អន្តរជាតិ
ប្រមុខរដ្ឋាភិបាលរដ្ឋ Johor ម៉ាឡេស៊ីសារភាពថាលោកពុំមានសញ្ញាបត្រពីសកលវិទ្យាល័យឡើយ រូបភាព៖ TODAY Online
× លោក Osman Sapian ប្រមុខរដ្ឋាភិបាលនៃរដ្ឋ ឬហៅបានម្យ៉ាងទៀតថា ប្រធានរដ្ឋមន្ត្រី (Chief Minister) នៃរដ្ឋJohor ប្រទេសម៉ាឡេស៊ី បានសារភាពថា លោកពុំមានសញ្ញាបត្រពីសកលវិទ្យាល័យ Putra ម៉ាឡេស៊ី (UPM) នោះទេ។ ទាក់ទិននឹងរឿងនេះ លោកសុំទោសប្រជាជនម៉ាឡេស៊ីទាំងអស់ចំពោះបញ្ហានេះ។
យោងតាមការចុះផ្សាយរបស់សារព័ត៌មាន Sinar Harian daily លោក Osman បាននិយាយនៅថ្ងៃទី១៤ ខែកុម្ភៈថា លោកធ្លាប់បានសិក្សានៅសាលា Kolej Pertanian Malaya មុននឹងវាត្រូវបានប្តូរទៅជាសកលវិទ្យាល័យ Putra ម៉ាឡេស៊ីវិញ។ ប៉ុន្តែលោកអះអាងថា លោកពុំបានបញ្ចប់ការសិក្សារបស់លោកពេញលេញឡើយ។
«ដោយគ្មានការឯកភាពពីខ្ញុំ គេហទំព័រមួយចំនួនបានអះអាងថា ខ្ញុំបានបញ្ចប់ការសិក្សាជាមួយសញ្ញាបត្រផ្នែកគណនេយ្យពីសកលវិទ្យាល័យ Putra ម៉ាឡេស៊ី»។ នេះជាការគូសបញ្ជាក់របស់លោក Osman ដោយបន្ថែមទៀតថា លោកចេញមុខទទួលខុសត្រូវនឹងរឿងនេះ ថែមទាំងបានបញ្ជាឲ្យគេដកព័ត៌មានមិនត្រឹមត្រូវទាំងអស់ចេញពីបណ្តាគេហទំព័រទាំងនោះផងដែរ។
សូមបញ្ជាក់ថា លោកអភិបាលរដ្ឋ Johor គឺជាមនុស្សម្នាក់ក្នុងចំណោមមេដឹកនាំនៃសម្ព័ន្ធនយោបាយដឹកនាំដោយលោក មហាធៀ មហាម៉ាត់ Pakatan Harapan ដែលសញ្ញាបត្ររបស់ពួកគេស្ថិតក្រោមការត្រួតពិនិត្យយ៉ាងល្អិតល្អន់ ក្រោយពីអនុរដ្ឋមន្ត្រីការបរទេសម៉ាឡេស៊ី លោក Marzuki Yahya ត្រូវបានរកឃើញថា មានសញ្ញាបត្រក្លែងក្លាយ។
ក្រៅពីអ្នកទាំងពីរនេះ មេដឹកនាំនៃបក្ស Pakatan Harapan ផ្សេងទៀត រួមមាន រដ្ឋមន្ត្រីការពារជាតិម៉ាឡេស៊ី លោក Mohamad Sabu និងរដ្ឋមន្ត្រីក្រសួងលំនៅដ្ឋាននិងរដ្ឋបាលមូលដ្ឋាន លោកស្រី Zuraida Kamaruddin កាលពីថ្មីៗនេះក៏ទទួលរងការចោទប្រកាន់លើបញ្ហាសញ្ញាបត្រ និងប្រវត្តិនៃការសិក្សាផងដែរ៕
Tag:
ម៉ាឡេស៊ី
រដ្ឋJohor
© រក្សាសិទ្ធិដោយ thmeythmey.com