លោក សម រង្ស៊ី យល់ថា អ្នកវិនិយោគ នឹងចាប់ផ្តើមដកថយពីកម្ពុជាបណ្តើរៗ មុនទណ្ឌកម្មអន្តរជាតិមកដល់ ដោយពួកគេ មិនរង់ចាំរហូតដល់ទណ្ឌកម្មមកដល់ហើយ ទើបគិតគូរនោះទេ។ មន្ត្រីបក្សកាន់អំណាច ចាត់ទុកសាររបស់លោក សម រង្ស៊ី ថាមានចេតនាបំបែកបំបាក់។
បីថ្ងៃ ក្រោយគណៈកម្មការអឺរ៉ុប ផ្តើមនីតិវិធីផ្លូវការនៃការដកប្រព័ន្ធអនុគ្រោះពន្ធលើសព្វមុខទំនិញ (EBA) ចេញពីកម្ពុជា លោក សម រង្ស៊ី មេដឹកនាំក្រុមប្រឆាំង ដែលកំពុងនិរទេស ក៏ចេញមកបញ្ចេញមតិ តាមរយៈសារលើទំព័រហ្វេសប៊ុក។ លោក ហ៊ានសន្និដ្ឋានថា ទណ្ឌកម្មពាណិជ្ជកម្មរបស់អន្តរជាតិ ជិតឈានមកដល់ហើយ ក្នុងឆ្នាំ២០១៩នេះ ដោយសារតែរដ្ឋាភិបាលកម្ពុជា ដែលស្ថិតក្រោមការដឹកនាំរបស់សម្តេចនាយករដ្ឋមន្ត្រី ហ៊ុន សែន មិនព្រមកែប្រែឥរិយាបថ។
មេដឹកនាំក្រុមប្រឆាំងរូបនេះ បានប្រៀបធៀបរដ្ឋាភិបាលកម្ពុជា ទៅនឹងកប៉ាល់ធ្លុះធ្លាយមួយ ដែលហួសពេលនឹងជួសជុលទៅហើយ ហើយកប៉ាល់នេះ នឹងជួបរឿងអកុសល ដោយត្រូវលិចលង់នៅកណ្តាលសមុទ្រ ក្នុងឆ្នាំង២០១៩នេះ។ លោក មើលឃើញថា ហានីភ័យ ដែលនឹងកើតមានចំពោះពាណិជ្ជកម្មនិងសេដ្ឋកិច្ចកម្ពុជា កំពុងប៉ះទង្គិចផ្លូវចិត្តរបស់ពួកអ្នកវិនិយោគ ហើយពួកគេ ប្រាកដជាចាប់ផ្តើមគិតគូររកវិធីចាកចេញ ឲ្យបានមុនហានីភ័យមកដល់។
លោក បានសរសេរយ៉ាងដូច្នេះថា៖«អ្នកដែលនៅលើកប៉ាល់នេះ មិនអាចរង់ចាំរហូតទល់តែកប៉ាល់លិចនោះទេ ប៉ុន្តែពួកគេ ត្រូវតែលោតចេញពីកប៉ាល់ ឲ្យបានមុនកប៉ាល់លិច។ ការសម្រេចចិត្តលោតចេញពេលនេះ គឺជាការសម្រេចចិត្តដ៏ត្រឹមត្រូវរបស់ពួកអ្នកវិនិយោគនៅកម្ពុជា។ សូម្បីតែអ្នកបញ្ជាទិញពីក្រៅប្រទេស ក៏គេផ្អាកឬលុបចោលតែម្តង នូវការបញ្ជាទិញរបស់គេ តាំងពីឥឡូវនេះដែរ ពីព្រោះពួកគេ មិនចង់ជាប់ឈ្មោះរបស់ពួកគេ ទៅនឹងឈ្មោះដ៏អាក្រក់របស់ [រដ្ឋាភិបាលកម្ពុជា] ដែលនឹងទទួលទណ្ឌកម្មពីអន្តរជាតិនោះទេ»។
