សមាជិកព្រឹទ្ធសភាបារាំង នឹងជួយនិយាយឲ្យអឺរ៉ុប គិតឡើងវិញពីការដាក់សម្ពាធលើកម្ពុជា

ជាតិ

នយោបាយជាតិ

សមាជិកព្រឹទ្ធសភាបារាំង នឹងជួយនិយាយឲ្យអឺរ៉ុប គិតឡើងវិញពីការដាក់សម្ពាធលើកម្ពុជា

05, Feb 2019 , 2:53 pm

រូបភាព

រូបពី AKP៖ អ្នកស្រី ម៉ែន សំអន ជួប លោក François Grosdidier

ដោយ: ថ្មីៗ

លោក François Grosdidier សមាជិកព្រឹទ្ធសភាបារាំងនិងជាអនុប្រធានក្រុមមិត្តភាពព្រឹទ្ធសភាបារាំង-កម្ពុជា បានសន្យានៅចំពោះមុខអ្នកស្រី ម៉ែន សំអន រដ្ឋមន្ត្រីក្រសួងទំនាក់ទំនងរដ្ឋសភា-ព្រឹទ្ធសភា ថា លោក នឹងទៅជួបបណ្តាប្រទេសជាសមាជិកនៃសហភាពអឺរ៉ុប ដើម្បីស្នើឲ្យពិនិត្យឡើងវិញពីការដាក់សម្ពាធមកលើកម្ពុជា។ នេះបើតាមការចុះផ្សាយរបស់ទីភ្នាក់ងារសារព័ត៌មានកម្ពុជា (AKP)។

ជំនួបរវាងអ្នកស្រី ម៉ែន សំអន និង លោក François Grosdidier គឺធ្វើឡើងកាលពីថ្ងៃទី២ ខែកុម្ភៈ ឆ្នាំ២០១៩ នៅទីស្តីការក្រសួងទំនាក់ទំនងរដ្ឋសភា-ព្រឹទ្ធសភា។ ការពិភាក្សារបស់អ្នកទាំង២ ត្រូវបានលោក ណុប ចាន់ណារិន្ទ អ្នកនាំពាក្យក្រសួងទំនាក់ទំនងរដ្ឋសភា-ព្រឹទ្ធសភា ស្រង់យកទៅប្រាប់អ្នកកាសែត នៅក្រោយបញ្ចប់ជំនួបនេះ។

លោក ណុប ចាន់ណារិន្ទ ប្រាប់អ្នកកាសែតថា លោក François Grosdidier បានចាត់ទុកការលើកឡើងរបស់សហភាពអឺរ៉ុប ថាជាលេសពិតប្រាកដ ដើម្បីដាក់គំនាបមកលើកម្ពុជា តាមរយៈការគំរាមដកប្រព័ន្ធអនុគ្រោះពន្ធ EBA។

AKP បានចុះផ្សាយថា អ្នកស្រី ម៉ែន សំអន បានអរគុណចំពោះការយកចិត្តទុកដាក់និងការគាំទ្ររបស់បារាំង មកលើកម្ពុជា។ អ្នកស្រី បន្ដថា រដ្ឋាភិបាលកម្ពុជា បាននិងកំពុងខិតខំបន្ថែមទៀត ក្នុងការពង្រឹងសន្តិភាព ការពារលទ្ធិប្រជាធិបតេយ្យ និងការគោរពសិទ្ធិមនុស្ស។ អ្នកស្រី ប្រាប់លោក François Grosdidier ថា រយៈពេល២០ឆ្នាំចុងក្រោយនេះ ក្រោមយុទ្ធសាស្ត្រ នយោបាយឈ្នះឈ្នះ របស់ប្រមុខរដ្ឋាភិបាល ប្រទេសជាតិ បានទទួលសុខសន្តិភាពពេញលេញ។

វា ជារឿងគួរឲ្យព្រួយបារម្ភមួយចំពោះការដកប្រព័ន្ធអនុគ្រោះពន្ធ EBA ចេញពីកម្ពុជា។ សហភាពអឺរ៉ុប ត្រូវចំណាយពេល១ឆ្នាំ ក្នុងការពិនិត្យនិងពិចារណា ហើយបន្ទាប់មក នឹងសម្រេចជាផ្លូវការថាដកប្រព័ន្ធអនុគ្រោះពន្ធនេះឬមិនដក។ មកដល់ពេលនេះ នីតិវិធីនេះ បានដំណើរការជិតកន្លះឆ្នាំហើយ។

EBA (Everything but Arms) គឺសំដៅលើប្រព័ន្ធអនុគ្រោះពន្ធ លើទំនិញនិងផលិតផលសព្វបែបយ៉ាង ដូចជា សម្លៀកបំពាក់ និង អង្ករ ជាដើម ដែលកម្ពុជា នាំចូលទៅកាន់ទីផ្សារអឺរ៉ុប ដោយលើកលែងតែអាវុធប៉ុណ្ណោះ ដែលមិនរាប់បញ្ចូល។ កម្ពុជា ជាប្រទេសមួយ ដែលទទួលបានការអនុគ្រោះពន្ធ EBA។

ថ្មីៗនេះ សហភាពអឺរ៉ុប បានសម្រេចយកពន្ធលើអង្ករកម្ពុជា រយៈពេល៣ឆ្នាំជាប់គ្នា គឺនៅឆ្នាំ២០១៩ យកប្រមាណ២០០ដុល្លារ ក្នុងមួយតោន នៅឆ្នាំ២០២០ យកប្រមាណ១៧០ដុល្លារ ក្នុង១តោន ហើយនៅឆ្នាំ២០២១ យកប្រមាណ១៥០ដុល្លារ ក្នុង១តោន៕