អន្តរជាតិ
លោក ម៉ាក្រុង ព្រមានអាហ្វ្រិកពីហានិភ័យជាមួយចិន តែថា បារាំងជាដៃគូល្អ
× ប្រធានាធិបតីបារាំង អេម៉ានុយអែល ម៉ាក្រុង នៅថ្ងៃទី១២ ខែមីនា បានព្រមានពីគ្រោះថ្នាក់លើអធិបតេយ្យរបស់ប្រទេសអាហ្វ្រិកដែលបង្កដោយការកើនឡើងឥទ្ធិពលរបស់ចិន។ លោក ម៉ាក្រុង ព្រមានបែបនេះក្នុងដំណើរទស្សនកិច្ចនៅតំបន់អាហ្វ្រិកខាងកើត ជាទីដែលចិនបានបោះទុនរាប់សិបពាន់លានដុល្លារក្នុងវិស័យសេដ្ឋកិច្ច និងអភិវឌ្ឍន៍។ ខណៈលើកឡើងពីហានិភ័យកើតឡើងដោយសារចិន មេដឹកនាំបារាំងរូបនេះប្រាប់អាហ្វ្រិកថា ក្រុមហ៊ុនបារាំងគោរពដៃគូរកស៊ីរបស់ខ្លួន។
ជីប៊ូទី អេត្យូពី និងកេនយ៉ា គឺជាគោលដៅទស្សនកិច្ចរបស់ប្រធានាធិបតីបារាំង អេម៉ានុយអែល ម៉ាក្រុង នៅទ្វីបអាហ្វ្រិកប៉ែកខាងកើត។ អាហ្វ្រិកដែលសម្បូរធនធាន និងធ្លាប់ស្ថិតក្រោមអាណានិគមរបស់លោកខាងលិច កំពុងតែមានតែទំនាក់ទំនងជិតស្និទ្ធជាមួយចិន ដែលបានជះលុយសន្ធឹកសន្ធាប់ចូលទ្វីបមួយនេះតាមរយៈទំនាក់ទំនងសេដ្ឋកិច្ច ការវិនិយោគ កម្ចីអភិវឌ្ឍន៍ ហើយការណ៍នេះធ្វើឲ្យចិនមានឥទ្ធិពលកាន់តែខ្លាំងដែរ។
ជីប៊ូទីដែលជាអតីតរដ្ឋក្រោមអាណានិគមរបស់បារាំង ត្រូវបានលោក ម៉ាក្រុង ចាត់ទុកជាសម្ព័ន្ធមិត្តយុទ្ធសាស្ត្រ និងជាដៃគូប្រវត្តិសាស្ត្រ។ ប៉ុន្តែបានលើកឡើងពីហានិភ័យដែលកើតចេញពីវត្តមានចិន។ អ្វីគួរឲ្យចាបអារម្មណ៍ ចិន បារាំង អាមេរិក និងជប៉ុន សុទ្ធតែមានមូលដ្ឋានយោធារៀងៗខ្លួននៅក្នុងប្រទេសនៃតំបន់កុយរមាសអាហ្វ្រិកមួយនេះ ព្រោះជីប៊ូទីស្ថិតត្រង់ទីតាំងយុទ្ធសាស្ត្រដែលភ្ជាប់ទៅកាន់ព្រែកជីកស៊ុយអេរបស់អេហ្ស៊ីប។
ក្នុងសន្និសីទសារព័ត៌មានជាមួយសមភាគីជីប៊ូទី ប្រធានាធិបតីបារាំងរូបនេះនិយាយថា ចិនមានមហាអំណាច និងបានពង្រីកឥទ្ធិពលនៅប្រទេសជាច្រើន ពិសេសតំបន់អាហ្វ្រិក ប៉ុន្តែអ្វីដែលល្អនៅពេលខ្លី អាចក្លាយជារឿងអាក្រក់នៅពេលមធ្យម ឬពេលវែងបានផងដែរ ហើយបារាំងមិនចង់ឲ្យការវិនិយោគបរទេស ប៉ះពាល់ដល់អធិបតេយ្យប្រទេសដៃគូរបស់ខ្លួនឡើយ។
បើតាមទីភ្នាក់ងារព័ត៌មាន AFP លោក ម៉ាក្រុង ក៏ឆ្លៀតអួតអាងពីគុណសម្បត្តិរបស់ក្រុមហ៊ុនបារាំង ដែលត្រៀមខ្លួនបោះទុនវិនិយោគសម្រាប់គោលដៅរយៈពេលវែង។ ដោយប្រាប់ឲ្យជីប៊ូទីផ្លាស់ប្ដូរបរិយាកាសរកស៊ីឲ្យបានល្អប្រសើរដើម្បីទាក់ទាញអ្នកវិនិយោគ មេដឹកនាំបារាំងរូបនេះក៏បញ្ជាក់ដែរថា ក្រុមហ៊ុនបារាំង អាចធ្វើជាដៃគូដែលផ្ដល់ការគោរពដល់អ្នកដទៃ។ ប្រធានាធិបតីជីប៊ូទីប្រាប់លោក ម៉ាក្រុង វិញថា ប្រទេសលោកបើកចំហ ហើយក្រុមហ៊ុនបារាំងមានឱកាសវិនិយោគច្រើនដែរ។
ក្រុមហ៊ុនរដ្ឋ និងធនាគាររបស់ចិនជាច្រើនបានផ្ដល់ហិរញ្ញប្បទានសន្ធឹកសន្ធាប់សម្រាប់ការអភិវឌ្ឍហេដ្ឋារចនាសម្ព័ន្ធពាសពេញទ្វីបអាហ្វ្រិក។ មេដឹកនាំរដ្ឋអាហ្វ្រិកក៏និយាយអួតសរសើរចិនដែលបានផ្ដល់លុយកាក់ដល់ខ្លួនក្នុងការអភិវឌ្ឍប្រទេសតាមតម្រូវការដោយមិនភ្ជាប់លក្ខខណ្ឌអ្វីឡើយ។ ប៉ុន្តែលោកខាងលិចព្រមានជាញឹកញយពីអន្ទាក់បំណុលនៅពីក្រោយការផ្ដល់កម្ចីនេះ គុណភាពអន់ថយនៃគម្រោង និងការបង្ខំឲ្យដាក់ទ្រព្យសម្បត្តិរដ្ឋជាថ្នូរជាដើម៕
Tag:
បារាំង
អាហ្វ្រិក
ចិន
អេម៉ានុយអែល ម៉ាក្រុង
© រក្សាសិទ្ធិដោយ thmeythmey.com