ទោះលោក សម រង្ស៊ី ចាត់ទុកថាជាបញ្ហាធំដុំបែបនេះក្តី តែលោក សុខ ឥសាន អ្នកនាំពាក្យគណបក្សប្រជាជនកម្ពុជា ហាក់មិនចាប់អារម្មណ៍ ដោយលោក ជឿជាក់ថា កម្ពុជា នឹងមិនជួបរឿងបែបនេះឡើយ។ លោក យល់ថា សារបស់លោក សម រង្ស៊ី គឺគ្រាន់តែដើម្បីបំបែកបំបាក់ប៉ុណ្ណោះ ដូចកាលដែលលោក អំពាវនាវឲ្យកងទ័ព ងើបបះបោរនឹងរដ្ឋាភិបាលកន្លងមកដែរ។
អ្នកនាំពាក្យគណបក្សកាន់អំណាចរូបនេះ ប្រាប់សារព័ត៌មានថ្មីៗ តាមទូរសព្ទយ៉ាងដូច្នេះថា៖«ខ្ញុំ មិនចង់ឆ្លើយអីវែងឆ្ងាយទេ ព្រោះសាររបស់គាត់ អត់ប្រយោជន៍ ហើយគ្មានអ្នកណាគេទៅចាប់អារម្មណ៍ទេ»។
វា ជាលើកដំបូង ដែលគណៈកម្មការអឺរ៉ុប ចាប់ផ្តើមបើកកិច្ចពិភាក្សាជាផ្លូវការ កាលពីថ្ងៃទី១១ ខែកុម្ភៈ ឆ្នាំ២០១៩ ដើម្បីឆ្ពោះទៅរកការដកជាបណ្តោះអាសន្ននូវប្រព័ន្ធអនុគ្រោះពន្ធ EBA ចេញពីកម្ពុជា ។ គណៈកម្មការអឺរ៉ុប ត្រូវការពេលមួយឆ្នាំកន្លះ មុននឹងឈានដល់ការសម្រេចជាផ្លូវការថាដកឬមិនដក។
អ្នកស្រី Cecilia Malmstrom ប្រធានគណៈកម្មការពាណិជ្ជកម្មនៃសហភាពអឺរ៉ុប បានមានប្រសាសន៍ថា កិច្ចពិភាក្សានេះ មិនមែនជាសេចក្តីសម្រេចចុងក្រោយទេ ហើយនីតិវិធី ក៏មិនទាន់ឈានដល់ដំណាក់កាលបញ្ចប់ដែរ។ ប៉ុន្តែ ពេលវេលា ដើរទៅមុខហើយ ហើយសហភាពអឺរ៉ុប ចង់ឃើញសកម្មភាពជាក់ស្តែងក្នុងពេលខាងមុខឆាប់ៗនេះ»។
រីឯ អ្នកស្រី Federica Mogherini អនុប្រធានគណៈកម្មការអឺរ៉ុប និងជាតំណាងជាន់ខ្ពស់ទទួលបន្ទុកកិច្ចការអន្តរជាតិ បានលើកឡើងថា ក្នុងរយៈពេល១៨ខែកន្លងមកនេះ សហភាពអឺរ៉ុប សង្កេតឃើញថា កម្ពុជា មានការធ្លាក់ចុះខ្លាំងនូវលទ្ធិប្រជាធិបតេយ្យ ការគោរពសិទ្ធិមនុស្ស និង នីតិរដ្ឋ។
តាមរយៈសេចក្តីប្រកាសព័ត៌មានរបស់ខ្លួន ដែលផ្សព្វផ្សាយកាលពីថ្ងៃទី១១ ខែកុម្ភៈ គណៈកម្មការអឺរុប បានព្រមានថា ប្រព័ន្ធអនុគ្រោះពន្ធ EBA អាចនឹងត្រូវលុបចេញពីប្រទេសណា ដែលបរាជ័យក្នុងការគោរពសិទ្ធិមនុស្សនិងសិទ្ធិការងារ។
