ភ្នំពេញ៖ ខណៈកម្ពុជា មានថ្ងៃឈប់សម្រាកច្រើននោះ វាធ្វើឲ្យអ្នកវិនិយោគ និងម្ចាស់អាជីវកម្មគ្រប់ប្រភេទ រអ៊ូរទាំពីបញ្ហាចង្វាក់ផលិតកម្មរបស់ពួកគេ។ ថ្ងៃឈប់សម្រាកច្រើន អាចប៉ះពាល់តិច ឬច្រើនទៅដល់ប្រសិទ្ធភាពការងារ ក្នុងការផលិត។ ដូច្នេះតើកម្ពុជាគួរតែកាត់បន្ថយថ្ងៃបុណ្យឈប់សម្រាកដែរទេ? ហើយការកាត់បន្ថយនោះ អាចជះផលវិជ្ជមាន និងអវិជ្ជមានអ្វីខ្លះ?
ការកាត់បន្ថយថ្ងៃបុណ្យជាតិ សម្រាប់ឈប់សម្រាកនោះ វាប្រាកដជាមានទាំងផលវិជ្ជមាន និងអវិជ្ជមាន។ លោក គី សេរីវឌ្ឍន៍ អ្នកវិភាគសេដ្ឋកិច្ច បាននិយាយថា ការឈប់សម្រាកច្រើន វាធ្វើឲ្យសង្វាក់ផលិតកម្មមានភាពយឺតយ៉ាវ និងស្ទះ ដែលធ្វើឲ្យការផលិតមានការចំណាយខ្ពស់ ហើយពិបាកនឹងប្រកួតប្រជែង។ ដូច្នេះរដ្ឋាភិបាលគួរតែកាត់បន្ថយថ្ងៃឈប់សម្រាក ដើម្បីជាយុទ្ធសាស្ត្រមួយ ក្នុងការទាក់ទាញអ្នកវិនិយោគិន ខណៈកម្ពុជាកំពុងស្ថិតនៅក្រោមការសើបអង្កេតលើករណី EBA របស់សហគមន៍អឺរ៉ុប។
ត្រង់ចំណុចនេះ លោក គី សេរីវឌ្ឍន៍ បានព្យាករណ៍ថា កម្ពុជា នឹងកើនចំណូលថវិកាជាតិយ៉ាងតិច ១៥០លានដុល្លារអាមេរិក បើសិនជារដ្ឋាភិបាលសម្រេចលុបចោលថ្ងៃបុណ្យជាតិមិនសំខាន់ចំនួន ៧ ថ្ងៃ ចេញពីថ្ងៃឈប់សម្រាកប្រចាំឆ្នាំបច្ចុប្បន្ននេះ។ អ្នកវិភាគសេដ្ឋកិច្ចរូបនេះ បានគណនាតាមរូបមន្តសេដ្ឋកិច្ច នៃការកាត់បន្ថយថ្ងៃឈប់សម្រាក ហើយសង្ខេបប្រាប់សារព័ត៌មានថ្មីៗយ៉ាងដូច្នេះថា៖« គេមិនវាស់ជាមួយទំហំពាណិជ្ជកម្មទេ គេវាស់ជាមួយនឹងចំណូលជាតិ (GDP) ដូច្នេះវានឹងជួយឲ្យ GDP កើន១៥០លានដុល្លារបន្ថែមទៀតនៅពេលដែលរដ្ឋាភិបាលកាត់បន្ថយថ្ងៃឈប់ ៧ថ្ងៃ បើវាស់ជាមួយទំហំពាណិជ្ជកម្មមិនត្រូវទេ។ ក្នុងឆ្នាំ២០១៨ ទំហំពាណិជ្ចកម្ម ២៦,៥ ពាន់លាន»។
បន្ថែមពីនេះលោក គី សេរីវឌ្ឍន៍ បានសង្កត់ធ្ងន់ថា ប្រទេសកម្ពុជាមានថ្ងៃឈប់សម្រាកការងារច្រើនជាងប្រទេសក្នុងតំបន់អាស៊ាន។ ក្នុងនោះប្រទេសវៀតណាមមានថ្ងៃឈប់តិចជាងកម្ពុជាស្ទើតែពាក់កណ្ដាល ដែលធ្វើឲ្យវិនិយោគិនងាកទៅរកប្រទេសវៀតណាម។
« នៅក្នុងប្រទេសវៀតណាម គេឈប់សរុបទាំងអស់ប្រមាណប្រមាណ ២៨ នៅ ៣០ថ្ងៃ។ ចំណែកឯកម្ពុជាឈប់សម្រាកច្រើន ទាំងបុណ្យជាតិ ២៨ ថ្ងៃ ឈប់ប្រចាំឆ្នាំ១៨ ថ្ងៃ ហើយបើបុណ្យចំថ្ងៃចុងសប្តាហ៍ ត្រូវសងថ្ងៃធ្វើការថែមទៀត ដូច្នេះក្នុង១ឆ្នាំប្រមាណ៥០ ថ្ងៃ។ ដូច្នេះហើយយើងធ្វើការតិចជាងគេមួយខែ ។កត្តានេះហើយដែលធ្វើឲ្យកំណើនសេដ្ឋកិច្ចមិនខ្ពស់ និងកំណើនវិនិយោគ ងាកទៅរកវៀតណាម គេចាប់អារម្មណ៍នៅលើវៀតណាមជាង»។ នេះជាការលើកឡើងរបស់អ្នកវិភាគសេដ្ឋកិច្ច ដែលស្នើឲ្យរាជរដ្ឋាភិបាលពិចារណាលើការកាត់បន្ថយថ្ងៃឈប់សម្រាក និងត្រូវពង្រឹងសមត្ថភាពកម្មករបន្ថែមទៀត ក្នុងការជំរុញផលិតភាពកាន់តែខ្ពស់ជាងមុន។
