ជាតិ
សេដ្ឋកិច្ច
រូបពីក្រសួងរៀបចំដែនដី នគរូបនីយកម្ម និងសំណង់
×![]()
ដោយ: ភួង វ៉ាន់ថា
ភ្នំពេញ៖ រដ្ឋាភិបាលជប៉ុន សន្យាជួយគាំទ្រកសាងទីក្រុងឆ្លាតវៃដល់កម្ពុជា ដោយជ្រើសរើសយកទីក្រុង៣ជាគំរូ រួមមានទីក្រុងភ្នំពេញ, ក្រុងបាត់ដំបង, និងសៀមរាប។ នេះបើតាមការលើកឡើងរបស់រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់។
រាជរដ្ឋាភិបាលកម្ពុជា កំពុងពង្រឹងការគ្រប់គ្រងនគរូបនីយកម្ម និងការអភិវឌ្ឍទីក្រុង តាមគោលការណ៍ទីក្រុងឆ្លាតវៃ តាមរយៈការអនុវត្តយុទ្ធសាស្ត្រចតុកោណដំណាក់កាលទី៤ រួមទាំងច្បាប់ និងបទដ្ឋានបច្ចេកទេសពាក់ព័ន្ធនានា ដើម្បីឆ្លើយតបទៅនឹងកំណើនប្រជាជន និងការអភិវឌ្ឍសេដ្ឋកិច្ច។
លោក ជា សុផារ៉ា រដ្ឋមន្ត្រីក្រសួងរៀបចំដែនដី បាននិយាយដូច្នេះថា៖« រាជរដ្ឋាភិបាលបានសម្រេចដាក់ឲ្យអនុវត្តគោលនយោបាយជាតិ ស្តីពីការរៀបចំដែនដីដោយបានកំណត់ច្បាស់អំពីតំបន់ដែលមានសក្តានុពលសម្រាប់ការបឲអនុវត្ត និងការអភិរក្សធនធានធម្មជាតិ»។
ជាមួយគ្នានេះលោក ជា សុផារ៉ា បានសង្កត់ធ្ងន់ថា រដ្ឋាភិបាលជប៉ុន តាមរយៈលោក YUKI Fumihiko អនុរដ្ឋមន្ត្រីជប៉ុន នឹងជួយគាំទ្រការផ្ដួចផ្តើម ដល់ការរៀបចំបង្កើតបណ្ដាញទីក្រុងឆ្លាតវៃអាស៊ាន ក្នុងនោះមានទីក្រុងភ្នំពេញ ក្រុងបាត់ដំបង និងសៀមរាប។
រដ្ឋាភិបាលជប៉ុន បានជួយអភិវឌ្ឍកម្ពុជា តាមរយៈសមិទ្ធផលជាច្រើនមានដូចជា ហេដ្ឋារចនាសម្ព័ន្ធ ផ្លូវ ស្ពាន ទឹកស្អាត ប្រព័ន្ធធារាសាស្ត្រ ប្រព័ន្ធការពារទឹកជំនន់ កំពង់ផែ និងជួយបណ្ដុះបណ្ដាលមន្ត្រីរាជការជាដើម។
បើតាមលោក ជា សុផារ៉ា ជប៉ុននឹងបញ្ជូនអ្នកបច្ចេកទេសមកសិក្សា និងដំឡើងផ្កាយរណបគាំទ្រដល់ការងាររៀបចំស្ថានីយវាស់វែងអចិន្ត្រៃយ៍នៅកម្ពុជា ដើម្បីបម្រើដល់ការវាស់វែង និងផលិតផែនទី នាពាក់កណ្តាល ខែមីនា ឆ្នាំ២០១៩។ រដ្ឋាភិបាលជប៉ុន នឹងរៀបចំកិច្ចប្រជុំមន្ត្រីជាន់ខ្ពស់នៃបណ្តាញទីក្រុងឆ្លាតវៃអាស៊ាន ដើម្បីពិភាក្សាអំពីការរីកចម្រើន ចែករំលែកបទពិសោធន៍ និងដោះស្រាយបញ្ហាប្រឈម នាខែតុលា ឆ្នាំ២០១៩ខាងមុខនេះ នៅទីក្រុងតូក្យូ ប្រទេសជប៉ុន។ នេះបើយោងតាមសេចក្តីប្រកាសរបសក្រសួងកាលពីថ្ងៃទី ២៧ ខែកុម្ភៈ ឆ្នាំ ២០១៩។
បន្ថែមពីនេះក្រសួងរៀបចំដែនដី នគរូបនីយកម្ម និងសំណង់ និងក្រសួងដីធ្លី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន គ្រោងនឹងរៀបចំវេទិកាសាធារណឯកជន ស្តីពីការអភិវឌ្ឍនគរូបនីយកម្មកម្ពុជា-ជប៉ុនលើកទី២ នៅខេត្តសៀមរាប នាឆ្នាំ ២០២០ខាងមុខទៀតផង។
គួររម្លឹកថា ទីក្រុងឆ្លាតអាស៊ាន ត្រូវបានមេដឹកនាំទាំងអស់ ដែលជាសមាជិកអាស៊ានឯកភាពគ្នា បង្កើតឡើងតាមសំណើរបស់នាយករដ្ឋមន្ត្រីសិង្ហបុរី លោក Lee Hsien Loong នៅក្នុងអំឡុងពេលកិច្ចប្រជុំកំពូលអាស៊ានលើកទី ៣២ ដែលបានប្រារព្ធធ្វើឡើងនៅប្រទេសសិង្ហបុរី កាលឆ្នាំ២០១៨៕
Tag:
ភួង វ៉ាន់ថា
© រក្សាសិទ្ធិដោយ thmeythmey.com
