ជាតិ
ពីនេះ ពីនោះ
«វត្ថុអារម្មណ៍»,«សិល្បារម្មណ៍», «រូបារម្មណ៍សិល្បៈ» និង«សច្ចភាពជីវិត»មានន័យខុសគ្នាដូចម្តេច? រូបភាពទាក់ទងនឹង វត្ថុអារម្មណ៍ ពីរាជបណ្ឌិត្យសភាកម្ពុជា
× ក្នុងកិច្ចប្រជុំពិនិត្យ ពិភាក្សា និងអនុម័តបច្ចេកសព្ទគណៈកម្មការអក្សរសិល្ប៍ នៅថ្ងៃទី១២ ខែកុម្ភៈ ក្រុមប្រឹក្សាជាតិភាសាខ្មែរបានកំណត់និយមពាក្យថ្មីចំនួន៤ ពាក្យបន្ថែមទៀត ដោយពាក្យទាំងនោះមានដូចជា «វត្ថុអារម្មណ៍ សិល្បារម្មណ៍ រូបារម្មណ៍សិល្បៈ និងសច្ចភាពជីវិត»។
ក្រុមប្រឹក្សាជាតិភាសាខ្មែរបានពន្យល់ពាក្យ «វត្ថុអារម្មណ៍» ជារូបវត្ថុ រូបភាព ឬរឿងរ៉ាវផ្សេងៗនៅក្នុងសា្នដៃអក្សរសិល្ប៍ សិល្បៈ ដែលត្រូវបានប្រធានអារម្មណ៍របស់អ្នកអាន អ្នកស្តាប់ អ្នកទស្សនា ទទួលយកមកពិនិត្យ ពិចារណា។
«សិល្បារម្មណ៍» ក្លាយមកពីភាសាអង់គ្លេស Aesthetic image និងជាភាសាបារាំង Image esthéti que ជារូបារម្មណ៍សិល្បៈដែលកើតមានឡើងនៅក្នុងប្រធានអារម្មណ៍របស់អ្នកអាន អ្នកស្តាប់ អ្នកទស្សនា បន្ទាប់ពីមានការវិនិច្ឆ័យចំពោះ រូបារម្មណ៍ថា ល្អឬមិនល្អ សមឬមិនសម ពីរោះ ឬមិនពីរោះជាដើម។
«រូបារម្មណ៍សិល្បៈ» ក្លាយពីភាសាបារាំង Image artistique ជាផ្ទាំងរូបភាពនៃគំនិតក្នុងសា្នដៃអក្សរសិល្ប៍ សិល្បៈ ដែលបង្កើតឡើងតាមរយៈគំនិតច្នៃប្រឌិត(សិល្ប៍វិធី) របស់អ្នកនិពន្ធ សិល្បករឲ្យកើតឡើង ជារូបរាង ជារឿងរ៉ាវ ជាដំណើររឿងអ្វីមួយ ដោយមានលក្ខណៈសមស្របទៅនឹងទិដ្ឋភាពសង្គមណាមួយ ធម្មជាតិណាមួយ ឬមានលក្ខណៈអច្ឆរិយៈក៏មាន។ រូបារម្មណ៍សិល្បៈ ជាផ្ទាំងរូបភាពនៃគំនិតដែលផុសឡើងក្នុងអារម្មណ៍របស់អ្នកអាន អ្នកស្តាប់ និងអ្នកទស្សនា។
ចំណែក«សច្ចភាពជីវិត» ជាភាសាអង់គ្លេស truth of life ជាភាសាបារាំង vérité de la vie ជាដំណើររឿងរ៉ាវពិតទាំងឡាយនៃសង្គម ដែលកើតចេញពីមនុស្ស ឬពីធម្មជាតិ ហើយជាប់ទាក់ទងយ៉ាងជិតសិ្នទ្ធនឹងជីវភាពរស់នៅ ដូចជា ការប្រកបការងារ ចិញ្ចឹមជីវិត ប្រពៃណី ជំនឿ សាសនា ភ្លៀង ផ្គរ រន្ទះជាដើម៕
© រក្សាសិទ្ធិដោយ thmeythmey.com