យុទ្ធសាស្ត្រដាក់សម្ពាធលើដៃគូជួយឲ្យ កាន់ សោភ័ណ្ឌ គ្រងជើងឯកពានសម្តេច ស ខេង

កីឡាជាតិ

ជាតិ

យុទ្ធសាស្ត្រដាក់សម្ពាធលើដៃគូជួយឲ្យ កាន់ សោភ័ណ្ឌ គ្រងជើងឯកពានសម្តេច ស ខេង

13, Feb 2019 , 3:00 pm

រូបភាព

ដោយ:

កីឡាករសូហ្វតិន្នីស កាន់ សោភ័ណ្ឌ បានយកឈ្នះកីឡាករ អន សម្បត្តិ ក្នុងវគ្គផ្តាច់ព្រ័ត្រ ដើម្បីគ្រងជើងឯកលើវិញ្ញាសាឯកត្តជន នាការប្រកួតដណ្តើមពានរង្វាន់សម្តេច ស ខេង ប្រចាំឆ្នាំ២០១៩។ ការដឹងពីចំណុចខ្សោយរបស់គូប្រជែង និងការខិតខំប្រឹងប្រែងហ្វឹកហាត់ ក៏ជាកត្តារួមចំណែកក្នុងជ័យជម្នះរបស់ សោភ័ណ្ឌ ផងដែរ។ កីឡាករ អន សម្បត្តិ បានបង្ហាញការភ្ញាក់ផ្អើល និងកោតសរសើរសមត្ថភាពរបស់ កាន់ សោភ័ណ្ឌ ដែលរីកចម្រើនស្ទើរមិនគួរឲ្យជឿ។ ទោះបីចង់យកឈ្នះលើគូប្រកួតក៏ដោយ សម្បត្តិ ជំរុញ សោភ័ណ្ឌ បន្តខិតខំហ្វឹកហាត់ ដើម្បីរក្សាភាពខ្លាំងរបស់ខ្លួន។

ការដាក់សម្ពាធលើគូប្រជែងឲ្យបានមុន ត្រូវបានកីឡាករ កាន់ សោភ័ណ្ឌ ចាត់ទុកជាយុទ្ធសាស្ត្រជួយជំរុញឲ្យរូបគេអាចយកឈ្នះកីឡាករ អន សម្បត្តិ នៅវគ្គផ្តាច់ព្រ័ត្រ ដើម្បីឈ្នះមេដាយមាសឯកត្តជន នាការប្រកួតពានរង្វាន់សម្តេច ស ខេង ប្រចាំឆ្នាំ២០១៩ ដែលបានបញ្ចប់ដោយទទួលបានការវាយតម្លៃខ្ពស់ពីថ្នាក់ដឹកនាំ។ កីឡាកររូបនេះ ជឿជាក់ថា បើគេមិនប្រើយុទ្ធសាស្ត្រនេះ អាចនឹងរកបរាជ័យក្រោមថ្វីដៃកីឡាករ អន សម្បត្តិ ដែលជាកីឡាករជើងខ្លាំងមួយរូប។

កីឡាករ កាន់ សោភ័ណ្ឌ (អាវលឿង)ចាប់ដៃជាមួយកីឡាករ អន សម្បត្តិ ក្រោយចប់ការប្រកួតវគ្គផ្តាច់ព្រ័ត្រ

ការព្យាយាមហ្វឹកហាត់ជាមួយការដាក់គោលដៅត្រៀមប្រជែងក្នុងព្រឹត្តិការណ៍កីឡាស៊ីហ្គេមនៅហ្វីលីពីនឆ្នាំ២០១៩ និងការដឹងពីចំណុចខ្សោយរបស់គូប្រជែង ក៏ជាកត្តារួមចំណែកក្នុងជោគជ័យរបស់គេផងដែរ។ ក្រៅពីមេដាយលើវិញ្ញាសានេះ កាន់ សោភ័ណ្ឌ បានឈ្នះមេដាយមាសលើវិញ្ញាសាវាយគូផងដែរ ដោយចាប់ដៃគូជាមួយកីឡាករ ឯក ចំរើន។

កីឡាករ កាន់ សោភ័ណ្ឌ ពេលប្រកួតវគ្គផ្តាច់ព្រ័ត្រជាមួយកីឡាករ អន សម្បត្តិ

«ខ្ញុំប្តេជ្ញាថាត្រូវតែប្តូរដើម្បីដាក់សម្ពាធលើកីឡាករ អន សម្បត្តិ បើពុំនោះទេខ្ញុំអាចនឹងចាញ់។ ដោយសារខ្ញុំធ្លាប់លេងជាមួយគាត់(សម្បតិ្ត) ធ្វើឲ្យខ្ញុំដឹងល្បិចគាត់ បើសិនខ្ញុំលេងអូសធម្មតា គាត់អាចដាក់សម្ពាធលើខ្ញុំ និងធ្វើឲ្យខ្ញុំអាចចាញ់។ យុទ្ធសាស្ត្រនេះហើយ ដែលជួយឲ្យខ្ញុំអាចដាក់សម្ពាធលើគាត់មិនអាចតដៃបាន»។ នេះជាការបញ្ជាក់របស់កីឡាករ កាន់ សោភ័ណ្ឌ។

