ជាតិ
សង្គមជាតិ
លោក ជា សុផារ៉ា បង្កើតក្រុមការងារស្រាវជ្រាវករណីទំនាស់ដីធ្លីក្នុងខេត្តព្រះសីហនុ
× លោក ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្មនិងសំណង់ បានសម្រេចបង្កើតក្រុមការងារចុះត្រួតពិនិត្យ និងស្រាវជ្រាវករណីវិវាទដីធ្លី ស្ថិតក្នុងតំបន់ពយម៉ាចូវ និង តំបន់ព្រែកទឹកសាបក្បាលឆាយ ខេត្តព្រះសីហនុ។ ក្នុងនោះមានពាក់ព័ន្ធជាមួយនឹងសាលដីសម្រេចរបស់តុលាការកំពូលផងដែរ។ នេះបើយោងតាមសេចក្តីសម្រេចមួយដោយក្រសួងដែនដី កាលពីថ្ងៃទី៧ ខែមិនា ឆ្នាំ២០១៩។
រដ្ឋមន្ត្រីក្រសួងដែនដីរូបនេះ បានផ្ដល់សិទ្ធិដល់ក្រុមការងារមានលទ្ធភាពពិនិត្យស្ថានភាពវិវាតដីធ្លីពាក់ព័ន្ធនឹងសាលដីការលេខ៣៤៨ឈ ចុះថ្ងៃទី២១ ខែវិច្ឆិកា ឆ្នាំ២០១៧របស់តុលាការកំពូល ដែលស្ថិននៅភូមិ គគីរ ឃុំបិតត្រាំង ស្រុកព្រៃនប់ ខេត្តព្រះសីហនុ។ កំណត់អត្តសញ្ញាណកម្មដី និង អត្តសញ្ញាណកម្ម ប្រជាពលរដ្ឋពាក់ព័ន្ធនឹងដី ដែលរាជរដ្ឋាភិបាលបានកាត់ចេញពីតំបន់ប្រើប្រាស់ច្រើនយ៉ាងព្រែកទឹកសាបក្បាលឆាយ ស្ថិតនៅភូមិ១ សង្កាត់២ ក្រុងព្រះសីហនុ ខេត្តព្រះសីហនុ។ សហការជាមួយអាជ្ញាធរដែនដី រដ្ឋបាលខេត្តព្រះសីហនុ និង ស្ថាប័នពាក់ព័ន្ធ ពិនិត្យស្រាវជ្រាវករណីវិវាទដីធ្លីខាងលើ។
ក្រុមការងារមានសមាជិក ១២រូប ដែលមានលោក សៀក វណ្ណា អនុរដ្ឋលេខាធិការ ជាប្រធាន និង លោក ឡោ ដាវុធ អគ្គនាយកនៃអគ្គបាយកដ្ឋានសុរិយោដីនិង ភូមិសាស្ត្រ ជាអនុប្រធាន និងរួមទាំងសមាជិក ៩រូប។
គួររម្លឹកថា កាលពីថ្ងៃទី៥ ខែ មីនា ឆ្នាំ២០១៩ កន្លងទៅនេះ តុលាការកំពូលក៏បានចេញមុខបកស្រាយជុំវិញការសម្រេចរបស់ខ្លួន បានសម្រេចសេចក្តីអំពីអត្ថិភាព ឬនត្ថិភាពនៃសិទ្ធិរបស់ភាគីលើដីទំនាស់ ដោយផ្អែកលើអង្គហេតុ ភស្តុតាង និងអង្គច្បាប់ច្បាស់លាស់។ តុលាការកំពូលកក៏បានចាត់ទុកពាក្យសម្តីរបស់ប្រធានគណបក្សខ្មែរក្រោក ដែលបានលើកឡើងពីទំនាស់ដីធ្លីនៅខេត្តព្រះសីហនុ ថាជាការញុះញង់ ដែលធ្វើឲ្យប្រជាពលរដ្ឋបាត់ជំនឿចិត្តលើសេចក្តីសម្រេចរបស់តុលាការផងដែរ។
កាលពីថ្ងៃទី២៨ កុម្ភៈ ប្រមុខរដ្ឋាភិបាល ក៏ចេញលិខិត ដកអភិបាលរងខេត្តពីររូបគឺលោក ផៃ ប៊ុនវណ្ណៈ និង លោក ស្រ៊ុន ស្រ៊ន់ ដែលជាអ្នកទទួលបញ្ជាចុះទៅអនវុត្តដីការបស់តុលាការកំពូល ដែលសម្រេចឲ្យឧកញ៉ាម្នាក់ឈ្នះក្តីលើប្រជាពលរដ្ឋ នៅភូមិគគីរ ឃុំបិតត្រាង ស្រុក ព្រៃនប់ខេត្តព្រះសីហនុ។ ការដកតំណែងអភិបាលរងទាំងពីររូបនេះ ក្រោយពីមានការអន្តរាគមន៍ ហើយផ្ទុះអំពើហិង្សារវាងកម្លាំងសមត្ថកិច្ច និង ប្រជាពលរដ្ឋប្រមាណ២០០នាក់ ដែលនាំគ្នាទៅតវ៉ានឹងសេចក្តីសម្រេចរបស់តុលាការកំពូល៕
© រក្សាសិទ្ធិដោយ thmeythmey.com