ជុំវិញបញ្ហានេះ លោក តែ តុងប៉ សម្ព័ន្ធសហគមន៍សហគ្រាសធុនតូច និង មធ្យមកម្ពុជា បានថ្លែងប្រាប់សារព័ត៌មានថ្មីៗថា វិស័យឯកជនបានស្នើទៅក្រសួងសេដ្ឋកិច្ច និងហិរញ្ញវត្ថុ ដោយសុំមិនឲ្យមានការឈប់លើកថ្ងៃបន្ថែម លើសពីថ្ងៃបុណ្យជាតិឡើយ ព្រោះវាធ្វើឲ្យប៉ះពាល់ដល់ចង្វាក់ផលិតកម្មរបស់ពួកគេ ។ លោក តុងប៉ យល់ឃើញថា ការកាត់បន្ថយថ្ងៃឈប់ជារឿងមួយល្អសម្រាប់ពង្រឹងការផលិតសហគ្រិន។
សម្ព័ន្ធសហគមន៍សហគ្រាសធុនតូច និង មធ្យមកម្ពុជា បាននិយាយដូច្នេះថា៖ « ការឈប់លើកថ្ងៃ ដូចថាត្រូវឈប់នៅថ្ងៃអាទិត្យ តែត្រូវលើកដល់ថ្ងៃច័ន្ទ បញ្ហានេះហើយ ដែលវិស័យឯកជនស្នើសុំកុំឲ្យមានការឈប់លើកថ្ងៃបែបនេះ។ ខ្ញុំឬខាងរោងចក្រកាត់ដេរយល់ថា វាប៉ះពាល់ដល់ពេលវេលា ចេញឡានកុងទ័នឺរក្រុមហ៊ុនមិនរួច »។
ផ្ទុយពីការយល់ឃើញរបស់អ្នកវិភាគ លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា បាននិយាយថា ការកាត់បន្ថយថ្ងៃឈប់សម្រាកមិនបានផ្ដល់ផលចំណេញដល់កម្មករទេ គឺវាផ្ដល់ផលចំណេញទៅលើវិនិយោគិនតែប៉ុណ្ណោះ។ ដូច្នេះលោកបានប្រកាសជំហរមិនគាំទ្រការកាត់ចំនួនថ្ងៃឈប់សម្រាក់ឡើយ ។ មូលហេតុដែលលោក អាត់ ធន់ មិនគាំទ្រនេះ ដោយលោកផ្អែកលើរបាយការណ៍អង្គការ ILO ដែលបានរកឃើញថា កម្ពុជាមិនឈប់ច្រើនជាងប្រទេសជិតខាងនោះទេ។
« កាត់បន្ថយថ្ងៃបុណ្យមានន័យថា បង្កើនការងារឲ្យកម្មករកាន់តែច្រើន ដូច្នេះខាតលើចំណូលរបស់កម្មករ ។ខ្ញុំមិនគាំទ្រនោះទេ។ អង្គការ ILO បានបង្ហាញថាការឈប់សម្រាកក្នុងប្រទេសកម្ពុជាមិនច្រើនជាងប្រទេសជិតខាងនោះទេ ស្ថិតនៅមធ្យមនៅឡើយ។ និយោជិកតែងតែនិយាយបែបនេះពីមុន ហើយគេធ្លាប់និយាយថា ការវិនិយោគកាត់បន្ថយពី ១៥០ភាគរយ មកនៅ១៣០ ភាគរយ ការងារច្រើនដដែល មិនមានប្រយោជន៍អ្វីនោះទេ»។ នេះជាការលើកឡើងរបស់ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា។
ទាក់ទងនឹងបញ្ហាកាត់បន្ថយថ្ងៃឈប់សម្រាកខាងលើនេះ ទាំងអ្នកនាំពាក្យក្រសួងឧស្សាហកម្ម និងសិប្បកម្ម ទាំងអ្នកនាំពាក្យក្រសួងសេដ្ឋកិច្ច និងហិរញ្ញវត្ថុ មិនទាន់ទទួលបានព័ត៌មានឡើយ។
តែយ៉ាងណាតាមរយៈកាសែតខ្មែរថាម៍ បានស្រង់សម្តីលោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្មថា អនុក្រឹត្យស្តីពីការកាត់បន្ថយថ្ងៃបុណ្យ នឹងចេញនៅចុងខែមីនា ឆ្នាំ២០១៩នេះ។
គួររម្លឹកថា ក្នុងឆ្នាំ២០១៨ កំណើនសេដ្ឋកិច្ចជាតិមានម្រមាណ ៧,៣ ភាគរយ ដែលចំណូលមធ្យមរបស់មនុស្សម្នាក់កើនដល់១,៥៦៣ ដុល្លារ។ ចំណែកទំហំពាណិជ្ជកម្មសរុបមាន២៤ពាន់លានដុល្លារ៕