គណៈកម្មាធិការអចិន្ត្រៃយ៍នៃអតីតគណបក្សប្រឆាំង បានបើកកិច្ចប្រជុំមួយ នៅសហរដ្ឋអាមេរិក នៅថ្ងៃទី២០ ខែមករា ឆ្នាំ២0១៩ ដើម្បីពិភាក្សាពីការធ្វើមាតុភូមិនិវត្តរបស់លោក សម រង្ស៊ី។ កិច្ចប្រជុំនេះ មានការចូលរួមពីលោក សម រង្ស៊ី ផ្ទាល់តែម្តង និងមន្ត្រីជាន់ខ្ពស់មួយចំនួនទៀត ដូចជា អ្នកស្រី មូរ សុខហួរ លោក អេង ឆៃអ៊ាង លោក និង អ៊ូ ច័ន្ទឫទ្ធិ ជាដើម។
ក្រោយប្រជុំចប់ ពួកគេ ក៏ប្រកាសពីលទ្ធផលនិងសេចក្តីសម្រេច តាមរយៈការផ្សាយផ្ទាល់ (Live) លើបណ្តាញសង្គមហ្វេសប៊ុក។ លោក អេង ឆៃអ៊ាង បានថ្លែងថា ក្នុងចំណោមសេចក្តីសម្រេច ដែលត្រូវបានអនុម័តក្នុងកិច្ចប្រជុំ មានសេចក្តីសម្រេចមួយ ស្តីពីការរៀបចំផែនការនៃការវិលត្រឡប់របស់លោក សម រង្ស៊ី មកកាន់កម្ពុជាវិញ។
ផែនការដ៏សំខាន់ដំបូង គឺការបង្កើតក្រុមការងារ ដើម្បីរៀបចំកម្លាំង ត្រៀមទទួលលោក សម រង្ស៊ី ពេលមកកាន់កម្ពុជា។ នេះការបញ្ជាក់របស់លោក អេង ឆៃអ៊ាង ដោយលោក សង្កត់ធ្ងន់បែបនេះថា៖«ទីមួយ គឺយើង បង្កើតក្រុមការងារ ដើម្បីរៀបចំកម្លាំង ទទួលដំណើរវិលត្រឡប់របស់លោកប្រធាន សម រង្ស៊ី គឺយើង រៀបចំកម្លាំងជាក់ស្តែង»។
លោក បន្តថា ផែនការបន្ទាប់ គឺ ការពង្រីកសកម្មភាពផ្នែកការទូតរបស់អតីតគណបក្សប្រឆាំង ជាមួយសហគមន៍អន្តរជាតិ និងការពង្រីកការផ្សព្វផ្សាយព័ត៌មាន ឲ្យបានកាន់តែខ្លាំង ជុំវិញបញ្ហានានា ដែលបង្កឡើងដោយរដ្ឋាភិបាលកម្ពុជា។ លោក បន្ថែមថា ផែនការចុងក្រោយ គឺការរៀបចំថវិកា សម្រាប់ការវិលត្រឡប់របស់លោក សម រង្ស៊ី។
អតីតមន្ត្រីជាន់ខ្ពស់គណបក្សប្រឆាំងរូបនេះ ប្រកាសយ៉ាងដូច្នេះថា៖«សេចក្តីសម្រេចរបស់គណៈកម្មាធិការអចិន្ត្រៃយ៍ គឺយើងរៀបចំដំណើរវិលត្រឡប់ចូលមាតុភូមិវិញរបស់លោកប្រធានសម រង្ស៊ី។ ក្នុងនោះ យើងបានឯកភាពគ្នាថា យើងទាំងអស់គ្នា នឹងត្រូវធ្វើកិច្ចការមួយចំនួន ជាមួយគ្នា ទាំងបងប្អូននៅក្រៅប្រទេស ទាំងនៅក្នុងស្រុក។ [....] ហើយយើងបានបែងចែកការងារហ្នឹង ទៅតាមអ្នកទទូលខុសត្រូវ សម្រាប់ធ្វើកិច្ចការនីមួយៗ»។
យ៉ាងណាក៏ដោយ លោក អេង ឆៃអ៊ាង ពុំបានបញ្ជាក់នោះទេ ថាដំណើរវិលត្រឡប់របស់លោក សម រង្ស៊ី នឹងត្រូវធ្វើឡើងនៅពេលណា។ ប៉ុន្តែ លោក សម រង្ស៊ី ខ្លួនឯង ធ្លាប់ប្រកាសថា លោក នឹងវិលមកកម្ពុជា ក្នុងឆ្នាំ២០១៩នេះ។ លោក ជឿជាក់ថា កម្ពុជា នឹងមានការផ្លាស់ប្តូរ ពេលលោកមកវិញ។
លោក អ៊ូ ច័ន្ទរ័ត្ន អតីតមន្ត្រីជាន់ខ្ពស់និងធ្លាប់ជាតំណាងរាស្ត្រគណបក្សប្រឆាំង ដែលកំពុងរស់នៅក្នុងស្រុក បានដឹងពីកិច្ចប្រជុំនេះដែរ តែលោក អះអាងថា ពុំបានចូលរួមនោះទេ។ ចំណែក ផែនការនៃការវិលត្រឡប់របស់លោក សម រង្ស៊ី ក៏លោក ដូចជាមិនចាប់អារម្មណ៍ដែរ។
លោក ប្រាប់សារព័ត៌មានថ្មីៗតាមទូរសព្ទយ៉ាងដូច្នេះថា៖«មិនមែនថាយើងមិនគោរពគាត់ជាឥស្សរជនទេ។ យើងគោរព ចំពោះការតស៊ូរបស់គាត់។ ប៉ុន្តែ ការវិលត្រឡប់នេះ គាត់ដូចជាប្រកាសច្រើនដងហើយ តែថាចោល ថាចោល ដូចជាពិបាកជឿ»។
កន្លងមក សម្តេច ហ៊ុន សែន នាយករដ្ឋមន្ត្រីនិងជាប្រធានគណបក្សកាន់អំណាច បានប្រើពាក្យ «ស្វាគមន៍» ទៅកាន់លោក សម រង្ស៊ី ដែលដាក់គម្រោងវិលមកកម្ពុជាវិញ។ ប៉ុន្តែ ប្រធានគណបក្សកាន់អំណាចរូបនេះ បោះពាក្យគំរាមតាមក្រោយថា «គុកនិងខ្នោះ បានត្រៀមរួចហើយ»៕