ភ្នំពេញ៖ ក្រសួងកសិកម្ម រក្ខាប្រមាញ់ និងនេសាទ កំពុងតាមដាន និងត្រួតពិនិត្យការនាំចូលជ្រូកពីប្រទេសវៀតណាម ក្រោយផ្ទុះព័ត៌មានពីជំងឺប៉េស្តជ្រូកអាហ្វ្រិក នៅតាមកសិដ្ឋានមួយចំនួន ក្នុងប្រទេសភាគខាងកើតជាប់កម្ពុជានេះ។ ជំងឺប៉េស្តជ្រូកអាហ្វ្រិកត្រូវបានរកឃើញនៅក្នុងកសិដ្ឋានចំនួនបីដែលស្ថិតក្នុងខេត្ត Hung Yen និង ខេត្ត Thai Binh ភាគអាគ្នេយ៍នៃទីក្រុងហាណូយ ប្រទេសវៀតណាម កាលពីថ្ងៃទី១៩ កុម្ភៈ។
លោក តាន់ ផាន់ណារ៉ា ប្រធានអគ្គនាយកដ្ឋានសុខភាពសត្វ និងផលិតកម្មសត្វ បាននិយាយថា ក្រសួងបានប្រាប់ដល់មន្ត្រីពាក់ព័ន្ធគ្រប់ខេត្ត-ក្រុងទាំងអស់ ឲ្យពង្រឹងការត្រួតពិនិត្យលើការនាំចូលជ្រូកពីប្រទេសវៀតណារបស់ឈ្មួញ។ ជាពិសេសការពិនិត្យមើលលិខិតបញ្ជាក់ពីពេទ្យសត្វវៀតណាម ដែលធានាថាជ្រូកទាំងនោះគ្មានជំងឺ និងមកពីតំបន់សុវត្ថិភាព ទើបអនុញ្ញាតឲ្យនាំចូលមកកម្ពុជា។បើតាមលោក ផាន់ណារ៉ា បច្ចុប្បន្ននេះប្រទេសកម្ពុជាមិនមានជំងឺប្រភេទនឹងនោះទេ ហើយការនាំចូលខុសច្បាប់ក្នុងដើមឆ្នាំនេះក៏មិនមានដែរ។
ប្រធានអគ្គនាយកដ្ឋានសុខភាពសត្វ និងផលិតកម្មសត្វរូបនេះ បានថ្លែងប្រាប់សារព័ត៌មានថ្មីៗតាមទូរស័ព្ទថា៖« ជំងឺប៉េស្តជ្រូកអាហ្វ្រិក កាលណាជ្រូកហ្នឹងឈឺ វានឹងមានលក្ខណៈចេញនៅក្រោមពោះ មានពណ៌ស្វាយ ជំងឺហ្នឹងវាស្រួលមើល។ ប្រសិនរកឃើញត្រូវយកទៅដុតចោលភ្លាម»។
លោក លី ឡាវីល អ្នកគ្រប់គ្រងទូទៅនៅកសិដ្ឋានចិញ្ចឹមជ្រូករបស់លោក ម៉ុង ឫទ្ធី និងជាក្រុមប្រឹក្សាភិបាលនៃសមាគមន៍អ្នកចិញ្ចឹមសត្វកម្ពុជា បានស្នើឲ្យរដ្ឋាភិបាលបង្កើនការប្រុងប្រយ័ត្នលើការត្រួតពិនិត្យជ្រូកនាំចូលពីប្រទេសវៀតណាម ព្រោះប្រសិនបើជំងឺនេះចូលមកដល់កម្ពុជា គឺជ្រូកនៅតាមកសិដ្ឋានប្រឈមនឹងងាប់១០០ភាគរយ។
