កីឡាជាតិ
ជាតិ
សូហ្វតិន្នីសនឹងបញ្ជូនកីឡាករទៅហ្វឹកហាត់នៅជប៉ុន៦ខែ ដើម្បីត្រៀមកីឡាស៊ីហ្គេមនៅហ្វីលីពីន
លោក ជា ប៊ុនហេង (កណ្តាល)អនុប្រធានសហព័ន្ធកីឡាសូហ្វតិន្នីសកម្ពុជា
×![]()
សហព័ន្ធកីឡាសូហ្វតិន្នីសកម្ពុជា នឹងបញ្ជូនកីឡាករកីឡាការិនីទៅហ្វឹកហាត់ពង្រឹងសមត្ថភាពនៅប្រទេសជប៉ុន៦ខែ ដើម្បីត្រៀមប្រជែងក្នុងព្រឹត្តិការណ៍កីឡាស៊ីហ្គេមនៅប្រទេសហ្វីលីពីន នាខែវិច្ឆិកា ឆ្នាំ២០១៩ ខាងមុខនេះ។ ព្រោះសហព័ន្ធយល់ថា ការហ្វឹកហាត់ក្រៅប្រទេសអាចជួយពង្រឹងសមត្ថភាព និងបច្ចេកទេសកីឡាករប្រសើរជាងការហ្វឹកហាត់ក្នុងប្រទេស។ ក្រៅពីកីឡាស៊ីហ្គេមនៅហ្វីលីពីន សហព័ន្ធក៏ត្រៀមរៀបចំ និងចូលរួមប្រកួតព្រឹត្តិការណ៍ធំៗជាច្រើនទៀតផងដែរនៅក្នុងឆ្នាំ២០១៩នេះ។
នៅចុងខែមេសា ឆ្នាំ២០១៩ ខាងមុខនេះ សហព័ន្ធកីឡាសូហ្វតិន្នីសកម្ពុជា នឹងបញ្ជូនកីឡាករកីឡាការិនីយ៉ាងតិចចំនួន៧រូប ទៅហ្វឹកហាត់ពង្រឹងសមត្ថភាព និងបច្ចេកទេសនៅប្រទេសជប៉ុនរយៈពេល៦ខែ។ ការបញ្ជូនទៅហ្វឹកហាត់នៅជប៉ុនលើកនេះ គឺដើម្បីត្រៀមប្រជែងដណ្តើមមេដាយក្នុងព្រឹត្តិការណ៍កីឡាស៊ីហ្គេមលើកទី២៩នៅប្រទេសហ្វីលីពីន ដែលរៀបចំចន្លោះពីថ្ងៃទី៣០ វិច្ឆិកា ដល់ថ្ងៃទី១១ ខែធ្នូ ឆ្នាំ២០១៩។
«ខ្ញុំគិតថា តាំងពីពេលនេះរហូតដល់ស៊ីហ្គេមនៅហ្វីលីពីនយើងនឹងរីកចម្រើនខ្លាំង ព្រោះបន្ទាប់ពីចូលឆ្នាំខ្មែរនៅចុងខែ៤ យើងនឹងបញ្ជូនកីឡាករកីឡាការិនីយ៉ាងតិច៧រូបទៅហ្វឹកហាត់ពង្រឹងសមត្ថភាពនៅជប៉ុនរយៈពេល៦ខែ»។ ការលើកឡើងបែបនេះ របស់លោក ជា ប៊ុនហេង អនុប្រធានទី១សហព័ន្ធកីឡាសូហ្វតិន្នីសកម្ពុជា ធ្វើឡើងក្នុងពិធីបិទការប្រកួតកីឡាសូហ្វតិន្នីសជ្រើសរើសជើងឯកថ្នាក់ជាតិប្រចាំឆ្នាំ២០១៩ កាលពីថ្ងៃទី៩ មីនា នៅទីលានសូហ្វតិន្នីសក្នុងពហុកីឡដ្ឋានជាតិ។
