អន្តរជាតិ
នយោបាយអន្តរជាតិ
×![]()
រាជរដ្ឋាភិបាលថៃ នៅថ្ងៃទី០១ ខែកុម្ភៈ បានចេញសេចក្តីថ្លែងការណ៍មួយ សុំអភ័យទោសចំពោះប្រជាជនដែលកំពុងរស់នៅទីក្រុងបាងកក ជុំវិញបញ្ហាការបំពុលខ្យល់ ដែលបន្តប៉ះពាល់ដល់ការរស់នៅប្រចាំថ្ងៃ និងគំរាមកំហែងដល់សុខភាពរបស់ពួកគេ។ 
ថ្លែងនៅក្នុងសេចក្តីថ្លែងការណ៍មួយនៅថ្ងៃសុក្រ លោកនាយករដ្ឋមន្ត្រីថៃ ប្រាយុទ្ធ ចាន់អូចា បានគូសបញ្ជាក់ថា៖«រដ្ឋាភិបាលសូមអភ័យទោសសម្រាប់បញ្ហាដែលបានកើតឡើង និងចង់អរគុណដល់អ្នករាល់គ្នាសម្រាប់កិច្ចសហប្រតិបត្តិការ និងការគាំទ្រ»។ នេះបើតាមការចុះផ្សាយរបស់សារព័ត៌មានថៃ The Nation ។
បន្ថែមពីការសូមអធ្យាស្រ័យពីសំណាក់ប្រជាជនក្នុងក្រុងបាងកក លោក ប្រាយុទ្ធ ក៏បានស្នើសុំម្ចាស់យានជំនិះដែលដើរដោយប្រេងម៉ាស៊ូតទាំងអស់ ប្រើប្រាស់រថយន្តរបស់ពួកគេនៅក្នុងទីក្រុង តែនៅពេលចាំបាច់បំផុតប៉ុណ្ណោះ។ «ប្រសិនជាអាចទៅរួច គួរតែជៀសវាងការប្រើប្រាស់រថយន្តប្រភេទនេះ រហូតដល់ផ្សែងពុលមានភាពធូរស្រាលឡើងវិញ»។ លោកបានផ្តល់យោបល់បែបនេះ ខណៈដែលលោកយល់ស្របថា មូលហេតុចម្បងនៃការបំពុលខ្យល់នេះគឺបណ្តាលមកពីចំហះដែលចេញពីម៉ាស៊ីនយានយន្ត។
បើតាមសារព័ត៌មានដដែលនេះ លោកនាយករដ្ឋមន្ត្រី ប្រាយុទ្ធ បានគូសបញ្ជាក់ទៀតថា សម្រាប់ដំណោះស្រាយរយៈពេលវែង រដ្ឋាភិបាលនឹងពង្រឹងប្រព័ន្ធដឹកជញ្ជូនសាធារណៈឲ្យកាន់តែងាយស្រួលទាំងតម្លៃគុណភាព និងតម្លៃ, គុណភាពប្រេងឥន្ធនៈ, និងត្រួតពិនិត្យលើស្តង់ដារនៃការបញ្ចេញផ្សែងពីយានយន្ត។ លើសពីនេះ រដ្ឋាភិបាលក៏គ្រោងបង្កើតស្ថានីយន៍ប្រេងឥន្ធនៈ ដែលផ្តល់នូវប្រេងឥន្ធនៈ ដែលល្អសម្រាប់បរិស្ថាន និងចាប់ផ្តើមលើកកម្ពស់រថយន្តប្រភេទ Hybrid ឬប្រើប្រាស់ថាមពលអគ្គិសនីជាដើម។
គួរបញ្ជាក់ថា បរិមាណនៃភាគល្អិតនៃធូលី PM2.5 នៅក្នុងខ្យល់ បានកើនលើសពីកម្រិតសុវត្ថិភាពនៅក្នុងរាជធានី បាងកក និងខេត្តក្បែរៗនោះ ស្ទើតែរៀងរាល់ថ្ងៃ គិតចាប់ពីចុងខែធ្នូមកម្ល៉េះ។ យោងតាមនាយកដ្ឋានគ្រប់គ្រងការបំពុលថៃ វាពុំមានសុវត្ថិភាពនោះទេ ប្រសិនបើបរិមាណនៃ PM2.5 កើនលើស ៥០ មីក្រូក្រាមក្នុងខ្យល់មួយម៉ែត្រគូប។ ជាលទ្ធផលប្រជាជននឹងចាប់ផ្តើមមានបញ្ហាសុខភាព ជាពិសេសបញ្ហាផ្លូវដង្ហើម។
គិតត្រឹមថ្ងៃសុក្រសប្ដាហ៍នេះ តំបន់ចំនួន ៣៥ ក្នុងទីក្រុងបាងកកបានទទួលរងប៉ះពាល់ពីកម្រិត PM2.5 ដែលមានគ្រោះថ្នាក់ចំពោះសុខភាព។ ក្នុងចំណោមនោះ សង្កាត់ចំនួនពីរក្នុងទីក្រុងបាងកក មានកម្រិត PM2.5 កើនដល់ ៨៣ មីក្រូក្រាម និង ៧៧ មីក្រូក្រាមក្នុងខ្យល់មួយម៉ែត្រគូប។
ដើម្បីការពារកុមារពីបញ្ហាខ្យល់កខ្វក់នេះ សាលាក្រុងបាងកកបានចេញបញ្ជាឲ្យបិទសាលារៀនបណ្តោះអាសន្នចំនួនពីរថ្ងៃ។ ហើយក្រុមហ៊ុនមួយចំនួនក្នុងក្រុងបាងកកអនុញ្ញាតឲ្យបុគ្គលិកខ្លួន ជាពិសេសស្ត្រីមានផ្ទៃពោះ និងងាយរងផលប៉ះពាល់ដោយសារផ្សែងពុល ធ្វើការពីផ្ទះរបស់ពួកគេផ្ទាល់តែម្តង រហូតដល់ថ្ងៃអង្គារសប្តាហ៍ក្រោយ៕
Tag:
ថៃ
ប្រាយុទ្ធចាន់អូចា
ខ្យល់កខ្វក់
© រក្សាសិទ្ធិដោយ thmeythmey.com
