កីឡាអន្តរជាតិ
អន្តរជាតិ
×![]()
ដោយ: ទេព ពិទូរ្យ
លោក Ole Gunnar Solskjaer អ្នកចាត់ការទូទៅបណ្តោះអាសន្នរបស់ Manchester United ជឿជាក់ថា Anthony Martial មានទេពកោសល្យដែលអាចឈានដល់កម្រិត Cristiano Ronaldo ដែរ ក្រោយរូបគេរួមចំណែកជួយក្រុមឡើងទៅកាន់ចំណាត់ថ្នាក់ទី៤ក្នុងតារាង Premier League វិញ។ 
Solskjaer លើកឡើងដូច្នេះបន្ទាប់ខ្សែប្រយុទ្ធសញ្ជាតិបារាំងរូបនេះអូសបាល់ពីពាក់កណ្តាលតារាងស៊ុតបញ្ចូលទីមួយគ្រាប់ក្នុងការប្រកួតដែលបិសាចក្រហម យកឈ្នះ Fulham ៣-០ ក្នុងក្របខណ្ឌ Premier League កាលពីថ្ងៃសៅរ៍ទី៩ ខែកុម្ភៈ។ ក្នុងជំនួបនោះមិត្តរួមជាតិបារាំងរបស់ Martial គឺ Paul Pogba រកបានដល់ទៅ២គ្រាប់ម្នាក់ឯង។
ក្រោយចប់ការប្រកួតអ្នកចាត់ការសញ្ជាតិន័រវែស វ័យ៤៥ឆ្នាំ បាននិយាយសរសើរ Martial មិនដាច់ពីមាត់ ហើយថែមទាំងប្រៀបប្រដូចរូបគេទៅនឹងតារាឆ្នើម Cristiano Ronaldo ទៀតផង។ Solskjaer ដែលធ្លាប់លេងជាមួយខ្សែប្រយុទ្ធឆ្នើមសញ្ជាតិព័រទុយហ្គាល់រូបនេះនៅ Man Utd កាលស្ថិតក្រោមការដឹកនាំរបស់ Sir Alex Forguson នោះបានមើលឃើញពីការវិវត្តរបស់ Martial ថាពិតជាមានភាពស្រដៀងគ្នានឹង Ronaldo។
Solskjaer និង Ronaldo កាលនៅរួមក្រុម Man Utd
Ronaldo ធ្លាប់ឈ្នះពានរង្វាន់ធំៗ រហូតដល់ទៅ ៨ នៅទឹកដី Old Trafford ជាមួយនឹងការស៊ុតបញ្ចូលទី ១១៨ គ្រាប់ ក្នុងការបង្ហាញខ្លួន ២៩២ ប្រកួត មុនចាកចេញទៅចូលរួមជាមួយក្លិបយក្ស Real Madrid ក្នុងតម្លៃកំណត់ត្រាកាលពីឆ្នាំ២០០៩។
«ប្រសិនបើគាត់ (Martial) ចង់មានកម្រិតលេងដូច Ronaldo មែននោះ Martial ដឹងថារូបគេត្រូវធ្វើអ្វីហើយ។ វាអាស្រ័យលើគាត់ និងទេពកោសល្យរបស់គាត់»។ Solskjaer បន្ថែមដូច្នេះ។
ជាមួយនឹងទម្រង់លេង និងគ្រាប់បាល់ដ៏ល្អរបស់អតីតសមាជិកក្រុម Monaco វ័យ២៣ឆ្នាំ ដែលអូសពីពាក់កណ្តាលតារាងទៅនោះក៏ត្រូវបានលោក Gary Neville អតីតប្រធានក្រុម Man United ប្រៀបធៀបទៅនឹង Ronaldo ផងដែរ ខណៈម្ចាស់ពាន Ballon d'Or ៥សម័យធ្វើបានដូចគ្នានេះនៅទឹកដី Craven Cottage ក្នុងឆ្នាំ ២០០៧៕
Tag:
បាល់ទាត់
Cristiano Ronaldo
Ole Gunnar Solskjaer
Anthony Martial
© រក្សាសិទ្ធិដោយ thmeythmey.com
