អន្តរជាតិ
នយោបាយអន្តរជាតិ
រុស្ស៊ីថា អាមេរិកមិនចង់គោរពកាតព្វកិច្ចអន្តរជាតិ ទើបដកខ្លួនពីសន្ធិសញ្ញមីស៊ីលនុយក្លេអ៊ែរចម្ងាយមធ្យម រូបភាពពី AFP
× ក្រុងមូស្គូ បានរិះគន់ការសម្រេចចិត្តរបស់រដ្ឋបាលប្រធានាធិបតីអាមេរិក ដូណាល់ ត្រាំ ដែលប្រកាសព្យួរការអនុវត្តសន្ធិសញ្ញាហាមឃាត់មីស៊ីលនុយក្លេអ៊ែរចម្ងាយមធ្យម។ ដោយចោទថា រុស្ស៊ីជាអ្នកបំពានរដ្ឋមន្ត្រីការបរទេសអាមេរិក ម៉ៃ ប៉ុមប៉េអូ ប្រកាសនៅថ្ងៃទី១ ខែកុម្ភៈថា អាមេរិកនឹងដកខ្លួនពីសន្ធិសញ្ញានុយក្លេអ៊ែរចម្ងាយមធ្យម (INF) ដែលជាសន្ធិសញ្ញាទ្វេភាគីជាមួយរុស្ស៊ី រយៈពេល៦ខែសិន។ តែរុស្ស៊ីចោទវិញថា អាមេរិកចង់គេចពីកាតព្វកិច្ចអន្តរជាតិប៉ុណ្ណោះ។
នៅទីបំផុតអាមេរិក បានដើរចេញពីកាតព្វកិច្ចរបស់ខ្លួនក្រោមសន្ធិសញ្ញាហាមឃាត់មីស៊ីលបំពាក់នុយក្លេអ៊ែរចម្ងាយមធ្យម (INF) ដែលជាសន្ធិសញ្ញាជាមួយរុស្ស៊ីចំនួន៦ខែរហូតដល់រុស្ស៊ីឈប់បំពានសន្ធិសញ្ញានេះទៀត។ ប៉ុន្តែអាមេរិកបានទុកច្រកមួយ គឺខ្លួននឹងពិចារណាការដកខ្លួននេះឡើងវិញ ប្រសិនបើអនុវត្តឲ្យបានត្រឹមត្រូវតាម INF ដែលបង្កើតឡើងនៅឆ្នាំ១៩៨៧ ដើម្បីហាមឃាត់ប្រទេសទាំងពីរពង្រាយមីស៊ីលចម្ងាយមធ្យម និងខ្លីនៅអឺរ៉ុប។
ប្រមុខការទូតអាមេរិក ម៉ៃ ប៉ុមប៉េអូ ប្រកាសថា អាមេរិកនឹងលែងជាប់កាតព្វកិច្ចនៅក្រោមសន្ធិសញ្ញា INF នេះចាប់ពីថ្ងៃទី១ ខែកុម្ភៈតទៅ ហើយនឹងប្រាប់រុស្ស៊ីពីការដកខ្លួននេះជាផ្លូវការ។ បើតាមលោក ប៉ុមប៉េអូ រុស្ស៊ីត្រូវអនុវត្តកាតព្វកិច្ចរបស់ខ្លួនឲ្យពេញលេញក្នុងរយៈពេល៦ខែតាមរយៈការកម្ទេចមីស៊ីលដែលបំពាន INF, កម្ទេចឧបករណ៍បាញ់ និងសម្ភារៈពាក់ព័ន្ធ បើមិនដូច្នោះទេ សន្ធិសញ្ញា INF នឹងត្រូវលុបចោលតែម្ដង។
យ៉ាងណាមិញ រុស្ស៊ីប្រតិកម្មខ្លាំងៗទៅនឹងការសម្រេចចិត្តរបស់អាមេរិក។ អ្នកនាំពាក្យវិមានក្រេមឡាំង Dmitry Peskov និយាយថា អាមេរិកបង្កើតរឿងដើម្បីគេចពីការអនុវត្តច្បាប់របស់ប៉ុណ្ណោះ ហើយដើម្បីអភិវឌ្ឍមីស៊ីលបាន។ លើសពីនោះ រុស្ស៊ីក៏សោកស្ដាយដែលអាមេរិកគេចវេសមិនប្រើប្រាស់យន្តការចរចាដើម្បីបញ្ចៀសលទ្ធផលរបៀបនេះ ដោយលោក Peskov អះអាងថា ក្រុងវ៉ាស៊ីនតោនគ្មានឆន្ទៈស្ដាប់ការពន្យល់របស់មូស្គូឡើយ។
ជាមួយគ្នានេះ អ្នកនាំពាក្យក្រសួងការបរទេសរុស្ស៊ី Maria Zakharova ក៏រិះគន់អាមេរិកដែលគ្មានផ្ដល់ភស្តុតាងអ្វីសោះដើម្បីការពារអំណះអំណាងរបស់ខ្លួន។ ប្រាប់ទូរទស្សន៍រុស្ស៊ី Rossiya 1 នៅថ្ងៃទី១ ខែកុម្ភៈ អ្នកនាំពាក្យរូបនេះបញ្ជាក់ថា ការចាកចេញរបស់អាមេរិកមិនពាក់ព័ន្ធកំហុសរុស្ស៊ីទេ តែជាយុទ្ធសាស្ត្ររបស់អាមេរិកក្នុងគេចចេញពីកាតព្វកិច្ចក្រោមច្បាប់អន្តរជាតិនៅក្រោមសន្ធិសញ្ញា INF នេះ។ បើអាមេរិកដកខ្លួន រុស្ស៊ីក៏មានសិទ្ធិតបតវិញដែរ។
សូមបញ្ជាក់ថា INF ជាសន្ធិសញ្ញាមួយដែលសល់ពីសម័យសង្គ្រាមត្រជាក់។ សន្ធិសញ្ញានេះតម្រូវឲ្យភាគីទាំងពីរកម្ទេចមីស៊ីលបាលីស្ទិកដែលអាចរត់បានចម្ងាយពី៥០០គីឡូម៉ែត្រទៅ៥,៥០០គីឡូម៉ែត្រ។ ប៉ុន្តែអាមេរិកចោទថា រុស្ស៊ីមានមីស៊ីលធុន 9M729 ឬណាតូហៅថា SSC-8 ដែលល្មើសនឹងសន្ធិសញ្ញា INF នេះ៕
© រក្សាសិទ្ធិដោយ thmeythmey.com