EBA (Everything but Arms) គឺសំដៅលើប្រព័ន្ធអនុគ្រោះពន្ធ លើទំនិញនិងផលិតផលសព្វបែបយ៉ាង ដូចជា សម្លៀកបំពាក់ និង អង្ករ ជាដើម ដែលកម្ពុជា នាំចូលទៅកាន់ទីផ្សារអឺរ៉ុប ដោយលើកលែងតែអាវុធប៉ុណ្ណោះ ដែលមិនរាប់បញ្ចូល។ កម្ពុជា ជាប្រទេសមួយ ដែលបានចុះកិច្ចព្រមព្រៀងជាមួយសហភាពអឺរ៉ុបស្តីពី EBA នេះ ហើយតែងតែទទួលបានការអនុគ្រោះពន្ធ។
លោក Ted Cruz សមាជិកព្រឹទ្ធសភាអាមេរិកដ៏មានឥទ្ធិពលម្នាក់ ដែលទើបនឹងផ្តើមគំនិតធ្វើច្បាប់ ដើម្បីដាក់ទណ្ឌកម្មលើកម្ពុជា បានចេញមុខស្វាគមន៍ចំពោះគណៈកម្មការអឺរ៉ុប ដែលបានសម្រេចបើកកិច្ចពិភាក្សា ដើម្បីឆ្ពោះទៅរកការដកប្រព័ន្ធអនុគ្រោះពន្ធ EBA ជាបណ្តោះអាសន្ន ចេញពីកម្ពុជា។ លោក Ted Cruz បានសរសេរលើបណ្តាញសង្គម Twitter យ៉ាងដូច្នេះថា៖«សេចក្តីព្រាងច្បាប់ស្តីពីការដាក់ទណ្ឌកម្មលើពាណិជ្ជកម្មនៅកម្ពុជារបស់ខ្ញុំនិងលោក Chris Coons នឹងទាមទារឲ្យរដ្ឋាភិបាលអាមេរិក ធ្វើដូចសហភាពអឺរ៉ុបដែរ»។
លោក Ted Cruz និង លោក Chris Coons បានចាប់ផ្តើមមធ្វើសេចក្តីព្រាងច្បាប់ស្តីពីការដាក់ទណ្ឌកម្មលើពាណិជ្ជកម្មនៅកម្ពុជា (Cambodia Trade Act Bill) កាលពីដើមខែមករា ឆ្នាំ២០១៩មក។ គោលបំណងនៃការធ្វើច្បាប់នេះ គឺដើម្បីឲ្យលោក ដូណាល់ ត្រាំ ប្រធានាធិបតីអាមេរិក ពិនិត្យឡើងវិញលើការអនុគ្រោះពន្ធនៃការនាំចូលទំនិញពីកម្ពុជា តាមរយៈប្រព័ន្ធអនុគ្រោះពន្ធមួយ ដែលហៅថា General System Preference (GSP)។
ប្រព័ន្ធអនុគ្រោះពន្ធ GSP បានអនុគ្រោះពន្ធដល់ប្រទេសក្រីក្រឬប្រទេសកំពុងអភិវឌ្ឍ លើការនាំចូលទំនិញ និងផលិតផលរាប់ពាន់មុខឯណោះ ទៅកាន់ទីផ្សារអាមេរិក។ យ៉ាងណាក៏ដោយ កម្ពុជា ពុំមានទំនិញ និងផលិតផលច្រើនមុខបែបនេះនាំចូលទៅទីផ្សារមេរិកនោះទេ។ ភាគច្រើនគឺមានតែផលិតផលសម្រាប់ធ្វើដំណើរ (Travel Goods) ប៉ុណ្ណោះ ជាពិសេស វ៉ាលី និង កាបូប ដែលកម្ពុជានាំទៅកាន់ទីផ្សារអាមេរិក៕