រយៈពេល៦ខែ ឧត្តមក្រុមប្រឹក្សាពិគ្រោះ និងផ្តល់យោបល់ បានចុះដោះស្រាយបញ្ហាពលរដ្ឋជាង១០០លើក

ជាតិ

សង្គមជាតិ

រយៈពេល៦ខែ ឧត្តមក្រុមប្រឹក្សាពិគ្រោះ និងផ្តល់យោបល់ បានចុះដោះស្រាយបញ្ហាពលរដ្ឋជាង១០០លើក

28, Feb 2019 , 10:38 am

រូបភាព

ដោយ: ធឿន បញ្ញាឬទិ្ធ

ភ្នំពេញ៖ ដូចការគ្រោងទុក សម្ដេចនាយករដ្ឋមន្ត្រី ហ៊ុន សែន បានបើកកិច្ចប្រជុំជាមួយសមាជិកឧត្តមក្រុមប្រឹក្សាពិគ្រោះ និងផ្តល់យោបល់ នៃគណបក្សនយោបាយទាំង១៦ ដើម្បីពិនិត្យទៅលើសមិទ្ធផលការងារ និងបញ្ហាប្រឈមដែលត្រូវដោះស្រាយ ក្នុងសកម្មភាពការងាររយៈពេល៦ខែនេះ។

ប្រធានលេខាធិការដ្ឋាននៃឧត្តមក្រុមប្រឹក្សាពិគ្រោះ និងផ្តល់យោបល់ លោក ឈឹម ផលវរុណ ដែលបានស្រង់របាយការណ៍នានាក្នុងកិច្ចប្រជុំនេះ បានរៀបរាប់ថា ក្រោយពីចាប់ដំណើការងាររយៈពេល៦ខែនេះ ក្រុមប្រតិភូពីគណបក្សនយោបាយទាំង១៦ បានចុះបេសកកម្មទៅតាមបណ្តាខេត្ត ដើម្បីដោះស្រាយបញ្ហាបានជាង ១០០លើក។ ក្រៅពីនេះក្រុមការងារឧត្តមក្រុមប្រឹក្សាពិគ្រោះ និងផ្ដល់យោបល់ បានបើកកិច្ចប្រជុំសរុប ១៣លើក ដោយក្នុងនោះការប្រជុំជាទៀងទាត់ចំនួន៦លើក ជារៀងរាល់ខែម្តង រួមទាំងការពិនិត្យទៅលើសេចក្តីព្រាងច្បាប់ និងព្រាងគោលនយោបាយជាតិចំនួន ៤ លើក និងការកោះអញ្ជើញតំណាងក្រសួងមកឆ្លើយបំភ្លឺលើបញ្ហានានា ចំនួន៣លើកផងដែរ។

បើតាមលោក ឈឹម ផលវរុណ បេសកកម្មជាង ១០០លើក ដែលសមាជិកឧត្តមក្រុមប្រឹក្សាពិគ្រោះ និងផ្ដល់យោបល់ចុះដោះស្រាយនោះ ភាគច្រើនពាក់ព័ន្ធនឹងបញ្ហាជម្លោះដីធ្លី ហើយពួកគេបានបញ្ជូនរបាយការណ៍នេះ ដាក់ទៅសម្តេច ហ៊ុន សែន ពិនិត្យមុនចេញដំណោះស្រាយហើយ។

តាមរយៈការចុះផ្សាយរបស់ក្រសួងព័ត៌មាន ដែលបានស្រង់សម្តីប្រធានលេខាធិការដ្ឋាននៃឧត្តមក្រុមប្រឹក្សាពិគ្រោះ និងផ្តល់យោបល់រូបនេះ បានសរសេរដូច្នេះថា៖« សមាជិកឧត្តមក្រុមប្រឹក្សាពិគ្រោះ និងផ្តល់យោបល់ ក៏បានរកឃើញផងដែរថា ទាំងជម្លោះដីធ្លី បទល្មើសនេសាទនិងបទល្មើសព្រៃឈើជាដើម សុទ្ធតែមានជាប់ពាក់ព័ន្ធជាមួយបុគ្គលជាមន្ត្រីទាំងនៅថ្នាក់ជាតិ និងនៅតាមមូលដ្ឋាន»។