កីឡាករ អន សម្បត្តិ ពេលប្រកួតវគ្គផ្តាច់ព្រ័ត្រជាមួយកីឡាករ កាន់ សោភ័ណ្ឌ, រូបភាពពីអង្គភាពក្រសួងមហាផ្ទៃ

ដោយឡែកកីឡាករ អន សម្បត្តិ ដែលបានចាញ់កីឡាករ កាន់ សោភ័ណ្ឌ ជាមួយលទ្ធផលដ៏ជូរចត់ក៏បានចាត់ទុកការដាក់សម្ពាធពីសំណាក់កីឡាកររូបនេះជាមូលហេតុដែលធ្វើឲ្យគេចាញ់តដៃមិនរួចផងដែរ។ សម្បត្តិ ប្តេជ្ញាថា រូបគេនឹងខិតខំប្រឹងប្រែងអភិវឌ្ឍន៍សមត្ថភាពឲ្យកាន់តែខ្លាំង ដើម្បីយកឈ្នះកីឡាកររូបនេះនៅការប្រកួតលើកក្រោយៗទៀត។

«សម្រាប់ការប្រកួតកន្លងមកមានពេលខ្លះខ្ញុំអាចដាក់សម្ពាធលើគាត់(សោភ័ណ្ឌ)ច្រើនដែរ តែលើកនេះគាត់ល្អមែនទែនខ្ញុំមិនដឹងថា គាត់យ៉ាងម៉េចនោះទេ ដូចពាក្យខ្មែរយើងថាដូចខ្មោចចូល វាយយ៉ាងម៉េច ក៏គាត់អាចយកបានដែរ។ មិនមែនតែខ្ញុំទេដែលមិនអាចយកបាល់គាត់បាន សូម្បីឲ្យជើងខ្លាំងមកពីជប៉ុនក៏មិនអាចយកបានដែរ ព្រោះគាត់វាយល្អមែនទែន»។ កីឡាករ អន សម្បត្តិ បានរៀបរាប់បែបនេះ ហើយបានបន្ថែមថា មរណភាពរបស់ប្អូន ក៏ជាកត្តារួមចំណែកធ្វើឲ្យរូបគេខ្វះការយកចិត្តទុកដាក់ក្នុងការប្រកួតផងដែរ។

គួរបញ្ជាក់ថា មុនការប្រកួតមកដល់ពីរថ្ងៃកីឡាករ អន សម្បត្តិ បានបាត់បង់ប្អូនប្រុសជាស្រលាញ់ គឺយុវជន អន ចាន់សុផា ដែលបានទទួលមរណភាពដោយខ្យល់គ។ តាមពិតដំបូង សម្បត្តិ គ្រោងនឹងបដិសេធចូលរួមការប្រកួតឆ្នាំនេះទៀតផង តែដោយសារនឹកឃើញអនុស្សាវរីយ៍ប្អូនប្រុសចូលចិត្តវិស័យកីឡា និងតែងតែតេទូរសព្ទមកសួរពីលទ្ធផល រូបគេក៏សម្រេចចូលរួមប្រកួតឡើងវិញ។

ទោះបីយ៉ាងនេះក្តី អន សម្បត្តិ បានបង្ហាញការភ្ញាក់ផ្អើលនិងកោតសរសើរយ៉ាងខ្លាំអពីសមត្ថភាពរបស់កីឡាករ កាន់ សោភ័ណ្ឌ។ រូបគេបានរៀបរាប់ដូច្នេះថា៖«សម្រាប់ការប្រកួតលើកនេះខ្ញុំសុំសរសើរដៃគូរបស់ខ្ញុំកីឡាករ កាន់ សោភ័ណ្ឌ គឺបាល់របស់គាត់ល្អខ្លាំងមែនទែន។ ពេលខ្ញុំវាយចេញទៅគាត់អាចបកមកខ្ញុំវិញជានិច្ច ពិសេសគាត់វាយទាញកៀកៗនិងចុងខ្សែល្អ ធ្វើឲ្យខ្ញុំពិបាកក្នុងការវាយបកទៅវិញ។ កាន់ សោភ័ណ្ឌ គាត់បានដាក់សម្ពាធមុន ធ្វើឲ្យពិបាកក្នុងការទទួលយកបាល់របស់គាត់ និងវាយបកទៅគាត់វិញ»។

សម្រាប់ការប្រកួតពានរង្វាន់សម្តេច ស ខេង លើកទី៦នេះ ក្រសួងមហាផ្ទៃដណ្តើមបានមេដាយមាស៧ ប្រាក់៥ និងសំរឹទ្ធ៥, ក្លិបអគ្គស្នងការនគរបាលជាតិប្រាក់២ និងសំរឹទ្ធ៤, ក្រសួងការពារជាតិសំរឹទ្ធ២, ខេត្តកំពង់ស្ពឺសំរឹទ្ធ២ និងក្លិបជប៉ុនសំរឹទ្ធ១។ ការប្រកួតនេះមានកីឡាករកីឡាការិនី៩០នាក់មកពី៧ក្លិប-សមាគមចូលរួម ដោយប្រកួតលើ៧វិញ្ញាសា៕