អ្នកនិពន្ធទំនុកច្រៀង នី សុគន្ធា ចង់ឃើញស្ត្រីប្រឡូកក្នុងអាជីពនេះកាន់តែច្រើន

ភ្នំពេញ៖ កញ្ញា នី សុគន្ធា ជាអ្នកនិពន្ធទំនុកច្រៀងល្បីល្បាញមួយរូប នៅផលិតកម្មល្បីមួយនៅកម្ពុជា។ អាជីពជាអ្នកនិពន្ធទំនុកច្រៀង បានធ្វើឲ្យអ្នកនិពន្ធវ័យ២៧ឆ្នាំរូបនេះ អាចបញ្ចេញស្នាដៃអស់ពីចិត្ត និងបេះដូង។ អាជីពជាអ្នកនិពន្ធរបស់យុវតីរូបនេះ ចាប់ផ្តើមតាំងពីនាងអាយុ១៧ឆ្នាំម្ល៉េះ ពោលគឺនៅពេលសុគន្ធា នៅជាសិស្សវិទ្យាល័យ។ ក្នុងបទសម្ភាសជាមួយសារព័ត៌មានថ្មីៗ អ្នកនិពន្ធទំនុកច្រៀងវ័យក្មេងរូបនេះបញ្ជាក់ថា៖ «ទោះមានផលលំបាកក្នុងការតែងនិពន្ធ តែការងារនេះជាការងារដែលស្រឡាញ់ចេញពីចិត្តនិងចេញពីបេះដូង»។

សូមអញ្ជើញទស្សនាបទសម្ភាសរវាងកញ្ញា ញឹក ស្រីល័ក្ខ អ្នកសារព័ត៌មាន ThmeyThmey ជាមួយកញ្ញា នី សុគន្ធា អ្នកនិពន្ធទំនុកច្រៀងនៅផលិតកម្មរស្មីហង្សមាសដូចតទៅ៖

មិនមានក្រុមគ្រួសារជាអ្នកសិល្បៈនោះទេ ប៉ុន្តែដោយសារចិត្តស្រឡាញ់ និងមានទេពកោសល្យនិពន្ធផងនោះ អ្នកនិពន្ធសម្បុរស្រអែមរូបនេះ ក៏សម្រេចចិត្តប្រឡូកចូលក្នុងកិច្ចការនិពន្ធតែម្តង។ រយៈពេល១០មកនេះទឹកដៃតែងនិពន្ធរបស់កញ្ញា នី សុគន្ធា បានទាក់ទាញចិត្តអ្នកស្ដាប់ តាមរយៈសំនៀងរបស់តារាចម្រៀង។ បើតាមកញ្ញា នី សុគន្ធា បទចម្រៀងដែលកញ្ញាបាននិពន្ធ បានជួយ និងលើកស្ទួយដល់សង្គម ដោយអត្ថន័យនៃបទចម្រៀងនីមួយៗ។ កញ្ញា នី សុគន្ធា បញ្ជាក់ថា ការតែងនិពន្ធទំនុកច្រៀង កើតចេញពីសកម្មភាព និងរឿងពិតរបស់មនុស្សជុំវិញខ្លួន ដែលអាចតែងនិពន្ធចេញជាបទចម្រៀង។

ទំនុកច្រៀងដែលកញ្ញា នី សុគន្ធា បាននិពន្ធភាគច្រើន ត្រូវបានច្រៀងដោយតារាចម្រៀងល្បីៗក្នុងផលិតកម្មរស្មីហង្សមាសច្រៀង ទាំងបទញាក់ និងបទមនោសញ្ចតនា។ បទចម្រៀងល្បីៗចុងក្រោយនេះដែលកញ្ញា បាននិពន្ធរួមមាន៖ កាត់ចិត្តបែបណា,ត្រូវការកម្លាំងចិត្ត,បើស្រឡាញ់ម្ដេចទុកអូនចោល,ហត់ទេស្រលាញ់គេម្នាក់ឯង និងបទចម្រៀងជាច្រើនផ្សេងទៀត។

ថ្លែងប្រាប់សារព័ត៌មានថ្មីៗ កញ្ញា នី សុគន្ធា លើកឡើងថា៖«ទម្រាំបានបទចម្រៀង១បទៗ ខ្ញុំត្រូវចំណាយពេលវេលា និងអារម្មណ៍។ ក្នុង១បទ អាចចំណាយពេល១ថ្ងៃ បទខ្លះ២ថ្ងៃ និងបទខ្លះអាចដល់១សប្ដាហ៍ផងដែរ»។ ក្នុងការតែងនិពន្ធនេះ មានផលលំបាក ដោយអ្នកនិពន្ធត្រូវប្រើអារម្មណ៍ខ្ពស់ នៅពេលដែលអារម្មណ៍មិនល្អ ឬមួម៉ៅ ធ្វើឲ្យការតែងនិពន្ធមកល្អ៕