កីឡាជាតិ
ជាតិ
FFC រើសគ្រូបង្វឹកជាច្រើនរូប ដើម្បីបង្ហាត់យុវជននៅសាលាបាល់ទាត់ជាតិបាទី
× សហព័ន្ធកីឡាបាល់ទាត់កម្ពុជា(FFC)នៅរសៀលថ្ងៃទី១២ ខែកុម្ភៈ ឆ្នាំ២០១៩នេះ បានចេញលិខិតមួយ ប្រកាសស្វែងរកគ្រូបង្វឹកជាច្រើនរូប ដើម្បីបង្វឹកក្រុមយុវជននៃសាលាបាល់ទាត់ជាតិបាទី។ ការប្រកាសស្វែងរកគ្រូបង្វឹកនេះ គឺដើម្បីរួមចំណែកអភិវឌ្ឍន៍វិស័យកីឡាបាល់ទាត់កម្ពុជា សម្រាប់ត្រៀមការប្រកួតកីឡាស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ។
សហព័ន្ធកីឡាបាល់ទាត់កម្ពុជាប្រកាសស្វែងរកគ្រូបង្វឹកដែលមានសញ្ញាបត្រកម្រិតចាប់ពី C-License ជាច្រើនរូបដើម្បីចូលរួមបង្វឹកក្រុមយុវជននៃសាលាបាល់ទាត់ជាតិបាទី។ តែយ៉ាងណា សហព័ន្ធមិនបានបញ្ជាក់លម្អិតពីចំនួន ដែលត្រូវជ្រើសរើសឡើយ ដោយគ្រាន់តែប្រាប់ឲ្យគ្រូបង្វឹកដែលចង់ចូលរួម ត្រូវភ្ជាប់មកជាមួយប្រវត្តិរូបសង្ខេបតែប៉ុណ្ណោះ។
សេចក្តីប្រកាសព័ត៌មានដែលចេញតាំងពីថ្ងៃទី១១ ខែកុម្ភៈ ឆ្នាំ២០១៩ បានសរសេយ៉ាងដូច្នេះថា៖«ស្ថិតក្នុងផែនការអភិវឌ្ឍន៍បាល់ទាត់រយៈពេលវែង និងក្នុងទិសដៅឆ្ពោះទៅកាន់ស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ សហព័ន្ធកីឡាបាល់ទាត់កម្ពុជាមានផែនការជ្រើសរើសគ្រូបង្ហាត់កីឡាបាល់ទាត់មួយចំនួន ដែលមានសញ្ញាបត្របង្ហាត់ចាប់ពីកម្រិត C-License ឡើងទៅ ដើម្បីចូលរួមសហការបង្ហាត់ក្រុមកីឡាករ នៃសាលាបាល់ទាត់ជាតិបាទី»៕
Tag:
បាល់ទាត់
FFC
សាលាបាល់ទាត់ជាតិបាទី
© រក្សាសិទ្ធិដោយ thmeythmey.com