ជាតិ
កម្ពុជាគ្រោងបង្កើតស្ថានីយ៍ផលិតថាមពលអគ្គិសនីដើរដោយពន្លឺព្រះអាទិត្យនៅខេត្តកំពង់ស្ពឺ រូបភាពពីក្រសួងបរិស្ថាន
× ភ្នំពេញ៖ កម្ពុជាគ្រោងបង្កើតស្ថានីយ៍ផលិតថាមពលអគ្គិសនីដើរដោយពន្លឺព្រះអាទិត្យនៅខេត្តកំពង់ស្ពឺ។ គម្រោងនេះ ស្ថិតនៅក្នុងកិច្ចពិភាក្សាអន្តរក្រសួង កាលពីពេលថ្មីៗនេះ។
ក្រសួងបរិស្ថាន បាននិយាយថា គម្រោងស្ថាននីយផលិតថាពលអគ្គីសនីដើរដោយពន្លឺព្រះអាទិត្យនេះ ពិតជាមានសារ:ប្រយោជន៍សម្រាប់កម្ពុជា ដោយថ្លៃអគ្គិសនីលក់ជូនអគ្គិសនីកម្ពុជា គឺក្នុងតម្លៃ ៧,៦ សេនដុល្លាក្នុងមួយគីឡូវ៉ាត់ម៉ោង ហើយអាចជួយកាត់បន្ថយការបញ្ចេញឧស្ម័នផ្ទះកញ្ចក់បានច្រើនទៀតផង។ គម្រោងអភិវឌ្ឍន៍ និងបង្កើតស្ថានីយផលិតថាមពលអគ្គិសនី ដើរដោយពន្លឺព្រះអាទិត្យកម្លាំង៦០MW នៅខេត្តកំពង់ស្ពឺ។
លោក សៅ សុភាព រដ្ឋលេខាធិការក្រសួងបរិស្ថាន បានដឹកនាំកិច្ចប្រជុំអន្តរក្រសួងស្តីពីការពិនិត្យនិងផ្ដល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមសម្រាប់គម្រោងអភិវឌ្ឍន៍និងបង្កើតស្ថានីយផលិតអគ្គិសនីដើរដោយពន្លឺព្រះអាទិត្យនៅខេត្តកំពង់ស្ពឺរបស់ក្រុមហ៊ុន SCHNEITEC RENEWABLE កាលពីថ្ងៃទី១២ កុម្ភៈ។ ការសិក្សានេះ រៀបចំឡើងដោយក្រុមហ៊ុនទីប្រឹក្សា E & A Consultant។
គម្រោងស្ថានីយ៍នេះ ក៏ផ្ដោតលើរបាយការណ៍ EIA គ្របដណ្តប់ចំណុចសំខាន់ៗដូចជា ទី១ ធ្វើការពិនិត្យ វិភាគ និងបង្ហាញពីលក្ខណៈ និងព័ត៌មានរបស់គម្រោងអភិវឌ្ឍន៍ និងបង្កើតស្ថានីយផលិតអគ្គិសនីដើរដោយពន្លឺព្រះអាទិត្យកម្លាំង៦០មេហ្គាវ៉ាត់លើផ្ទៃដីទំហំ១១៥ហិកតា។ ទី២ សិក្សាអំពីធនធានរូបសាស្ត្រ ធនធានជីវសាស្ត្រ និងធនធានសេដ្ឋកិច្ចសង្គមនៅក្នុង និងជុំវិញតំបន់គម្រោងដើម្បីជាទិន្ន័យគោលមួយក្នុងការវាយតម្លៃហេតុប៉ះពាល់បរិស្ថាន និងសង្គម។ ទី៣ រៀបចំកិច្ចពិគ្រោះយោបល់ជាមួយប្រជាពលរដ្ឋ អាជ្ញាធរមូលដ្ឋាន និងមន្ទីរជំនាញពាក់ព័ន្ធសម្រាប់ផ្តល់យោបល់លើគម្រោង។ ទី៤ កំណត់ទំហំនៃហេតុប៉ះពាល់បរិស្ថានទៅលើធនធានបរិស្ថានធម្មជាតិ និងបរិស្ថានសង្គមដែលមានស្រាប់ នៅក្នុងតំបន់សិក្សាទាំងវិជ្ជមាន និងអវិជ្ជមានដោយសារសកម្មភាពដំណើការរបស់គម្រោង។ ទី៥ កំណត់នូវវិធានការកាត់បន្ថយហេតុប៉ះពាល់បរិស្ថាន និងសង្គម (អវិជ្ជមាន)ដែលអាចកើតមានឡើងពីសកម្មភាពគម្រោងអោយដល់កំរិតអប្បបរមា។ ទី៦ វិភាគតម្លៃសេដ្ឋកិច្ច និងតម្លៃបរិស្ថាន ទាំងផ្នែកវិជ្ជមាន និងអវិជ្ជមាន និងចុងក្រោយ រៀបចំមូលនិធិបរិស្ថាន និងសង្គមដើម្បីស្តារបរិស្ថានឡើងវិញនិងចូលរួមអភិវឌ្ឍន៍ភូមិ ឃុំដែលពាក់ព័ន្ធនឹងគម្រោងវិនិយោគ៕
Tag:
កំពង់ស្ពឺ
ថាមពលព្រះអាទិត្យ
© រក្សាសិទ្ធិដោយ thmeythmey.com