិនស្មោះត្រង់ទៀត។ អត់មានធម៌អីនិយាយទៀត អ៊ីចឹងក្នុងវេទិកាហ្នឹង ខ្ញុំចង់បញ្ជាក់ឲ្យច្បាស់ថា តើពុំមានឆន្ទៈយ៉ាងដូចម្តេច ហើយមិនមានភាពស្មោះត្រង់យ៉ាងដូចម្តេច សូមនិយាយគ្នាឲ្យច្បាស់ បើមិនដូច្នេះទេ ការដាក់បន្ទុកនេះ ពាក្យហ្នឹង វាធ្ងន់ណាស់ ធ្ងន់មែនទែន ស្ទើតែអត់សូន្យ ស្មើសូន្យ។ ខ្ញុំយល់ថា មិនស្របនឹងភាពជាក់ស្តែង ទោះបីថាចន្លេះប្រហោង ចំណុចខ្វះខាតខ្លះ ក្នុងកិច្ចសហប្រតិបត្តិការ វាអាចមាន ដោយអន្លើ តាមតំបន់ តាមទីកន្លែង បើនិយាយជារួមថា រដ្ឋាភិបាលពុំមានឆន្ទៈ និងមិនមានភាពស្មោះត្រង់ អាហ្នឹងប្រែមកថាចប់ហ្មង»។
សម្តេច ស ខេង បានឲ្យដឹងផងដែរថា ច្បាប់ដែលអនុវត្តរាល់ថ្ងៃ គឺបានយកមកពីបណ្ដាប្រទេសជាង២០ ក្នុងពិភពលោក ដែលស្របតាមស្តង់ដារ។ ប៉ុន្តែអង្គការសង្គមស៊ីវិល នៅតែថាមិនទាន់គ្រប់ស្ដង់ដារ។ សម្តេច បន្តថា ច្បាប់នៅកម្ពុជាមានភាពធូររលុង បើធៀបទៅនឹងអាមេរិក។
រដ្ឋមន្ត្រីមហាផ្ទៃ បញ្ជាក់បែបនេះថា៖«ច្បាប់យើង ធូរណាស់ហើយ បើតាមស្ដង់ដារមែនទែន NGO ណាដែលទទួលលុយពីក្រៅប្រទេសនោះ ចាត់ទុកថាជា NGO បរទេស។ តើកម្ពុជាយើងមានទេ... អត់ទេ... អត់ដែលចាត់ទុកបងប្អូនខ្មែរយើងដែលរៀបចំ NGO ហើយអំពាវនាវលុយកាក់ពីក្រៅមក ចាត់ទុកថាជា NGO បរទេសទេ អត់ទេ...នៅក្នុងច្បាប់យើងមិនមានទេ ប៉ុន្តែនៅអាមេរិកមាន បើចង់បានស្ដង់ដារមានតែទៅអ៊ីចឹងដែរ»។
សូមបញ្ជាក់ថា បច្ចុប្បន្ន អង្គការសង្គមស៊ីវិល និងសមាគមដែលក្រសួងមហាផ្ទៃ បានចុះក្នុងបញ្ជី មានជាង៥,០០០អង្គការ៕
© រក្សាសិទ្ធិដោយ thmeythmey.com