កីឡាអន្តរជាតិ
អន្តរជាតិ
អូឡាំពិក៖ ជប៉ុនប្រមូលទូរសព្ទ និងកុំព្យូទ័រដែលបោះចោល ច្នៃធ្វើមេដាយជូនអត្តពលិក
× ទូរសព្ទ កុំព្យូទ័រយួរដៃ និងសំណល់អេឡិចត្រូនិកចាស់ៗនឹងត្រូវយកទៅកែច្នៃធ្វើជាមេដាយសម្រាប់ផ្តល់ជូនអត្តពលិកក្នុងព្រឹត្តិការណ៍កីឡាអូឡាំពិក និងប៉ារ៉ាឡាំពិកឆ្នាំ២០២០ ក្នុងក្រុងតូក្យូ ប្រទេសជប៉ុន។ នេះបើតាមការបញ្ជាក់របស់មន្ត្រីទទួលបន្ទុករៀបចំកម្មវិធី។
គម្រោងនេះម្ចាស់ផ្ទះជប៉ុនបានបង្កើតឡើងតាំងពីឆ្នាំ ២០១៧មកម្លេះ ដោយពួកគេដើរប្រមូលកាកសំណល់គ្រឿងអេឡិចត្រូនិកឲ្យគ្រប់តាមតម្រូវការ រួមមានទូរសព្ទស្មាតហ្វូន និងកុំព្យូទ័រយួរដៃចាស់ៗដែលគេបោះចោលដើម្បីយកទៅរំលាយ។
ជប៉ុនដាក់គោលដៅប្រមូលមាសឲ្យបាន ៣០,៣គីឡូក្រាម ពីការរំលាយកាកសំណល់នេះ រួមទាំងប្រាក់ ៤១០០គីឡូក្រាម និងសំរិទ្ធ ២៧០០គីឡូក្រាម។ បើតាមការបញ្ជាក់ពីអ្នករៀបចំកម្មវិធីកីឡាអូឡាំពិក ពួកគេរំពឹងថានឹងរួចរាល់នៅក្នុងខែមីនាឆ្នាំ២០១៩នេះ។
គិតត្រឹមខែវិច្ឆិកា ឆ្នាំ២០១៨ ពួកគេប្រមួលបានគ្រឿងអេឡិចត្រូនិកដូចជាទូរសព្ទដែលប្រជាជនជប៉ុន៥លាននាក់បោះចោល និងប្រមូលតាមតំបន់អាជីវកម្មនិងឧស្សាហកម្មផ្សេងៗ បានចំនួន ៤៧៤៨៨តោនរួចមកហើយ។
ប្រសិនបើការប្រមួលវត្តុធាតុដើមខាងលើទាន់ពេល ជប៉ុននឹងចាប់ផ្តើមរចនាមេដាយទាំង៣ប្រភេទរបស់ពួកគេនៅចុងឆ្នាំនេះតែម្តង។
ព្រឹត្តិការណ៍កីឡាអូឡាំពិក លើកទី២៩ ដែលជប៉ុនបានសិទ្ធិដឹកនាំធ្វើម្ចាស់ផ្ទះនឹងប្រព្រឹត្តទៅចាប់ពីថ្ងៃទី២៤ ខែកក្កដា រហូតដល់ថ្ងៃទី៩ ខែសីហា ឆ្នាំ២០២០ ដែលគេជឿជាក់ថាមានអត្តពលិកចូលរួមប្រមាណ ១១០៩១រូប មកពី ២០៦ប្រទេស។
កាលពីអូឡាំពិកឆ្នាំ ២០១៦ ក្នុងក្រុងរីយ៉ូ ប្រទេសប្រេស៊ីល មេដាយប្រាក់ និងសំរិទ្ធប្រមាណ៣០ភាគរយ គឺច្នៃចេញពីកាកសំណល់អេឡិចត្រូនិកផងដែរ៕
© រក្សាសិទ្ធិដោយ thmeythmey.com