ក្លឹបកម្សាន្ត Pro KTV ត្រូវបានបិទ ក្រោយអាជ្ញាធរបង្ក្រាបបទល្មើសគ្រឿងញៀនផ្ទួនៗ

ជាតិ

ក្លឹបកម្សាន្ត Pro KTV ត្រូវបានបិទ ក្រោយអាជ្ញាធរបង្ក្រាបបទល្មើសគ្រឿងញៀនផ្ទួនៗ

21, Jan 2019 , 3:28 pm

រូបភាព

រូបពីអគ្គស្នងការនគរបាលជាតិ

ដោយ: ឡាយ សុភាវតី

ភ្នំពេញ៖ ក្លឹបកម្សាន្ត Pro KTV ត្រូវបានបិទ ក្រោយអាជ្ញាធរបង្ក្រាបបទល្មើសគ្រឿងញៀន កាលពីថ្ងៃទី១៩មករា ឆ្នាំ២០១៩។ សមត្ថកិច្ចចុះបង្ក្រាបបទល្មើសគ្រឿងញៀនចំនួនពីរដងហើយ នៅក្នុងក្លឹបឈ្មោះប្រូ ដែលស្ថិតនៅចំណុចមហាវិថីព្រះមុនីវង្ស សង្កាត់បឹងត្របែក ខណ្ឌចំការមន រាជធានីភ្នំពេញ។

សមត្ថកិច្ចបានចុះទៅបង្ក្រាបជនល្មើសមួយក្រុម ដែលមានគ្នាដល់ទៅ៥៨នាក់ (ស្រី២៤នាក់) ពាក់ព័ន្ធនឹងបទល្មើសគ្រឿងញៀន នៅក្នុងក្លឹបកម្សាន្ត Pro KTV នេះ។ បទល្មើសដែលត្រូវបង្ក្រាបក្នុងប្រតិបត្តិការនេះ គឺការជួញដូរគ្រឿងញៀន ការផ្តល់ទីតាំងឲ្យជួញដូរគ្រឿងញៀន និងការប្រើប្រាស់គ្រឿងញៀន។ នគរបាលជាតិ បន្ថែមថា ជនល្មើសទាំងនោះ គឺមានជនជាតិចិន២៩នាក់ (ស្រី៥នាក់) ជនជាតិវៀតណាម ២៣នាក់ (ស្រី១៥នាក់) ជនជាតិថៃ២នាក់ ជនជាតិខ្មែរ៣នាក់ (ស្រី២នាក់) និងជនជាតិកូរ៉េ១នាក់។

ចំពោះវត្ថុតាងដែលសមត្ថកិច្ចបង្ក្រាបបាន រួមមាន អ៊ិចស្តាស៊ីគ្រាប់ទម្ងន់២.៥ក្រាម ម្សៅគេតាមីន៦.៥៨ក្រាម និងម្សៅកាហ្វេអ៊ិចស្តាស៊ី៩៧.៨ក្រាម។ បច្ចុប្បន្នជនសង្ស័យ និងវត្ថុតាង ត្រូវបានបញ្ជូនទៅមន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិ ដើម្បីកសាងសំណុំរឿង បញ្ជូនបន្តទៅតុលាការតាមនីតិវិធី។

លោក មាន វីរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀនបានប្រាប់សារព័ត៌មានថ្មីៗថា សមត្ថកិច្ចបានចុះបង្ក្រាបបទល្មើសគ្រឿងញៀនចំនួនពីរដងហើយ នៅក្នុងក្លឹបកម្សាន្តខាងលើនេះ ។ ដោយសារក្លឹបកម្សាន្ត Pro KTV នៅតែប្រព្រឹត្តបទល្មើសខុសច្បាប់ដដែលបែបនេះ ទើបសមត្ថកិច្ចសម្រេចបិទអាជីវកម្មនេះ មិនឲ្យមានបើកដំណើរការទៀតទេ។

សូមបញ្ជាក់ថា សមត្ថកិច្ច ធ្លាប់បានបង្ក្រាបពីបទល្មើសគ្រឿងញៀន នៅPro KTV ម្តងរួចហើយ កាលពីឆ្នាំ២០១៨។ នេះបើតាមលោក មាស វីរិទ្ធ ។