កីឡាអន្តរជាតិ
អន្តរជាតិ
Asian Cup៖ ចិន វាយបកឈ្នះថៃ ឡើងទៅប៉ះអុីរ៉ង់ដែលទម្លាក់អូម៉ង់ត្រឹមវគ្គ១៦ក្រុមចុងក្រោយ
× ក្រុមកីឡាបាល់ទាត់ជម្រើសជាតិ អុីរ៉ង់ ចិន និងវៀតណាម បានឡើងទៅកាន់វគ្គ១/៤ផ្តាច់ព្រ័ត្របន្តទៀត ក្រោយឈ្នះគូប្រជែងរៀងខ្លួននាជំនួបវគ្គ១៦ក្រុមចុងក្រោយពានរង្វាន់ AFC Asian Cup 2019 នៅថ្ងៃទី២០ ខែមករា ឆ្នាំ២០១៩។
ក្រុមមហាយក្សចិន បានវាយបកយកឈ្នះថៃដោយលទ្ធផល ២-១ រីឯវៀតណាមទម្លាក់ហ្សកដានីដោយបាល់កាត់សេចក្តីប៉េណាល់ទី១១ម៉ែត្របន្ទាប់ពីបញ្ចប់ការប្រកួតផ្លូវការ ១-១ ខណៈអុីរ៉ង់ឈ្នះអូម៉ង់ក្នុងលទ្ធផល ២-០។
ថៃដែលបាននាំមុខចិន១គ្រាប់មុនតាំងពីនាទី៣១ ដោយខ្សែប្រយុទ្ធ Supachai Jaided ទទួលបានត្រឹមការខកចិត្តប៉ុណ្ណោះ ក្រោយកីឡាករ Zhi Xiao និង Lin Gao ស៊ុតម្នាក់មួយគ្រាប់នៅនាទី ៦៧ និង៧១ ឲ្យក្រុមរហស្សនាមនាគក្រហមឈ្នះក្រុមដំរី ២-១ វិញ ។ ជ័យជម្នះនេះបាននាំចិនឆ្លងផុតវគ្គ១៦ក្រុមចុងក្រោយ ហើយបន្តទៅជួបអុីរ៉ង់នៅវគ្គ១/៤ផ្តាច់ព្រ័ត្រ។ ពីរគ្រាប់របស់អុីរ៉ង់លើអូម៉ង់ធ្វើបានដោយកីឡាករ Alireza Jahanbakhsh និង Ashkan Dejagah។
ចំណែកម្ចាស់ជើងឯក Suzuki Cup 2018 វៀតណាមបានក្លាយជាក្រុមពីតំបន់អាស៊ានតែមួយគត់ដែលអាចឆ្លងផុតវគ្គ ១៦ក្រុម នៃព្រឹត្តិការណ៍ប្រចាំតំបន់អាស៊ីលើកទី១៧នេះ ហើយត្រូវអង្គុយរង់ចាំជំនួបរវាង ជប៉ុន/អារ៉ាប៊ីសាអូឌីត នៅវគ្គបន្ត៕
© រក្សាសិទ្ធិដោយ thmeythmey.com