ប្រធានក្លិបបឹងកេត លោកស្រី ពុធ ធីតា ក្លាយជាសមាជិកប្រតិបត្តិ FFC

កីឡាជាតិ

ជាតិ

ប្រធានក្លិបបឹងកេត លោកស្រី ពុធ ធីតា ក្លាយជាសមាជិកប្រតិបត្តិ FFC

11, Mar 2019 , 1:58 pm

រូបភាព

លោកស្រី ពុធ ធីតា ប្រធានក្លិបបឹងកេត ក្លាយជាសមាជិកប្រតិបត្តិសហព័ន្ធកីឡាបាល់ទាត់កម្ពុជា។ រូបថត FFC

ដោយ:

លោកស្រី ពុធ ធីតា ប្រធានក្លិបបាល់ទាត់បឹងកេត បានជាប់ឆ្នោតធ្វើជាសមាជិកប្រតិបត្តិសហព័ន្ធកីឡាបាល់ទាត់កម្ពុជា។ ជាមួយគ្នានេះ លោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡានៃក្រសួងអប់រំយុវជននិងកីឡាដែលជាសមាជិកប្រតិបត្តិផុតអាណត្តិ ក៏ត្រូវបានបោះឆ្នោតឲ្យបន្តធ្វើជាសមាជិកប្រតិបត្តិរបស់សហព័ន្ធផងដែរ។

លោកស្រី ពុធ ធីតា ប្រធានក្លិបបាល់ទាត់បឹងកេត និងលោក អ៊ុក សិទ្ធិជាតិ អគ្គនាយកនៃអគ្គនាយដ្ឋានកីឡានៃក្រសួងអប់រំយុវជននិងកីឡា ត្រូវបានអង្គមហាសន្និបាតបោះឆ្នោតតែងតាំងឲ្យធ្វើជាសមាជិកប្រតិបត្តិរបស់សហព័ន្ធកីឡាបាល់ទាត់កម្ពុជា។ ការបោះឆ្នោតជ្រើសរើសសមាជិកប្រតិបត្តិថ្មីនេះ បន្ទាប់ពីសមាជិកប្រតិបត្តិពីររួមមានលោក អ៊ុក សិទ្ធិជាតិ ផ្ទាល់ និងលោក ខៀវ ចិន្តាវ័ន្ត ត្រូវ ផុតអាណត្តិត្រឹមឆ្នាំ២០១៩នេះ។

នាពិធីបោះឆ្នោតដែលមានលោក ហ៊ុន សាមុត លោក ដួង មាសចំរើន និងលោក ប៉ុន សុខ ជាគណៈកម្មការរៀបចំការបោះឆ្នោត លោក ស្រី ពុធ ធីតា ទទួលបានសំឡេងគាំទ្រចំនួន២៩សំឡេងក្នុងចំណោមអ្នកចូលរួមបោះឆ្នោតចំនួន៣៧រូប ខណៈលោក អ៊ុក សិទ្ធិជាតិ ទទួលបានការគាំទ្រចំនួន៣២សំឡេង។ សម្រាប់ការបោះឆ្នោតនេះដែរ មានអ្នកឈរឈ្មោះចំនួន៦រូបរួមមានលោក អ៊ុក សិទ្ធិជាតិ, លោក ខៀវ ចិន្តាវ័ន្ត, លោក ហុក សុចិត្រា, លោក អៀង សាក់នីដា, លោក ចាប សុខម៉េង និងលោកស្រី ពុធ ធីតា។

ក្នុងនោះលោក ខៀវ ចិន្តាវ័ន្ត ដែលជាសមាជិកប្រតិបត្តិចាស់ទទួលបានសំឡេងគាំទ្រចំនួន៣សំឡេង, លោក អៀង សាក់នីដា បាន៦សំឡេង, លោក ហុក សុចិត្រា បាន៤សំឡេង និងលោក ចាប សុខម៉េង មិនទទួលបានសំឡេងគាំទ្រនោះទេ។ ការបោះឆ្នោតជ្រើសរើសសមាជិកប្រតិបត្តិថ្មីនេះ ធ្វើឡើងក្នុងមហាសន្និបាតបូកសរុបការងារក្នុងឆ្នាំ២០១៨ និងដាក់ទិសដៅអនុវត្តសម្រាប់ឆ្នាំ២០១៩ របស់សហព័ន្ធកីឡាបាល់ទាត់កម្ពុជានៅថ្ងៃទី១១ ខែមីនា ឆ្នាំ២០១៩ នាសណ្ឋាគារហ្គោដិនស៊ីធី៕