ជាតិ
សុខភាព
រដ្ឋាភិបាល ប្រឹងប្រែងលុបបំបាត់ជំងឺគ្រុនចាញ់ឲ្យអស់ នៅឆ្នាំ២០២៥ រូបភាពពីទំព័រហ្វេសប៊ុកសុខាភិបាល
× រដ្ឋមន្រី្តសុខាភិបាលលោក ម៉ម ប៊ុនហេង អះអាងថា លោក នឹងជំរុញដល់មន្ត្រីសុខាភិបាលទូទាំងប្រទេស ឲ្យពង្រឹងអនុវត្តយុទ្ធសាស្ត្រលុបបំបាត់ជំងឺគ្រុនចាញ់ ដើម្បីឈានទៅសម្រេចគោលដៅកម្មវីធីឆ្នាំ២០២៥។ ការអះអាងរបស់លោក ធ្វើឡើងក្នុងសន្និបាតបូកសរុបការងារឆ្នាំ២០១៨ និងលើទិសដៅការងារឆ្នាំ២០១៩ របស់មជ្ឈមណ្ឌលជាតិប្រយុទ្ធប្រឆាំងនឹងជំងឺគ្រុនចាញ់ប៉ារ៉ាស៊ីតសាស្ត្រនិងបាណកសាស្ត្រនៃក្រសួងសុខាភិបាល ដែលរៀបចំ នៅខេត្តសៀមរាប នាថ្ងៃទី២០ ខែកុម្ភៈ ឆ្នាំ២០១៩។
បើតាមទំព័រហ្វេសប៊ុករបស់ក្រសួងសុខាភិបាល លោក ម៉ម ប៊ុនហេង បានថ្លែងក្នុងពិធីសន្និបាតថា ក្នុងឆ្នាំ២០១៨នេះ ពុំមានអ្នកស្លាប់ដោយសារជម្ងឺគ្រុនចាញ់ទេ។ លោករដ្ឋមន្ដ្រី បានលើកឡើងថា ការចូលរួមចំណែកយ៉ាងសកម្មពីមន្ដ្រីពាក់ព័ន្ធនេះ គឺជាភាពចាំបាច់បំផុត ដើម្បីសម្រេចឲ្យបាននូវផែនការយុទ្ធសាស្ត្រជាតិលុបបំបាត់គ្រុនជម្ងឺចាញ់ឆ្នាំ២០១១-២០២៥ ពិសេសគឺក្នុងដំណាក់កាលដំបូង ត្រូវលុបបំបាត់ឲ្យបាននូវជំងឺគ្រុនចាញ់ប្រភេទហ្វាល់ស៊ីប៉ារ៉ូម នាឆ្នាំ២០២០ ព្រមទាំងខិតខំទប់ស្កាត់ការរាតត្បាតរបស់ជំងឺគ្រុនឈាមឲ្យទាន់ពេលវេលា រក្សា និងពង្រីកអត្រាគ្របដណ្តប់ការផ្តល់ថ្នាំទម្លាក់ព្រូនជាសមូហភាពឲ្យនៅខ្ពស់លើសពី៩០%។
ទំព័រហ្វេសប៊ុករបស់ក្រសួងសុខាភិបាល បានសរសេរពីសម្តីរបស់លោក ម៉ម ប៊ុនហេង យ៉ាងដូច្នេះថា៖«ខ្ញុំសុំផ្តួចផ្តើមគំនិតមួយនិងជំរុញឲ្យមន្ត្រីទាំងអស់ត្រូវអនុវត្ត ដោយត្រូវចុះជួបប្រជាជនផ្ទាល់និង ផ្តល់ការអប់រំ ដើម្បីឲ្យមានការផ្លាស់ប្តូរឥរិយាបថ ក្នុងការការពារជំងឺគ្រុនចាញ់ ព្រមទាំងធ្វើតេស្តឈាម និងព្យាបាលភ្លាមៗ ដែលខ្ញុំសុំហៅកាត់ថា METT (Meet and Education for behavior change Test & Treat)។ ជួយគ្រួសារកងទ័ពក្នុងការព្យាបាលជំងឺគ្រុនចាញ់។ ផ្លាស់ប្តូរបទពិសោធគ្នាពីកន្លែងមួយទៅកន្លែងមួយ ក្នុងការលុបបំបាត់ជំងឺគ្រុនចាញ់ជំងឺគ្រុនឈាម។ ត្រូវត្រួតពិនិត្យមើលនៅកន្លែងការដ្ឋានសំណង់ កន្លែងធ្វើឡាន និងបរិវេណជំវិញផ្ទះដើម្បីលុបបំបាត់ជម្រកមូសខ្លាជំងឺដង្កូវព្រូន។ ត្រូវផ្តល់ថ្នាំនិងការអប់រំបន្ថែមដល់សាលារៀនពីបញ្ហាជំងឺដង្កូវព្រូន»។
ទន្ទឹមនឹងនេះ ឆ្នាំ២០១៨ កម្មវិធីជាតិទាំងបី គឺកម្មវិធីជាតិប្រយុទ្ធនឹងជំងឺគ្រុនចាញ់ ជំងឺគ្រុនឈាម និងកម្មវីធីប្រយុទ្ធនឹងជំងឺដង្កូវព្រូន បានធ្វើឲ្យអត្រាស្លាប់នៃជំងឺគ្រុនចាញ់បានចុះទាបជាងសូចនាករផែនការលុបបំបាត់ជំងឺគ្រុនចាញ់ឆ្នាំ២០២០៕
Tag:
ម៉ម ប៊ុនហេង
ខេត្តសៀមរាប
គ្រុនចាញ់
© រក្សាសិទ្ធិដោយ thmeythmey.com