ត្រង់ចំណុចនេះលោក តាន់ ផាន់ណារ៉ា បានសង្កត់ធ្ងន់ថា មន្ត្រីជំនាញក៏កំពុងតាមដានស្ថានភាពជំងឺប៉េស្តជ្រូកអាហ្វ្រិកនៅប្រទេសវៀតណាមនេះយ៉ាងយកចិត្តទុកដាក់ ហើយបើសិនជាជំងឺនេះ រីករាលដាលកាន់តែធំនោះ ក្រសួងនឹងបិទការនាំចូលជ្រូកពីប្រទេសវៀតណាមតែម្ដង។ ទន្ទឹមនឹងក្តីព្រួយបារម្ភនេះ លោក ផាន់ណារ៉ា ក៏បានប្រាប់ឲ្យក្រុមហ៊ុននាំចូលជ្រូក ផ្អាកការនាំចូលពីប្រទេសវៀតណាមសិន ហើយងាកទៅយកជ្រូកពីប្រទេសថៃវិញ។
លោកបាននិយាយថា៖« ប្រសិនជំងឺនេះកាន់តែខិតជិតប្រទេសយើង យើងនឹងចេញលិខិតមួយបិទការនាំចូលពីប្រទេសក្រៅ។ ឥឡូវជំងឺនេះកើតនៅទីក្រុងហាណូយ ក្បែរប្រទេសចិននៅឆ្ងាយណាស់។ កាលណាមកដល់ទីក្រុងហូជីមិញ យើងនឹងចេញលិខិតបិទតែម្ដង»។
ប្រធានអគ្គនាយកដ្ឋានសុខភាពសត្វ បាននិយាយថា បច្ចុប្បន្នកម្ពុជានាំចូលជ្រូកក្នុងមួយថ្ងៃចំនួន ១៥០០ ឬ ២០០០ ក្បាល ខណៈការផលិតក្នុងស្រុកមានដល់ទៅ ៨១ ភាគរយ។« យើងមិនអាចបិទការនាំចូលភ្លាមៗនោះទេ បើបិទ សាច់ជ្រូកនឹងឡើងថ្លៃ ដែលអាចប៉ះពាល់ដល់ប្រជាពលរដ្ឋ ១៦លាននាក់ ដូច្នេះយើងត្រូវធ្វើការសម្របសម្រួលបញ្ហានេះ យើងបានប្រាប់ក្រុមហ៊ុនបើអាចបង្វិលការនាំចូលពីថៃវិញ ដើម្បីកុំឲ្យមានបញ្ហាសាច់ជ្រូកឡើងថ្លៃ»។ នេះបើតាមលោក ផាន់ណារ៉ា។
ចំណែកប្រជាកសិករ ដែលប្រកបមុខរបរចិញ្ចឹមជ្រូកទាំងអស់គ្នាសូមចូលរួមបង្កាហានិភ័យនេះ ហើយបើមានករណីនេះកើតឡើងនៅតំបន់ណា សូមកុំលាក់ព័ត៌មានដោយត្រូវតែយកសត្វនោះទៅកប់ចោល និងកុំយកទៅលក់នៅលើទីផ្សារ ដែលអាចនាំឲ្យមានបញ្ហាប៉ះពាល់ដល់សុខភាពមនុស្សផងដែរ។ នេះជាការលើកឡើងរបស់លោក ម៉ុង ឫទ្ធី។
កាលពីថ្ងៃទី១៩ ខែកុម្ភៈ អាជ្ញាធរវៀតណាម បានអះអាងថា ជំងឺប៉េស្តជ្រូកអាហ្វ្រិកត្រូវបានរកឃើញនៅក្នុងកសិដ្ឋានចំនួនបីដែលស្ថិតក្នុងខេត្ត Hung Yen និង ខេត្ត Thai Binh ភាគអាគ្នេយ៍នៃទីក្រុងហាណូយ ប្រទេសវៀតណាម។ ដោយសារតែបញ្ហាជំងឺប៉េស្តជ្រូកអាហ្វ្រិកនៅវៀតណាម ទើបបណ្ដាប្រទេសមួយចំនួន ដូចជា តៃវ៉ាន់ ឥណ្ឌូណេស៊ី ហ្វីលីពីន និងចិនជាដើម កំពុងរឹតបន្តឹង និងបិទការនាំចូលជ្រូកពីប្រទេសវៀតណាម៕