ជាតិ
សង្គមជាតិ
CMAC រកឃើញគ្រាប់បែកប្រភេទM117 ទម្ងន់ជាង៣០០គីឡូក្រាម នៅខេត្តកំពង់ស្ពឺ រូបភាពបានពីទំព័រហ្វេសប៊ុក លោក ហេង រតនា អគ្គនាយកស៊ីម៉ាក់
× ភ្នំពេញ៖ មជ្ឈមណ្ឌលកម្ចាត់មីនកម្ពុជា ហៅកាត់ថា CMAC បានរកឃើញគ្រាប់បែកប្រភេទ M117 ទម្ងន់ជាង៣០០គីឡូក្រាម ក្នុងស្រុកគងពិសី ខេត្តកំពង់ស្ពឺ កាលពីថ្ងៃទី១១ កុម្ភៈ ឆ្នាំ២០១៩។ គ្រាប់បែកប្រភេទនេះ ត្រូវបានលោក ហេង រតនា អគ្គនាយកស៊ីម៉ាក់ អះអាងថា ជាគ្រាប់បែកដែលបានបន្សល់ទុកកាលពីសម័យសង្គ្រាមទម្លាក់ដោយយន្តហោះរបស់អាមេរិក។
លោក ហេង រតនា បានបញ្ជាក់ក្នុងទំព័រហ្វេសប៊ុករបស់ខ្លួនដូច្នេះ «បងប្អូនជីកដីឃើញគ្រាប់បែកដែលទម្លាក់ក្នុងសម័យសង្គ្រាម មានការភ្ញាក់ផ្អើល និងភ័យខ្លាច! កម្លាំងស៊ីម៉ាក់បានកំណត់ប្រតិបតិ្តការ និងយកចេញនៅថ្ងៃ១២ ខែកុម្ភៈនេះ បន្ទាប់ពីបានពិនិត្យស្ថានភាពលក្ខណ:បច្ចេកទេស គ្រាប់បែកនេះរួចកាលពីម្សិលមិញ»។
រហូតមកដល់ពេលនេះ អាជ្ញាធរមីន បានកម្ទេចចោលនូវគ្រាប់មីនប្រឆាំងមនុស្សជាង១លានគ្រាប់។ មីនប្រឆាំងរថក្រោះជាង២ម៉ឺនគ្រាប់ និងសំណល់ជាតិផ្ទុះសល់ពីសង្គ្រាមជិត៣លានគ្រាប់។ ដោយឡែក ជនរងគ្រោះដោយសារមីន បានធ្លាក់ចុះពី៤,៣២០នាក់ ក្នុងឆ្នាំ១៩៩៦ មកត្រឹម៥៨នាក់ក្នុងឆ្នាំ២០១៧៕
© រក្សាសិទ្ធិដោយ thmeythmey.com