អេ អឹម ខេ សហការជាមួយការិយាល័យឥណទានកម្ពុជា(ស៊ីប៊ីស៊ី) ផ្ដល់សេវាកម្មត្រួតពិនិត្យសុខភាពហិរញ្ញវត្ថុ

អត្ថបទពាណិជ្ជកម្ម

អេ អឹម ខេ សហការជាមួយការិយាល័យឥណទានកម្ពុជា(ស៊ីប៊ីស៊ី) ផ្ដល់សេវាកម្មត្រួតពិនិត្យសុខភាពហិរញ្ញវត្ថុ

20, Feb 2019 , 6:39 pm

រូបភាព

ដោយ: ថ្មីៗ

ក្រុមហ៊ុនអេអឹមខេ ភីអិលស៊ី បានរៀបចំសន្និសីទសាព័ត៌មានមួយ កាលពីពេលកន្លងទៅ ស្ដីពីកិច្ចសហប្រតិបត្តិការ លើការផ្ដល់សេវាត្រួតពិនិត្យសុខភាពហិរញ្ញវត្ថុ រវាងការិយាល័យឥតទានកម្ពុជា (ស៊ីប៊ីស៊ី) បន្ទាប់ពីចុះអនុស្សារណៈយោគយល់គ្នា រវាងស្ថាប័នទាំងពីរ។ សេវាកម្មខាងលើនេះ ត្រូវបានដាក់ឲ្យដំណើរការ នៅតាមបណ្ដាសាខារបស់អេអឹមខេ តាំងតែពីថ្ងៃទី២ ខែមករា ដើមឆ្នាំ២០១៩មកម្ល៉េះ។

ងសន្និសីទសារព័ត៌មាននេះ ក៏មានការចូលរួមផងដេរពី លោក អឿ សុធារ័ត្ន ប្រធាននាយកប្រតិបត្តិនៃការិយាល័យឥណទានកម្ពុជា លោក គា បូរាណ ប្រធាននាយកប្រតិបត្តិនៃគ្រឹះស្ថានមីក្រូហិរញ្ញវត្ថុ អេ អឹម ខេ ភីអិលស៊ី ថ្នាក់ដឹកនាំជាន់ខ្ពស់ទាំងពីរស្ថាប័ន និងអ្នកសារព័ត៌មានជាច្រើន។

លោក អឿ សុធារ័ត្ន ប្រធាននាយកប្រតិបត្តិនៃការិយាល័យឥណទានកម្ពុជា ដែលបានចូលរួមក្នុងសន្និសីតសារព័ត៌មាននោះ បានគូសបញ្ជាក់ថា ក្នុងរយៈពេលជាង៦ឆ្នាំនៃប្រតិបត្តិការ ស៊ីប៊ីស៊ី បានចាប់ផ្តើមនិងផ្តោតចម្បងជាមួយនឹងរបាយការណ៍ឥណទានអតិថិជន ដែលអនុញ្ញាតឱ្យសមាជិករបស់ខ្លួន អាចស្វែងយល់ពីអតិថិជនរបស់ពួកគេ កាន់តែច្បាស់ និងអាចសម្រេចចិត្តដោយប្រសិទ្ធភាព និងការទទួលខុសត្រូវលើការផ្តល់ឥណទាន។ លោក អឿ សុធារ័ត្ន បន្ថែមទៀតថា ប្រព័ន្ធនេះ ក៏បានជួយដល់អតិថិជនទូទៅ ក្នុងការស្នើសុំ និងស្វែងយល់ពីព័ត៌មានឥណទានរបស់ពួកគេ កាន់តែប្រសើរឡើង ដែលនឹងជួយពួកគេក្នុងការត្រៀមខ្លួនសម្រាប់ការស្នើសុំកម្ចី។

មិនតែប៉ុណ្ណោះ ប្រព័ន្ធនេះ ក៏ចូលរួមចំណែកដល់ស្ថិរភាព វិស័យហិរញ្ញវត្ថុ និងសេដ្ឋកិច្ចផងដែរ។ នេះបើតាមលោក លោក អឿ សុធារ័ត្ន ដែលបានបន្តទៀតដូច្នេះ៖«ដោយមើលឃើញពីសារសំខាន់ នៃរបាយការណ៍ឥណទានចំពោះប្រជាជនកម្ពុជា និងដើម្បីផ្តល់ភាពងាយស្រួលដល់ប្រជាជន ដែលរស់នៅតាមបណ្តាខេត្ត ទើបការិយាល័យឥណទានកម្ពុជា បានពង្រីកសេវាត្រួតពិនិត្យសុខភាពហិរញ្ញវត្ថុ ដោយធ្វើកិច្ចសហប្រតិបត្តិអាជីវកម្មជាមួយដៃគូយុទ្ធសាស្ត្រ គឺ គ្រឹះស្ថានមីក្រូហិរញ្ញវត្ថុ អេ អឹម ខេ ភីអិលស៊ី ដែលមានសាខាជាង១៥០ ទូទាំងប្រទេស ក្នុងការផ្តល់សេវាកម្មនេះ។ ជំហ៊ានដំបូង យើងដាក់ឲ្យដំណើរការ នៅតាមសាខារបស់អេអឹមខេ ចំនួន៥ និងគ្រោងពង្រីកឲ្យបានទូទាំងប្រទេស នៅដំណាច់ឆ្នាំ២០១៩នេះ»។

