អ្នកទីក្រុងកាន់តែច្រើនងាកមកដាំបន្លែលក្ខណគ្រួសារ!

ជាតិ

អ្នកទីក្រុងកាន់តែច្រើនងាកមកដាំបន្លែលក្ខណគ្រួសារ!

07, Mar 2019 , 11:15 am

រូបភាព

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ ប្រជាពលរដ្ឋមួយចំនួនក្នុងរាជធានីភ្នំពេញ បានចាប់អារម្មណ៍នឹងការដាំបន្លែលក្ខណគ្រួសារ ដែលជួយកាត់បន្ថយការចំណាយ និងជួយដល់សុខភាព។ លោក យ៉ង សាំងកុមារ អ្នកជំនាញកសិកម្ម បញ្ជាក់ថា ក្រោយរៀបចំសិក្ខាសាលាចំនួន ៣លើក ទាក់ទងនឹង «សួនដំណាំគ្រួសារ» ពលរដ្ឋក្នុងទីក្រុងបានងាកមកចូលរួម និងចាប់អារម្មណ៍លើការដាំដំណាំនៅជុំវិញផ្ទះដែលនេះជាការល្អ ក្នុងការជួយដល់សុខភាព, បរិស្ថាន និងកាត់បន្ថយការចំណាយរបស់ពួកគាត់។

នៅថ្ងៃទី ១០ មីនានេះ មជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា ហៅកាត់ថា អង្គការសេដាក នឹងរៀបចំសិក្ខាសាលាស្ដីពី «សួនដំណាំគ្រួសារ» ដែលបណ្ដុះបណ្ដាលដោយលោកបណ្ឌិត យ៉ង សាំងកុមារ។ «សួនដំណាំគ្រួសារ» ផ្ដល់ប្រយោជន៍ជាច្រើនដល់កសិករ និងក្រុមគ្រួសារ ដែលប្រើប្រាស់ផ្ទៃដីរបស់ខ្លួនបង្កើតជាសួនដំណាំ ក្នុងការចូលរួមកាត់បន្ថយការចំណាយ, ផ្ដល់សុខភាពល្អ និងទទួលបានបន្លែសុវត្ថិភាពផងដែរ។

តាមរយៈសិក្ខាសាលា «សួនដំណាំគ្រួសារ» លោក-អ្នក នឹងទទួលបានអត្ថប្រយោជន៍ជាច្រើនរួមមាន យល់ដឹងពីរបៀបផលិត និងប្រើប្រាស់ជីធម្មជាតិ, ផលប្រយោជន៍សួនដំណាំគ្រួសារដល់សុខភាព មិត្តភាព ចំណេះដឹង និងលុយ, គោលការណ៍ និងបច្ចេកទេសក្នុងការដាំដំណាំ, យល់ដឹងពីរបៀបជ្រើសរើសប្រភេទដំណាំធ្វើសួនគ្រួសារ និងការផ្ដល់ជូនឯកសារផងដែរ។ សិក្ខាសាលា «សួនដំណាំគ្រួសារ» នេះ ចាប់ផ្ដើមពីម៉ោង៨: ៣០ព្រឹក ដល់ម៉ោង ៤ល្ងាច នៅភោជនីយដ្ឋានអូក្រា។ សម្រាប់តម្លៃសំបុត្រចូលរួមក្នុងសិក្ខាសាលានេះ គឺវិភាគទានតាមការស្ម័គ្រចិត្តរបស់លោក-អ្នក៕