ជាតិ
សង្គមជាតិ
មនុស្សទៅពិគ្រោះ និងចាក់ថ្នាំបង្ការជំងឺឆ្កែឆ្កួតកាន់តែច្រើន នាយកប៉ាស្ទ័រអះអាងថាវ៉ាក់សាំងមានគ្រប់ចំនួន
×![]()
ភ្នំពេញ៖ នាយកវិទ្យាស្ថានប៉ាស្ទ័រកម្ពុជា បានអះអាងថា វ៉ាក់សាំងបង្ការជំងឺឆ្កែឆ្កួត មានគ្រប់ចំនួនសម្រាប់ផ្គង់ផ្គង់ ដោយមិនមានបញ្ហាអ្វីនោះឡើយ។ លោក Didier Fontenille បានបញ្ជាក់យ៉ាងដូច្នេះ បន្ទាប់ពីមនុស្សជាច្រើនបាននាំគ្នាទៅពិគ្រោះជំងឺនៅស្ថាប័នរបស់លោក។ 
«វិទ្យាស្ថានប៉ាស្ទ័រយើងខ្ញុំ កំពុងព្យាយាមធ្វើឲ្យល្អបំផុតសម្រាប់អ្នកគ្រប់គ្នា និងសូមផ្តល់អាទិភាពពិគ្រោះជូនអ្នកដែលអញ្ជើញមកចាក់បន្ត (លើកទី២ និងទី៣) អ្នកដែលមានមុខរបួសដោយឆ្កែខាំធ្ងន់ធ្ងរ កុមារតូចៗ ព្រះសង្ឃ ជនពិការ មនុស្សចាស់ជរា និងស្ត្រីមានផ្ទៃពោះ»។ នេះជាការពន្យល់របស់ លោក Didier Fontenille នាយកវិទ្យាស្ថានប៉ាស្ទ័រកម្ពុជា។
លោក Didier បានបន្ថែមថា មជ្ឈមណ្ឌលចាក់ថ្នាំបង្ការជំងឺឆ្កែឆ្កួតនៃវិទ្យាស្ថានប៉ាស្ទ័រកម្ពុជា មានវ៉ាក់សាំងគ្រប់ចំនួនសម្រាប់ផ្គត់ផ្គង់ ប៉ុន្តែលោកសុំការអធ្យាស្រ័យចំពោះសេវាកម្មយឺតយ៉ាវ ដោយសារតែចំនួនមនុស្សដែលទៅពិគ្រោះជំងឺ មានចំនួនច្រើន។
នារយៈពេលចុងក្រោយ ពលរដ្ឋជាច្រើនបានសម្រុកទៅចាក់ថ្នាំបង្ការ នៅវិទ្យស្ថានប៉ាស្ទ័រ។ ការសម្រុកទៅចាក់ថ្នាំបង្ការរបស់ពលរដ្ឋនេះ ធ្វើឡើងក្រោយមានករណីក្មេងស្រីម្នាក់បានស្លាប់ដោយសារឆ្មាខាំ កាលពីថ្ងៃទី១៣ ខែកុម្ភៈ នៅក្រុងបាវិត ខេត្តស្វាយរៀង។ ក្មេងស្រីរូបនេះត្រូវឆ្មាខាំតាំងពីដើមខែធ្នូ ឆ្នាំ២០១៨ ប៉ុន្តែឪពុកម្ដាយមិនបានចាក់ថ្នាំការពារ នៅវិទ្យាស្ថានប៉ាស្ទ័រទេ។
ជាមួយគ្នានេះផងដែរ លោក Didier ស្នើសាធារណជនជឿទុកចិត្តលើការណែនាំរបស់ក្រុមការងារ និងក្រុមគ្រូពេទ្យរបស់វិទ្យាស្ថានប៉ាស្ទ័រ ជាជាងព័ត៌មានមិនពិតមួយចំនួននៅលើបណ្តាញសង្គម៕
Tag:
ឆ្កែឆ្កួត
© រក្សាសិទ្ធិដោយ thmeythmey.com