គួររំលឹកថា សេវាត្រួតពិនិត្យសុខភាពហិរញ្ញវត្ថុ គឺជាសេវាកម្មមួយរបស់ស៊ីប៊ីស៊ី ដែលអនុញ្ញាតឲ្យប្រជាពលរដ្ឋទូទៅ អាចពិនិត្យមើលរបាយការណ៍ឥណទាន ឬលទ្ធភាពក្នុងការប្រើប្រាស់ឥណទានដោយខ្លួនឯង តាមរយៈភ្នាក់ងារដៃគូយុទ្ធសាស្ត្ររបស់ស៊ីប៊ីស៊ី។ ដើម្បីប្រើប្រាស់សេវាកម្មនេះ អតិថិជនគ្រាន់តែយកអត្តសញ្ញាណបណ្ណ ឬលិខិតឆ្លងដែនច្បាប់ដើមដែលមានសុពលភាព ហើយអញ្ជើញទៅកាន់សាខាទាំង៥ របស់គ្រឹះស្ថានមីក្រូហិញ្ញវត្ថុ អេអឹមខេ ភីអិលស៊ីដូចជាទីស្នាក់ការកណ្តាល សាខាខណ្ឌពោធិ៍សែនជ័យ សង្កាត់ចោមចៅ៣ សាខាកំពង់ចាម សាខាខេត្តកណ្តាល និងសាខាខេត្តសៀមរាប។

លោក គា បូរាណ ប្រធាននាយកប្រតិបត្តិគ្រឹះស្ថានមីក្រូហិរញ្ញវត្ថុ អេ អឹម ខេ ភីអិលស៊ី ដែលមានវត្តមាននៅក្នុងសន្និសីទសារព័ត៌មាននោះ ក៏បានបញ្ជាក់ផងដែរ ពីក្តីរីករាយរបស់ស្ថាប័នខ្លួន ក្នុងឱកាសនេះ។ លោក គា បូរាណ បានមានប្រសាសន៍ថា អេអឹមខេ មានក្តីសោមនស្សរីករាយជាខ្លាំង ដោយបានចាប់ដៃគូសហប្រតិបត្ដិការ ជាមួយការិយាល័យឥណទានកម្ពុជា(ស៊ីប៊ីស៊ី) ក្នុងការបម្រើសេវាត្រួតពិនិត្យសុខភាពហិរញ្ញវត្ថុដល់ប្រជាជនកម្ពុជា ឱ្យបានរឹតតែទូលំទូលាយ តាមរយៈការស្នើសុំត្រួតពិនិត្យរបាយការណ៍ឥណទានផ្ទាល់ខ្លួន នៅតាមសាខានៃគ្រឹះស្ថានមីក្រូហិរញ្ញវត្ថុ អេ អឹម ខេ។ បើតាមលោក លោក គា បូរាណ បច្ចុប្បន្ន អេអឹមខេ បានផ្តល់សេវាទៅដល់អតិថិជនជាង៧៦ម៉ឺននាក់ និងមានសាខាគ្របដណ្តប់ គ្រប់ស្រុក និងឃុំ ទូទាំងប្រទេស។ «សេវាហិរញ្ញវត្ថុមួយនេះ នឹងជួយដល់អតិថិជន ក្នុងការស្វែងយល់ពីស្ថានភាពហិរញ្ញវត្ថុរបស់ខ្លួន លើកកម្ពស់ចំណេះដឹងផ្នែកហិរញ្ញវត្ថុ និងត្រៀមខ្លួនរួចរាល់ប្រកបដោយការទទួលខុសត្រូវ ក្នុងការទទួលបានប្រាក់កម្ចី ពីស្ថាប័នហិរញ្ញវត្ថុ»។ លោក គា បូរាណ ប្រធាននាយកប្រតិបត្តិគ្រឹះស្ថានមីក្រូហិរញ្ញវត្ថុ អេ អឹម ខេ បានបន្ថែមដូច្នេះ

សូមបញ្ជាក់ផងដែរថា ចាប់តាំងពីបើកដំណើរការជាផ្លូវការនៅឆ្នាំ២០១២ ស៊ីប៊ីស៊ី បានបម្រើដល់សមាជិក និងអតិថិជន ជាមួយនឹងសេវាកម្មស្នូល គឺរបាយការណ៍ឥណទានអតិថិជន។ប្រព័ន្ធនេះ បានចូលរួមចំណែកជាប្រយោជន៍យ៉ាងច្រើន ដល់ភាគីពាក់ព័ន្ធ រួមមានប្រជាជន ស្ថាប័នហិរញ្ញវត្ថុ និងវិស័យហិរញ្ញវត្ថុទាំងមូល៕