ទោះបីការប្រមូលផ្តុំហ្វឹកាហាត់ក្រុមជម្រើសជាតិបានរំសាយតាំងពីខែតុលា ឆ្នាំ២០១៨ ក៏ដោយ ប៉ុន្តែក្រុមអត្តពលិកកីឡាសូហ្វតិន្នីសមិនបានផ្អាកការហ្វឹកហាត់តាមការរំសាយនេះឡើយ។ ពោលគឺពួកគេបានបន្តការហ្វឹកហាត់ធម្មតា ក្រោមការចំណាយរបស់សហព័ន្ធកីឡាសូហ្វតិន្នីស ដែលមានសម្តេច ស ខេង ជាប្រធាន និងជាខ្នងបង្អែកដ៏រឹងមាំ។
តែយ៉ាងណា លោក ជា ប៊ុនហេង សង្កេតឃើញថា ការហ្វឹកហាត់ក្នុងស្រុកជួយឲ្យសមត្ថភាពរបស់កីឡាករកីឡាការិនីរីកចម្រើនត្រឹមកម្រិតបង្គួរតែប៉ុណ្ណោះ មិនអាចជួយឲ្យពួកគេឈានដល់កម្រិតកំពូលនោះទេ។ កត្តានេះហើយ ដែលជំរុញឲ្យសហព័ន្ធ ត្រូវបញ្ជូនកីឡាករទៅហ្វឹកហាត់នៅក្រៅប្រទេស។ សម្រាប់ការហ្វឹកហាត់នៅជប៉ុន ការចំណាយជាបន្ទុករបស់សហព័ន្ធ។
ក្រៅពីព្រឹត្តិការណ៍កីឡាស៊ីហ្គេមនៅហ្វីលីពីន សហព័ន្ធកីឡាសូហ្វតិន្នីស ក៏ត្រៀមរៀបចំ និងចូលរួមប្រកួតព្រឹត្តិការណ៍ធំៗកម្រិតតំបន់និងពិភពលោក៤ផ្សេងទៀតផងដែរ។ នៅខែសីហា ឆ្នាំ២០១៩ ខាងមុខ កម្ពុជានឹងធ្វើជាម្ចាស់ផ្ទះការប្រកួតជើងឯកអាស៊ីអាគ្នេយ៍ SEA Championship ដែលមានប្រទេសចូលរួមចំនួន៧។ បន្ថែមលើនេះ សហព័ន្ធនឹងបញ្ជូនកីឡាករទៅចូលរួមប្រកួតជើងឯកពិភពលោកនៅចិន ជើងឯកយុវជនអាស៊ីនៅហ្វីលីពីន និងជើងឯកកម្រិតសាកលវិទ្យាល័យនៅហ្វីលីពីន។
សម្រាប់ការប្រកួតកីឡាសូហ្វតិន្នីសជ្រើសរើសជើងឯកថ្នាក់ជាតិប្រចាំឆ្នាំ២០១៩ ក្លិបក្រសួងមហាផ្ទៃបានឈរចំណាត់ថ្នាក់លេខ១ ក្រោយដណ្តើមបានមេដាយមាស៤ ប្រាក់៤ និងសំរឹទ្ធ៩ ខណៈក្រសួងការពារជាតិឈរលេខ២ ក្រោយឈ្នះមេដាយមាស២ ប្រាក់៣ រីឯអគ្គស្នងការនគរបាលជាតិឈរលេខ៣ បន្ទាប់ឈ្នះមេដាយមាស២ ប្រាក់១ និងសំរឹទ្ធ៤។ ក្រៅពីនេះ ខេត្តកំពង់ស្ពឺបានមេដាយមាស១ និងសំរឹទ្ធ១, កំពង់ឆ្នាំង ប្រាក់១ និងសំរឹទ្ធ២ និងខេត្តព្រៃវែង សំរឹទ្ធ១។
ការប្រកួតឆ្នាំនេះមានកីឡាករកីឡាការិនីចំនួន៨០នាក់មកពី៧ក្លិប-សមាគមចូលរួមដូចជាក្រសួងមហាផ្ទៃ អគ្គស្នងការនគរបាលជាតិ ក្រសួងការពារជាតិ អង្គការមិត្តសម្លាញ់ ខេត្តកំពង់ស្ពឺ កំពង់ឆ្នាំង និងខេត្តព្រៃវែង៕
Tag:
សូហ្វតិន្នីស
ជា ប៊ុនហេង
SEA Games
© រក្សាសិទ្ធិដោយ thmeythmey.com
