ភ្នំពេញ៖ សហជីព មន្ត្រីសិទ្ធិមនុស្ស និងកម្មករ បានស្នើឲ្យរដ្ឋាភិបាលពន្លឿនក្នុងការស្វែងរកឃាតករដែលបានសម្លាប់លោក ជា វិជ្ជា មកផ្តន្ទាទោសទៅតាមច្បាប់ជាធរមាន ដើម្បីលុបបំបាត់វប្បធម៌និទណ្ឌភាព និង ពង្រឹងយុត្តិធម៌សង្គមនៅកម្ពុជា។ ពួកគេនៅតែខកចិត្តចំពោះអាជ្ញាធរដែលបានអូសបន្លាយសំណុំរឿងនេះអស់រយៈពេល ១៥ ឆ្នាំ ខណៈមានភ័ស្តុតាង និងតម្រុយ។
លោក អំ សំអាត ប្រធានផ្នែកស៊ើបអង្កេតនៃអង្គការសិទ្ធិមនុស្សលីកាដូ បាននិយាយថា កត្តាដែលជំរុញឲ្យករណីឃាតកម្មលើ លោក ជា វិជ្ជា អូសបន្លាយមកដល់សព្វថ្ងៃនេះ គឺរាជរដ្ឋាភិបាលមិនមានឆន្ទៈក្នុងការស្វែងរកឃាតករពិតមកផ្តន្ទាទោស។ លោកថា ករណីលោកជា វិជ្ជា ជាការគំរាមកំហែងដល់សហជីព និងបង្ហាញពីនិរទណ្ឌភាពនៅកម្ពុជា ។
មន្ត្រីជាន់ខ្ពស់នៃអង្គការលីកាដូរូបនេះ បាននិយាយដូច្នេះថា៖« ឃាតកម្មលោក ជា វិជ្ជា នេះវាហាក់ដូចជាមានអាថ៍កំបាំងនៅពីក្រោយ ដែលរហូតមកដល់ពេលនេះ ១៥ឆ្នាំហើយ ហើយរដ្ឋាភិបាលលោកបានបង្កើតគណៈកម្មការជាបន្តបន្ទាប់ដើម្បីស្វែងរកនូវយុត្តិធម៌ និងការស៊ើបអង្កេត ករណីឃាតកម្មលោកជា វិជ្ជា។ ប៉ុន្តែនៅតែគ្មានពន្លឺ ត្រង់នេះហើយ ដែលនាំឲ្យមានការរិះគន់ នាំឲ្យមានការទទូចស្នើសុំពីអង្គការ ILO ក៏ដូចជា សហគមន៍អន្តរជាតិ ស្នើសុំឲ្យមានការស៊ើបអង្កេតដោយឆន្ទៈពិតប្រាកដ៏ដើម្បីរកឃាតករពិតប្រាកដ និងអ្នកនៅពីក្រោយខ្នង យកមកផ្តន្ទាទោសទៅតាមផ្លូវច្បាប់»។
បើតាមលោក អំ សំអាត រដ្ឋាភិបាលត្រូវតែពន្លឿនការស្វែងរកឃាតករ និងអ្នកនៅពីក្រោយខ្នងមកផ្តន្ទាទោស ដើម្បីស្ដាមុខមាត់លើឆាកជាតិ និងអន្តរជាតិឡើងវិញ។
« ករណីលោក ជា វិជ្ជា យើងឃើញតាំងពីមុន គាត់ត្រូវគេបាញ់សម្លាប់ គឺវាមានភ័ស្តុតាងជាបណ្ដើៗហើយ ទាក់ទងនឹងការផ្ញើរសារគំរាមសម្លាប់ រហូតដល់គាត់ប្ដឹងទៅដល់សមត្ថកិច្ច ហើយសមត្ថកិច្ចមិនហ៊ានរកជនដែលគំរាមគាត់។ វាមានសញ្ញាបណ្តើៗហើយក្នុងការស៊ើបអង្កេត និងស្រាជ្រាវហើយ ដូច្នេះអ្វីដែលពិតប្រាកដគឺឆន្ទៈទេ»។ នេះជាការបន្ថែមរបស់លោក អំ សំអាត។
ក្នុងពិធីគោរពវិញ្ញាណក្ខន្ធសពលោក ជា វិជ្ជា នេះ លោក រ៉ុង ឈុន លោក អាត់ ធន់ លោក វ៉ន ពៅ និងលោកស្រី យ៉ាង សោភ័ណ្ឌ បានឡើងថ្លែងការណ៍ពីវីរភាពរបស់លោក ជា វិជ្ជា ថា លោកវិជ្ជា ជាមនុស្សដំបូងដែលជួយតវ៉ារឿងប្រាក់ខែ និងសិទ្ធិការងារជូនកម្មករដំបូងគេក្នុងប្រទេសកម្ពុជា។ ពួកគេស្នើឲ្យរាជរដ្ឋាភិបាលពន្លឿនការស៊ីបអង្កេតស្វែងរកឃាតករ និងអ្នកបញ្ជាពីក្រោយខ្នងនៃឃាតកម្មលើលោក ជា វិជ្ជា ដើម្បីផ្តល់យុត្តិធម៌ជូនក្រុមគ្រួសារសព នៅក្នុងខួប ១៥ឆ្នាំនៃការស្លាប់ នៅស្តូបក្បែរវិមានឯករាជ្យ នាព្រឹកថ្ងៃទី ២២ ខែមករា ឆ្នាំ២០១៩នេះ។
កាលពីថ្ងៃទី១៥ ខែកញ្ញា ឆ្នាំ២០១៥ រដ្ឋាភិបាលបានសម្រេចបង្កើតគណៈកម្មការស៊ើបអង្កេតពិសេសមួយដើម្បីស្វែងរកឃាតកសម្លាប់លោក ជា វិជ្ជា លោក រស់ សុវណ្ណារ៉េត និងលោក ហ៊ី វុទ្ធី ។ប៉ុន្តែគ្មានព័ត៌មានណាមួយទាក់ទងនឹងឃាតកម្មលើអ្នកទាំងបីរូបនេះនៅឡើយ។
គួររម្លឹកថា លោក ជា វិជ្ជា ត្រូវឃាតករបាញ់សម្លាប់ នៅកណ្ដាលថ្ងៃត្រង មុខតូបលក់កាសែតក្បែរវត្តលង្ការ កាលពីពីថ្ងៃទី ២២ ខែមករា ឆ្នាំ២០០៤។ តុលាបានចោទប្រកាន់មិនត្រឹមត្រូវលើបុរសពីរនាក់ គឺលោក ប៊ន សំណាង និងលោក សុខ សំអឿន ក្នុងសំណុំរឿងនេះ។ ពួកគេត្រូវជាប់ពន្ធនាគារអស់រយៈពេល ៥ឆ្នាំ ក្រោយតុលាការកំពូលរកឃើញថាពួកគេមិនបានប្រព្រឹត្ត៕