អន្តរជាតិ
រដ្ឋាភិបាលវៀតណាម៖ ផ្សារភាគហ៊ុនវៀតណាម ដំណើរការជោគជ័យជាងគេក្នុងតំបន់អាស៊ានឆ្នាំ២០១៨
× រដ្ឋាភិបាលក្រុងហាណូយ បានសម្តែងក្តីសោមនស្សខ្លាំងបន្ទាប់ពីទីផ្សារភាគហ៊ុន ដែលជាធាតុចូលចម្បងមួយនៃកំណើនសេដ្ឋកិច្ចរបស់ខ្លួនមានការលូតលាស់ និងសម្រេចបានលទ្ធផលផ្លែផ្កា។ ក្រុងហាណូយ ថែមទាំងបានប្រកាសថា ទីផ្សារភាគហ៊ុនរបស់ខ្លួន ជោគជ័យបំផុតប្រចាំ២០១៨ ប្រៀបធៀបនឹងបណ្តាប្រទេសក្នុងតំបន់អាស៊ាន។
លោកឧបនាយករដ្ឋមន្ត្រីវៀតណាម Vương Đình Huệ តាមរយៈកិច្ចប្រជុំបូកសរុបការងារឆ្នាំចាស់ និងលើកទិសដៅសម្រាប់ឆ្នាំថ្មី បានអះអាងថា ទីផ្សារភាគហ៊ុនរបស់វៀតតណាមទទួលបានភាគជោគជ័យបំផុតក្នុងចំណោមប្រទេសអាស៊ានប្រចាំឆ្នាំ២០១៨លើដំណើរការនៃការបោះផ្សាយមូលបត្រជាសាធារណៈលើកដំបូង (IPO) ។ នេះបើយោងតាមការចុះផ្សាយរបស់ភ្នាក់ងារព័ត៌មានវៀតណាម Vietnam News នៅថ្ងៃ១២ កុម្ភៈ។
លោកឧបនាយករដ្ឋមន្ត្រី បានលើកឡើងថា ក្នុងឆ្នាំ២០១៨ តម្លៃទីផ្សារ នៃការបោះផ្សាយមូលបត្រជាសាធារណៈលើកដំបូង (IPO) របស់វៀតណាម បានងើបដល់ ២,៦ ពាន់លានដុល្លារ ខណៈ ទីផ្សារ IPO របស់សិង្ហបុរី មានតម្លៃត្រឹមតែ ៥០០ លានដុល្លារអាមេរិកប៉ុណ្ណោះ។ លោកឧបនាយករដ្ឋមន្ត្រី ពន្យល់ថាការកើនឡើងនៃ IPO របស់វៀតណាម ក៏ដោយសាររដ្ឋាភិបាលវៀតណាមបានពន្លឿននីតិវិធីការផ្លាស់ប្តូរនៅក្នុងផ្សារភាគហ៊ុន។
តាមលោកឧបនាយករដ្ឋមន្ត្រីរូបនេះ បើនិយាយពីសូចនាករគោលដៅរួមក្នុងឆ្នាំ២០១៨ វៀតណាម សម្រេចបានតិចជាងឆ្នាំ២០១៧ ក៏ប៉ុន្តែទីផ្សារមូលធនភាវូបនីយកម្ម បានកើនឡើង១០.៦ភាគរយ ខណៈទំហំទីផ្សារភាគហ៊ុន បានកើនឡើងខ្លាំងរហូតដល់ ៧០ ភាគរយនៃផលិតផលក្នុងស្រុកសរុប។
លោកឧបនាយករដ្ឋមន្ត្រី ក៏បានលើកឡើងពីគោលនយោបាយអនុគ្រោះថ្មីពាក់ព័ន្ធរូបិយបណ្ណរបស់អាមេរិក ដែលធ្វើឲ្យមានចលនានៃការវិនិយោគបរទេសឆ្ពោះទៅកាន់អាមេរិកកាន់តែច្រើន ពោលគឺវិនិយោគបរទេសមួយចំនួនក្នុងរយៈពេលចុងក្រោយនេះ បានដកការវិនិយោគរបស់ពួកគេពីទីផ្សាររបស់ប្រទេសដែលកំពុងមានសេដ្ឋកិច្ចងើបឡើងទៅអាមេរិកវិញ។ ក៏ប៉ុន្តែត្រង់ចំណុចនេះ លោក អះអាងថា របត់នេះ មិនបានប៉ះពាល់ដល់ទីផ្សារវៀតណាម ហើយវៀតណាម នៅតែជាទិសដៅដ៏ទាក់ទាញមួយសម្រាប់វិនិយោគបរទេស។
ដើម្បីធានាពីការអភិវឌ្ឍលើវិស័យទីផ្សារភាគហ៊ុន រដ្ឋាភិបាលក្រុងហាណូយ ប្តេជ្ញា រក្សាស្ថិរភាពម៉ាក្រូសេដ្ឋកិច្ច និងកែសម្រួលនីតិវិធី ក៏ដូចជាលក្ខខណ្ឌរបស់ក្រុមហ៊ុនដែលគ្រប់គ្រងដោយរដ្ឋ ក្នុងគោលដៅដើម្បីឲ្យក្រុមហ៊ុនទាំងនោះអាចចុះបញ្ជីទៅក្នុងផ្សារភាគហ៊ុន និងអនុញ្ញាតឲ្យវិនិយោគបរទេសអាចទិញភាគតិច និងធ្វើកិច្ចសហប្រតិបត្តិការបាន៕
Tag:
វៀតណាម
ផ្សារភាគហ៊ុន
© រក្សាសិទ្ធិដោយ thmeythmey.com