ជាតិ
បទសម្ភាសន៍
សេដ្ឋកិច្ច
អ្នកជំនាញ៖ វិស័យអចលនទ្រព្យកម្ពុជាកើនឡើងឆាប់រហ័ស ដែលអាចជួបហានិភ័យក្នុងរយៈពេល៣ឆ្នាំ
× ភ្នំពេញ៖ វិស័យអចលនទ្រព្យនៅប្រទេសកម្ពុជាមានការរីកចម្រើនគួរឲ្យកត់សម្គាល់ ក្នុងរយៈពេលប៉ុន្មានឆ្នាំចុងក្រោយនេះ។ ប៉ុន្តែវិស័យមួយនេះ អាចនឹងមានហានិភ័យកើតឡើង ក្នុងពេលឆាប់ៗនេះផងដែរ។នេះបើតាមការលើកឡើងលោក ជេមស៍ ហូសាន់ (James Hewson) ប្រធានផ្នែកស្រាវជ្រាវ និងប្រឹក្សាយោបល់នៃ CBRE Cambodia ។
បញ្ហាដែលលោក ជែមស៍ ហូសាន់ មើលឃើញនោះ គឺការវិនិយោគលើវិស័យអចលនទ្រព្យ ដូចជាការកសាងលំនៅដ្ឋាន ខុនដូរ ការិយាល័យជួល និងផ្សារទំនើបយ៉ាងគំហុកបែបនេះ វាកំពុងលើសតម្រូវការរបស់អ្នកទិញ ឬអ្នកប្រើប្រាស់នៅក្នុងប្រទេសកម្ពុជា ខណៈដែលលទ្ធភាពពលរដ្ឋកម្ពុជានៅមានកម្រិត គួបផ្សំនឹងការយល់ដឹងរបស់ពួកគេ ដែលមិនយល់ថាអ្វីជា ខុនដូរ ឬការិយាល័យជួលនៅឡើយ។
សូមលោក-អ្នកនាងស្ដាប់កិច្ចសម្ភាសរវាងលោក ភួង វ៉ានថា អ្នកសារព័ត៌មានថ្មីៗ និងលោក James Hewson ប្រធានផ្នែកស្រាវជ្រាវ និងប្រឹក្សាយោបល់នៃ CBRE Cambodia ជាភាសាអង់គ្លេសដូចតទៅ៖
បច្ចុប្បន្នក្រុមហ៊ុនក្នុងស្រុក និងបរទេសជាច្រើនបានសម្រុកវិនិយោគក្នុងវិស័យអចលនទ្រព្យនេះ ដែលបង្ហាញពីការរីកចម្រើនលើវិស័យអចលនទ្រព្យនៅកម្ពុជា។ ប៉ុន្តែការវិនិយោគលើវិស័យនេះ វាកំពុងវិវត្តច្រើនហួស ដែលអាចបណ្ដាលឲ្យមានឱនភាពទីផ្សារ និងតម្លៃធ្លាក់ចុះនាប៉ុន្មានឆ្នាំខាងមុខនេះ។ បើតាមលោក ជេមស៍ ហូសាន់ តម្លៃអចលនទ្រព្យអាចនៅទ្រឹង ឬធ្លាក់ចុះ នៅក្នុងឆ្នាំ២០១៩ដល់២០២១ ហើយវានឹងអាចមានសន្ទុះឡើងវិញ នៅឆ្នាំបន្ទាប់នោះ។
« យើងមានក្តីបារម្ភចំពោះកំណើនដ៍ឆាប់រហ័ស ដែលអាចនឹងបណ្ដាលឲ្យតម្លៃទីផ្សារធ្លាក់ចុះ តម្លៃជួល តម្លៃលក់ បញ្ហានេះមិនត្រឹមតែកើតក្នុងឆ្នាំ២០១៩នោះទេ វាអាចបន្តរហូតដល់ឆ្នាំ២០២០ ឬ២០២១ យើងសង្ឃឹមថាឆ្នាំបន្ទាប់នឹងមានភាពល្អប្រសើរ»។ នេះជាការព្យាកររបស់លោក ជេមស៍ ហូសាន់ (James Hewson) ប្រធានផ្នែកស្រាវជ្រាវ និងប្រឹក្សាយោបល់នៃ CBRE Cambodia ៕
Tag:
James Hewson
អចលនទ្រព្យកម្ពុជា
© រក្សាសិទ្ធិដោយ thmeythmey.com