ក្នុងកិច្ចប្រជុំរវាងសម្ដេច ហ៊ុន សែន និងសមាជិកឧត្តមក្រុមប្រឹក្សាពិគ្រោះ និងផ្ដល់យោបល់នេះ ផ្ដោតលើរបៀបវារៈមួយចំនួនរួមមាន៖ ទី១ ពាក់ព័ន្ធទៅនឹងទស្សនៈវិស័យនៃការប្រមូលធាតុចូលជាក់ស្តែងនៃការងាររបស់ឧត្ដមក្រុមប្រឹក្សាពិគ្រោះនិងផ្តល់យោបល់នៅក្នុងរយ:ពេល១ឆមាសកន្លងមក។ ទី២ ការផ្តល់មតិនិងសំណូមពរពាក់ព័ន្ធទៅនឹងបញ្ហា ដែលអនុវត្ត៦ ខែកន្លងមក ។ជាពិសេសបញ្ហាជាក់ស្ដែងនៃការវាយតម្លៃទៅលើចំណុចវិជ្ជមាន ចំណុចអវិជ្ជមាន ក៏ដូចជាការរកឃើញនូវតម្រុយភាពអសកម្មអំពើពុករលួយ និងការរំលោភអំណាច ។ ទី៣ សម្តេច ហ៊ុន សែន នឹងបង្ហាញអំពីទស្សនវិស័យការងារ តបទៅនឹងសកម្មភាពអនុវត្ត៦ខែ របស់ក្រុមការងារឧត្តមក្រុមប្រឹក្សាពិគ្រោះ និងផ្ដល់យោបល់ រួមទាំងទស្សនវិស័យ នៃប្រសិទ្ធភាពការងារសម្រាប់រយៈពេល ៦ ខែ ឬ ១ឆ្នាំទៅមុខទៀត ។

កិច្ចប្រជុំនេះ នឹងរៀបចំឲ្យដូចជាកិច្ចប្រជុំគណៈរដ្ឋមន្ត្រីដែរ ដោយមានការតភ្ជាប់វីដេអូ Conference ទៅកាន់តាមបណ្តាខេត្ត ដើម្បីជួបពិភាក្សាជាមួយអាជ្ញាធរពាក់ព័ន្ធ ក៏ជាមេកងកម្លាំងនានា ក្នុងការរកដំណោះស្រាយលើបញ្ហា ដែលសមាជិកឧត្តមក្រុមប្រឹក្សាពិគ្រោះយោបល់ បានរកឃើញក្នុងរយៈពេល៦ខែមកនេះ។ នេះបើតាមសម្ដេច ហ៊ុន សែន ប្រកាសកន្លងមក។

បច្ចុប្បន្នសមាជិកឧត្តមក្រុមប្រឹក្សាពិគ្រោះយោបល់ មានចំនួន៣២រូប ដែលមកពីគណបក្សនយោបាយចំនួន១៦ ហើយមានឋានៈស្មើទេសរដ្ឋមន្ត្រី និងរដ្ឋមន្ត្រី សម្រាប់ទទួលបានអំណាចគ្រប់គ្រាន់ ក្នុងការចុះបំពេញការងារ និងដោះស្រាយបញ្ហាជូនពលរដ្ឋ។ គ្រប់តំណាងគណបក្ស អាចធ្វើជាប្រធាននៃក្រុមប្រឹក្សានេះម្តងម្នាក់ ក្នុងរយៈពេលមួយខែ។ ក្រុមប្រឹក្សាខាងលើ ត្រូវបើកកិច្ចប្រជុំម្តងក្នុងរយៈពេលមួយខែ និងក្នុងរយៈពេល៦ខែ ត្រូវជួបជាមួយនាយករដ្ឋមន្ត្រី (សម្តេច ហ៊ុន សែន) ម្តង។ វិមានសន្តិភាព ជាកន្លែងសម្រាប់ប្រជុំរបស់ក្រុមប្រឹក្សានេះ។ គួរបញ្ជាក់ថា ឧត្តមក្រុមប្រឹក្សាពិគ្រោះនិងផ្តល់យោបល់ត្រូវបានបង្កើតឡើងកាលពីខែកញ្ញា ឆ្នាំ ២០១៨ តាមគំនិតផ្តួចផ្តើមរបស់សម្តេច ហ៊ុន សែន ក្រោយពេលការបោះឆ្នោតជាតិអាណត្តិទី៦៕