ជាតិ
សម្តេច ហ៊ុន សែន ៖ «អ្នកខ្លះរិះគន់ទីក្រុងមិនស្អាត ខណៈខ្លួននៅបោះចោលសំរាមផ្ដេសផ្ដាស»
× សម្តេច ហ៊ុន សែន ស្នើឲ្យប្រជាពលរដ្ឋចូលរួមថែរក្សាបរិស្ថានទាំងអស់គ្នា ដើម្បីទាក់ទាញភ្ញៀវទេសចរ ហើយមិនចាំបាច់អង្គុយតែរិះគន់លើបញ្ហាសំរាមឡើយ។
ថ្លែងក្នុងពិធីប្រារព្ធទីក្រុងស្អាតលើកទី៧ សម្ដេច ហ៊ុន សែន ស្នើឲ្យពលរដ្ឋចូលរួមការពារបរិស្ថាន និងសម្អាតមូលដ្ឋានរបស់ពួកគេឲ្យបានស្អាត ដោយមិនមែនពឹងផ្អែកតែលើអ្នកបោសសំរាមនោះទេ។ « តើមនុស្សប៉ុន្មានលាននាក់មកកម្សាន្តសប្បាយ ហើយបោះបង់ចោលនូវអ្វីដែលខ្លួនទទួលទាន ឬប្រើប្រាស់រួចហើយ មិនទាំងដាក់ទៅក្នុងធុងសំរាមដែលមានរួចស្រេច ហើយទុកឲ្យអ្នកបោសសម្អាតតែប៉ុន្មានរយ ប៉ុន្មានពាន់នាក់។ តើបោសសម្អាតឈ្នះទេ? »។ នេះជាការលើកឡើងរបស់សម្ដេច ហ៊ុន សែន។
ប្រមុខរដ្ឋាភិបាល ក៏បានចំអកឲ្យមនុស្សមួយចំនួន ដែលតែងតែរិះគន់លើបញ្ហាទីក្រុងមិនស្អាត ប៉ុន្តែអ្នកទាំងនោះទៅវិញទេ ដែលនាំគ្នាបោះចោលសំរាម និងថងប្លាស្ទិកផ្ដេសផ្ដាស។ ត្រង់ចំណុចនេះ នាយករដ្ឋមន្ត្រី ក៏បានស្នើឲ្យបង្កើតចលនាជាតិចាប់ពីកុមារ រហូតដល់មនុស្សធំពេញវ័យ ដើម្បីចូលរួមថែរក្សាបរិស្ថាន និងទាក់ទាញភ្ញៀវទេសចរមកទស្សនាកម្ពុជាកាន់តែច្រើន៕
© រក្សាសិទ្ធិដោយ thmeythmey.com