អន្តរជាតិ
សព្វាវុធរុស្ស៊ីនៅស៊ីរី (រូបភាព SANA)
×![]()
ដោយ: តន ចាន់រិទ្ធារ៉ា
រដ្ឋមន្ត្រីការពារជាតិរុស្ស៊ី Sergei Shoigu នៅថ្ងៃទី១១ ខែមីនា បានប្រកាសថា រុស្ស៊ីបានសាកល្បងអាវុធថ្មីៗជាងបីរយប្រភេទនៅទឹកដីស៊ីរី។ ក្នុងកិច្ចប្រជុំជាមួយគណៈកម្មាធិការការពារជាតិនៃសភារុស្ស៊ី លោក Shoigu ក៏និយាយថា បទពិសោធនៃអន្តរាគមន៍នៅស៊ីរីតាំងពីឆ្នាំ២០១៥ បង្ហាញពីសមត្ថភាពរបស់កងទ័ពរុស្ស៊ី ហើយនៅពេលនេះ យោធារុស្ស៊ីប្រែក្លាយទៅជាកម្លាំងយោធាដែលអាចចល័តរហ័ស និងមានសមត្ថភាពធ្វើសង្គ្រាមនៅទីតាំងដាច់ស្រយាលបំផុត។
ទឹកដីស៊ីរី ជាទីតាំងសាកអាវុធរបស់រុស្ស៊ី។ រដ្ឋមន្ត្រីការពារជាតិរុស្ស៊ី Sergei Shoigu ប្រាប់សមាជិកសភារុស្ស៊ីថា សមត្ថភាពរបស់យោធារុស្ស៊ីកើនឡើងយ៉ាងខ្លាំង បើប្រៀបធៀបនឹងឆ្នាំ២០១២ ទាំងការត្រៀមប្រយុទ្ធរបស់កងទ័ព និងប្រសិទ្ធភាពនៃយុទ្ធោបករណ៍របស់ខ្លួន ហើយកងទ័ពរុស្ស៊ីបច្ចុប្បន្ន ក៏អាចធ្វើសង្គ្រាមនៅទីឆ្ងាយៗបានដែរ។ មួយផ្នែកនៃការរីកចម្រើននេះ គឺបទពិសោធធ្វើប្រតិបត្តិការនៅឯស៊ីរីតែម្ដង។
នាកិច្ចប្រជុំជាមួយគណៈកម្មាធិការការពារជាតិនៃសភារុស្ស៊ីនៅថ្ងៃទី១១ ខែមីនា លោក Shoigu ដែលកាន់តំណែងរដ្ឋមន្ត្រីការពារជាតិជាង៦ឆ្នាំមកហើយនោះ បានរាយការណ៍ពីចំនួនអាវុធថ្មីៗដែលត្រូវបានធ្វើតេស្តនៅស៊ីរី ក៏ដូចជាសមត្ថភាពនៃកម្លាំងយោធារុស្ស៊ីក្នុងរយៈពេលដែលលោកដឹកនាំ។ បើតាមសារព័ត៌មាន Sputnik ប្រមុខការពារជាតិរុស្ស៊ីអះអាងថា កងទ័ពរុស្ស៊ីបានសាកល្បងអាវុធចំនួន៣១៦មុខក្នុងប្រតិបត្តិការនៅស៊ីរី។
រុស្ស៊ីចូលអន្តរាគមន៍នៅជម្លោះស៊ីរីកាលពីឆ្នាំ២០១៥ ក្រោមហេតុផលបោសសម្អាតក្រុមជ្រុលនិយមរដ្ឋឥស្លាម។ ស្របគ្នានេះ រុស្ស៊ីក៏សាកល្បងអាវុធថ្មីៗរបស់ខ្លួនដែរ។ លោក Shoigu និយាយថា ជាមួយនឹងបទពិសោធនៅស៊ីរី យោធារុស្ស៊ីទទួលបានមីស៊ីលថ្មីបំពាក់លើឧទ្ធម្ភាគចក្រដែលអាចបាញ់គោលដៅក្នុងចម្ងាយដល់ទៅ១៥គីឡូម៉ែត្រ ពោលគឺឧទ្ធម្ភាគចក្ររុស្ស៊ីមិនចាំបាច់ចូលតំបន់ប្រយុទ្ធគ្នា ក៏អាចកម្ទេចទីតាំងសត្រូវបានដែរ។
អ្វីកាន់តែចាប់អារម្មណ៍នោះ រដ្ឋមន្ត្រីការពារជាតិរូបនេះបានបង្ហាញបរិមាណមីស៊ីលដែលត្រូវបានដាក់ឲ្យប្រើចាប់ពីឆ្នាំ២០១២ ដល់ឆ្នាំ២០១៨ ។ សម្រាប់៦ឆ្នាំ រុស្ស៊ីទទួលបានមីស៊ីលបាលីស្ទិកអន្តរជាតិចំនួន១០៩ដើម មីស៊ីលបំពាក់ក្នុងនាវាមុជទឹកចំនួន១០៨ដើម។ លើសពីនោះ កងទ័ពរុស្ស៊ីក៏ទទួលនាវាមុជទឹកចំនួន៧គ្រឿង យានអាកាសចំនួន៥៧ រថក្រោះថ្មីដែលដំឡើងសមត្ថភាព និងរថពាសដែកចំនួនជាងបីពាន់គ្រឿង ព្រមទាំងយន្តហោះនិងឧទ្ធម្ភាគចក្រចំនួនជាងមួយពាន់គ្រឿងផង។
ការកើនឡើងសមត្ថភាពទាំងនេះ ត្រូវបានលោក Shoigu ចាត់ទុកជាការផ្លាស់ប្ដូរយ៉ាងធំមួយ ពោលគឺ រុស្ស៊ីខ្លាំងជាងពីមុន។ នេះក៏ព្រោះតែអ្វីដែលមិនអាចធ្វើបានកាលពីឆ្នាំ២០១២ រុស្ស៊ីអាចធ្វើបាននៅពេលនេះ។ ជាមួយនឹងអាវុធទំនើបៗ ការត្រៀមខ្លួនជាស្រេចរបស់កងទ័ពដើម្បីប្រយុទ្ធគ្រប់ពេល យោធារុស្ស៊ីអាចប្រយុទ្ធនៅសមរភូមិដាច់ស្រយាលបានដោយមិនភ័យបារម្ភអ្វីទាំងអស់។
Tag:
រុស្ស៊ី
Sergei Shoigu
© រក្សាសិទ្ធិដោយ thmeythmey.com
