អត្ថបទពាណិជ្ជកម្ម
× រយៈពេល ពីរ បី ថ្ងៃនេះ មានព័ត៌មានបែកធ្លាយមួយ បានបង្ហាញនូវរូបភាព Poster មួយសន្លឹកថា ជាកម្មសិទ្ធិរបស់ក្រុមហ៊ុន OPPO ដែលត្រូវបានលេចធ្លាយ តាមអ៊ីធឺណិត។ ក្នុងរូបភាពនោះ គឺបានបង្ហាញរូបរាងស្មាតហ្វូនជំនាន់ថ្មីមួយម៉ូឌែលទៀត ដែលមានឈ្មោះថា F11 Pro ដ៏ទាក់ទាញ ជាមួយអេក្រង់លាតសន្ធឹង គ្មានចន្លោះឆក ហើយមានភាពស្រដៀងគ្នាបន្តិច ទៅនឹងម៉ូឌែល OPPO Find X អីចឹងដែរ។ ចំណែកការរចនាកាមេរ៉ានៅខ្នងខាងក្រោយវិញ គឺស្ថិតនៅចំជួរកណ្តាលតែម្តង ក្នុងរាងបញ្ឈរចុះក្រោម ជាមួយកាណុងកាមេរ៉ាភ្លោះ អមដោយ Flash LED នៅខាងលើថែមទៀតផង។ វាមើលទៅ ហាក់មានទ្រនាប់សេនស័រ ស្កេនម្រាមដៃ នៅខាងក្រោមកាមេរ៉ាដូច្នោះដែរ។
នៅក្នុងរូបភាព Posterនោះ បានសរសេរបញ្ជាក់បន្ថែមទៀតថា ទំហំកាមេរ៉ាខាងក្រោយខ្នងវានោះ មានទំហំ 48 MP និងមានពាក្យស្លោកជាភាសាអង់គ្លេសថា Brilliant portrait in low light ដែលមានន័យថា កាមេរ៉ាខាងក្រោយនៃស្មាតហ្វូននេះ នឹងមានមួយគ្រាប់ទំហំ 48 MP ដែលវាអាចនឹងប្រើប្រាស់សេនស័រ Samsung ISOCELL GM1 ឬ Sony IMX586 ជាដើម។ ស្របពេលជាមួយគ្នានោះដែរ ស្រាប់តែមានរូបភាពវីដេអូមួយ បានលេចធ្លាយមកថ្មីថែមទៀត ជាមួយការបង្ហាញតួខ្លូន បង្ហាញផ្នែកខ្នងខាងក្រោយរបស់ស្មាតហ្វូន OPPO ម៉ូឌែល F11 Pro ថ្មីហ្នឹងតែម្តង ដែលមានពីរពណ៌ដ៏ទាក់ភ្នែកអ្នកដែលបានមើលវីដេអូនេះ។
ដោយមានរូបភាព Poster និងវីដេអូ អះអាងដូចគ្នាបែបនេះ ទើបអ្នកប្រើប្រាស់ស្មាតហ្វូនមួយចំនួនធំ បានសន្មត់ថា វាជា F11 Pro តែម្តង។ តាមរយៈរូបភាពដែលបានថតនេះ គឺបានបង្ហាញពីជម្រើសពណ៌លើ OPPO F11 Pro ចំនួន ២ពណ៌ជាប្រភេទ Gradient Color រួមមានពណ៌ខៀវ និងពណ៌ស្វាយលាយពណ៌ទឹកប៊ិចបន្តិចៗ ដែលមើលទៅស្រឡះភ្នែកតែម្តង។
ដើម្បីឲ្យដឹងច្បាស់ សូមទស្សនារូបភាពខាងក្រោមនេះទាំងអស់គ្នា៖
និយាយរួមទាំងអស់នេះ គ្រាន់តែជារូបភាពព័ត៌មានបែកធ្លាយ ដែលបានបង្ហាញពីរចនាបថ និងរូបរាងពិត ព្រមទាំងជម្រើសពណ៌ លើទូរសព្ទ OPPO ម៉ូឌែល F11 Pro ថ្មីប៉ុណ្ណោះ ប៉ុន្តែយើងខ្ញុំក៏មិនទាន់ហ៊ានសន្និដ្ឋាន និង កំណត់បានទេថា វានឹងមានត្រឹមតែ ២ពណ៌បែបនេះ ឬមានច្រើនលើសពីនេះទៀត។ យើងក៏មិនដឹងដែរថា រូបរាងបែបនេះ ពិតប្រាកដឬអត់ ព្រោះវាជាព័ត៌មានបែកធ្លាយ ដែលចែកចាយបន្តគ្នាប៉ុណ្ណោះ។ ដើម្បីឲ្យកាន់តែដឹងច្បាស់ មានតែរង់ចាំតាមដាន ការបង្ហាញខ្លួនជាផ្លូវការ ពីក្រុមហ៊ុន OPPO ប៉ុណ្ណោះ ទើបអាចជឿជាក់បាន៕
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com